ສູນກາງແນວລາວສ້າງຊາດ

Lao Front For National Development

ສນຊ ເຊື່ອມຊຶມເອກະສານກ່ຽວກັບການກະກຽມ ແລະ ດຳເນີນກອງປະຊຸມພົບປະຜູ້ຊົງຄຸນວຸດທິ ບັນດາຊົນເຜົ່າທົ່ວປະເທດ ຄັ້ງທີ 3 ປີ 2018

ໃນວັນທີ 21 ມິຖຸນາ 2018, ສູນກາງແນວລາວສ້າງຊາດ(ສນຊ) ໄດ້ຈັດກອງປະຊຸມເຊື່ອມຊຶມເອກະສານກ່ຽວກັບການກະກຽມ ແລະ ດຳເນີນກອງປະຊຸມພົບປະຜູ້ຊົງຄຸນວຸດທິ ບັນດາຊົນເຜົ່າທົ່ວປະເທດ ຄັ້ງທີ 3 ປີ 2018 ທີ່ຈະຈັດຂຶ້ນໃນກາງເດືອນ ສິງຫາ ປີ 2018 ນີ້, ໂດຍການເປັນປະທານຂອງທ່ານ ປອ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນ ກາງແນວລາວສ້າງຊາດ, ມີບັນດາທ່ານຮອງປະທານ ສນຊ, ບັນດາທ່ານກຳມະການ ສນຊ ອ້ອມຂ້າງສູນກາງ, ຕາງໜ້າກະຊວງ-ອົງການ ພັກ-ລັດ, ປະທານ-ຮອງປະທານແນວລາວສ້າງຊາດນະຄອນຫຼວງ-ບັນດາແຂວງໃນຂອບເຂດທົ່ວປະເທດ, ບັນດາທ່ານ ຫົວໜ້າ-ຮອງຫົວໜ້າຫ້ອງການ, ກົມ, ສູນຝຶກອົບຮົມ ສນຊ, ຕາງໜ້າພະແນກຈັດຕັ້ງ ແລະ ພະນັກງານ-ລັດຖະກອນອ້ອມຂ້າງ ສນຊ ເຂົ້າຮ່ວມ.

ໂອກາດດັ່ງກ່າວ, ໄດ້ຮັບຟັງການເຜີຍແຜ່ ມະຕິຕົກລົງ ຂອງຄະນະເລຂາທິການສູນກາງພັກ ວ່າດ້ວຍການອະນຸມັດຈັດຕັ້ງກອງປະຊຸມພົບປະຜູ້ຊົງຄຸນວຸດທິບັນດາຊົນເຜົ່າ ທົ່ວປະເທດ ຄັ້ງທີ 3 ປີ 2018 ສະບັບເລກທີ 60/ຄລສພ, ລົງວັນທີ 6/6/2018, ມະຕິຕົກລົງ ວ່າດ້ວຍການແຕ່ງຕັ້ງຄະນະຮັບຜິດຊອບຊີ້ນຳລະດັບຊາດ ສະບັບເລກທີ 61/ຄລສພ, ລົງວັນທີ 6/6/2018, ຂໍ້ຕົກລົງ ວ່າດ້ວຍມາດຕະຖານ ແລະ ເງື່ອນໄຂ ຂອງຜູ້ຊົງຄຸນວຸດທິບັນດາຊົນເຜົ່າ ສະບັບເລກທີ 271/ສນຊ, ລົງວັນທີ 12/6/2018, ຂໍ້ຕົກລົງ ວ່າດ້ວຍການແບ່ງປັນຕົວເລກຜູ້ຊົງຄຸນວຸດທິ ໃຫ້ບັນດາກະຊວງ, ອົງການ ແລະ ທ້ອງຖິ່ນ ເຂົ້າຮ່ວມກອງປະຊຸມພົບປະຜູ້ຊົງຄຸນວຸດທິບັນດາຊົນເຜົ່າ ສະບັບເລກທີ 272/ສນຊ, ລົງວັນທີ 12/6/2018; ແຜນການກະກຽມ ແລະ ດຳເນີນກອງປະຊຸມ ສະບັບເລກທີ 059/ສນຊ, ລົງວັນທີ 12/6/2018 ແລະ ຄຳແນະນຳ ຂອງຄະນະກຳມະ ການສູນກາງແນວລາວສ້າງຊາດ ສະບັບເລກທີ 030/ສນຊ, ລົງວັນທີ 19/6/2018 ກ່ຽວກັບການກະກຽມ ແລະ ດຳ ເນີນກອງປະຊຸມພົບປະຜູ້ຊົງຄຸນວຸດທິບັນດາຊົນເຜົ່າ ທົ່ວປະເທດ ຄັ້ງທີ 3 ປີ 2018 ທີ່ນະຄອນຫຼວງວຽງຈັນ ເຊິ່ງຈະໄດ້ດຳເນີນລະ ຫວ່າງວັນທີ 10-14 ສິງຫາ 2018. ພ້ອມກັນນີ້, ກໍໄດ້ມີການປະກອບຄຳຄິດຄຳເຫັນ ຕໍ່ກັບບັນດາເອກະສານດັ່ງກ່າວ ເພື່ອພ້ອມກັນເອກະພາບ ໃນການກະກຽມ, ຈັດຕັ້ງປະຕິບັດ, ແລະ ເພື່ອໃຫ້ຜູ້ເຂົ້າຮ່ວມກອງປະຊຸມ ສາມາດເຊຶ່ອມຊຶມ ແລະ ກຳໄດ້ເນື້ອໃນຕ່າງໆຂອງບັນດາເອກະສານ ດັ່ງກ່າວໄດ້ຢ່າງເລິກເຊິ່ງ.

