ສູນກາງແນວລາວສ້າງຊາດ

Lao Front For National Development

ສະຫຼຸບຕີລາຄາຄືນການເຄື່ອນໄຫວວຽກງານໂຄສະນາ  ແລະ ວຽກງານຂົນຂວາຍປະຊາຊົນ ສູນກາງແນວລາວສ້າງຊາດ

ທີ່ສູນກາງແນວລາວສ້າງຊາດ ໃນວັນທີ 29 ທັນວາ 2023 ນີ້, ກົມໂຄສະນາ ສູນກາງແນວລາວສ້າງຊາດ ຮ່ວມກັບຄະນະທີ່ປຶກສາວຽກງານຂົນຂວາຍປະຊາຊົນ ໄດ້ຈັດກອງປະຊຸມສະຫຼຸບຕີລາຄາຄືນການເຄື່ອນໄຫວວຽກງານ ໂຄສະນາ ແລະ ວຽກງານຂົນຂວາຍປະຊາຊົນ ສູນກາງແນວລາວສ້າງຊາດ ໂດຍການເປັນປະທານຂອງທ່ານ ບົວເງິນ ຊາພູວົງ ກຳມະການສູນກາງແນວລາວສ້າງຊາດ ຫົວໜ້າຄະນະທີ່ປຶກສາວຽກງານຂົນຂວາຍປະຊາຊົນ ສູນກາງແນວລາວສ້າງຊາດ, ເປັນກຽດເຂົ້າຮ່ວມມີ ທ່ານ ດຣ ນາງ ອິນລາວັນ ແກ້ວບຸນພັນ ກຳມະການສູນກາງພັກ, ຮອງປະທານສູນກາງແນວລາວສ້າງຊາດ, ມີບັນດາທ່ານຄະນະທີ່ປຶກສາ, ຫົວໜ້າ-ຮອງຫົວໜ້າກົມ, ຫ້ອງການ ແລະ ສູນຄົ້ນຄວ້າ-ຝຶກອົບຮົມ ພ້ອມດ້ວຍພະນັກງານຂອງກົມໂຄສະນາ ສູນກາງແນວລາວສ້າງຊາດ ເຂົ້າຮ່ວມ.

ກອງປະຊຸມໄດ້ສະຫຼຸບຕີລາຄາຄືນການຈັດຕັ້ງປະຕິບັດວຽກງານຕ່າງໆ ຂອງຄະນະທີ່ປຶກສາວຽກງານຂົນຂວາຍປະຊາຊົນ ທີ່ໄດ້ປະກອບສ່ວນເຂົ້າໃນວຽກງານໂຄສະນາ ຂອງສູນກາງແນວລາວສ້າງຊາດ ໃນໄລຍະ 1 ປີທີ່ຜ່ານມາ ແລະ ທິດທາງແຜນການວຽກງານຈຸມສຸມໃນຕໍ່ໜ້າ ເຊິ່ງໄດ້ຍົກໃຫ້ເຫັນບາງຜົນງານທີ່ພົ້ນເດັ່ນ, ຂໍ້ສະດວກ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ຈາກການເຄື່ອນໄຫວວຽກງານຕ່າງໆ. ພ້ອມກັນນັ້ນ, ຍັງໄດ້ຕີລາຄາຄືນການຈັດຕັ້ງປະຕິບັດວຽກງານໂຄສະນາ ໃນໄລຍະ 1 ປີຜ່ານມາ ເຊິ່ງໄດ້ຍົກໃຫ້ເຫັນບາງວຽກງານທີ່ພົ້ນເດັ່ນ ຄື: ວຽກງານສື່ອອນລາຍ, ວຽກງານວິທະຍຸ, ວຽກງານໂທລະພາບ, ວຽກງານໜັງສືພິມ, ວຽກງານວາລະສານ, ວຽກງານໂຄສະນາ-ຂະບວນການ ແລະ ວຽກງານຫໍມູນເຊື້ອ. ພ້ອມກັນນັ້ນບັນດາທ່ານທີ່ເຂົ້າຮ່ວມກອງປະຊຸມ ກໍ່ໄດ້ປະກອບຄຳຄິດຄຳເຫັນຕໍ່ບັນດາວຽກງານດັ່ງກ່າວຢ່າງກົງໄປກົງມາຕື່ມອີກ.

ໂອກາດນີ້, ທ່ານ ຮອງປະທານ ສູນກາງແນວລາວສ້າງຊາດ ໄດ້ສະແດງຄວາມຍ້ອງຍໍຕໍ່ຜົນງານທີ່ພົ້ນເດັ່ນທີ່ຄະນະທີ່ປຶກສາ ແລະ ກົມໂຄສະນາ ສາມາດຍາດໄດ້ໃນໄລຍະຜ່ານມາ ແລະ ທ່ານ ໄດ້ເນັ້ນຕື່ມວ່າ: ໃຫ້ຄະນະທີ່ປຶກສາ ແລະ ກົມໂຄສະນາ ຈົ່ງນຳເອົາບັນດາເນື້ອໃນຂໍ້ແຂ່ງຂັນຮັກຊາດ ແລະ ພັດທະນາ ມາສຶກສາຄົ້ນຄວ້າ ສ້າງເປັນແຜນງານລະອຽດ ແລະ ຈັດຕັ້ງຜັນຂະຫຍາຍເຂົ້າສູ່ວຽກງານຕົວຈີງ ໃຫ້ໄດ້ຮັບໝາກຜົນ, ວຽກງານສ້າງຄຸນງາມຄວາມດີ ຕ້ອງສືບຕໍ່ຮ່ວມກັນຄົ້ນຄວ້າສ້າງກິດຈະກຳຮ່ວມກັນ ແລະ  ຈັດຕັ້ງປະຕິບັດຮ່ວມກັນເພື່ອເຮັດໃຫ້ວຽກງານຂົນຂວາຍມີຜົນງານດີເດັ່ນຫຼາຍຂື້ນ, ສືບຕໍ່ປຸກລະດົມປະຊາຊົນລາວ ນຳໃຊ້ຜະລິດຕະພັນລາວ ແລະ ສ້າງຂະບວນການຕ່າງໆ ເພື່ອຂ່ຳນັບຮັບຕ້ອນວັນສຳຄັນຕ່າງໆ ຂອງຊາດ, ຂອງພັກ-ຂອງລັດ ໃຫ້ເປັນຂະບວນການຟົດຟື້ນ.

ຂ່າວ+ພາບ: ເຢ້

ບກ: ສືເຊັ່ງ

info@lfnd.org.la | 021 213754 | (856-21) 453191