ໂອກາດດັ່ງກ່າວ, ທ່ານ ປະທານ ສນຊ ກໍໄດ້ໃຫ້ກຽດມີຄຳເຫັນຊີ້ນຳຕື່ມວ່າ: ໃຫ້ບັນດາທ່ານຜູ້ແທນທີ່ໄດ້ເຂົ້າຮ່ວມ ກອງປະຊຸມຄັ້ງນີ້ ເອົາໃຈໃສ່ກຳແໜ້ນບັນດາມາດຕະຖານ ແລະ ເງື່ອນໄຂຂອງຜູ້ຊົງຄຸນວຸດທິບັນດາຊົນເຜົ່າ ເພື່ອເປັນບ່ອນອີງທີ່ສຳຄັນໃນການຄັດເລືອກຜູ້ທີ່ໄດ້ມາດຕະຖານຄົບຖ້ວນ ເພື່ອມາຮ່ວມກອງປະຊຸມພົບປະຜູ້ຊົງຄຸນວຸດທິບັນດາຊົນເຜົ່າ ທົ່ວປະເທດຄັ້ງທີ 3; ນຳເອົາເນື້ອໃນຈິດໃຈໃນກອງປະຊຸມຄັ້ງນີ້ ໄປລາຍງານ, ປຶກສາຫາລຶ ແລະ ຕົກລົງເປັນເອກະພາບນຳຄະນະປະຈຳພັກກະ ຊວງ, ອົງການ ແລະ ຄະນະປະຈຳພັກແຂວງ-ນະຄອນຫຼວງ ເພື່ອກຳນົດເປົ້າໝາຍເຜົ່າ, ເພດ, ອາຊີບ, ຄວາມຮູ້, ຄວາມສາ ມາດຕົວຈິງດ້ານວິຊາການໃດໜຶ່ງ, ເປັນບຸກຄົນທີ່ມີບົດບາດ, ໄດ້ຮັບຄວາມເຄົາລົບນັບຖື ແລະ ໄວ້ເນື້ອເຊື່ອໃຈຈາກປະຊາຊົນບັນດາເຜົ່າ; ເມື່ອໄດ້ເປົ້າໝາຍແລ້ວ ໃຫ້ສົ່ງລາຍຊື່ໃຫ້ອະນຸກຳມະການບຸກຄາລາກອນຂອງຄະນະຊີ້ນຳລະດັບຊາດ ກ່ອນວັນທີ 20 ກໍລະກົດ 2018 ເພື່ອຈະໄດ້ສັງລວມຕົວເລກ ຜູ້ແທນທົ່ວປະເທດ ແລະ ໃຫ້ກະຊວງ, ອົງການສູກາງ ແລະ ທ້ອງຖິ່ນ ຖືເອົາໂອກາດນີ້ ສ້າງຂະບວນການຕ້ອນຮັບກອງປະຊຸມພົບປະຜູ້ຊົງຄຸນວຸດທິບັນດາຊົນເຜົ່າ ທົ່ວປະເທດ ຄັ້ງທີ 3 ປີ 2018 ແລະ ການກະກຽມກອງປະຊຸມໃຫຍ່ 3 ຂັ້ນ ຂອງພັກຕາມສະພາບເງື່ອນໄຂຄວາມສາມາດຕົວຈິງຂອງແຕ່ລະພາກ ສ່ວນ.

info@lfnd.org.la | 021 213754 | (856-21) 453191