ສູນກາງແນວລາວສ້າງຊາດ

Lao Front For National Development

ສຳເລັດການດຳເນີນກອງປະຊຸມສາມັນຄົບຄະນະກຳມະການແນວລາວສ້າງຊາດ ນະຄອນຫຼວງວຽງຈັນ ຄັ້ງທີ 3 ສະໄໝທີ VIII

ແນວລາວສ້າງຊາດ ນະຄອນຫຼວງວຽງຈັນ(ນວ) ຈັດກອງປະຊຸມສາມັນຄົບຄະນະກຳມະການແນວລາວສ້າງຊາດ ນະຄອນຫຼວງວຽງຈັນ ຄັ້ງທີ 3 ສະໄໝທີ VIII ຂຶ້ນ ໂດຍການເປັນປະທານຂອງທ່ານ ຖະໜອມ ທຳທອງ ກຳມະການສູນກາງແນວລາວສ້າງຊາດ, ຄະນະປະຈຳພັກ, ປະທານແນວລາວສ້າງຊາດນະຄອນຫຼວງວຽງຈັນ, ເປັນກຽດເຂົ້າຮ່ວມມີ ທ່ານ ດຣ ນາງ ອິນລາວັນ ແກ້ວບຸນພັນ ກຳມະການສູນກາງພັກ, ຮອງປະທານສູນກາງແນວລາວສ້າງຊາດ; ມີບັນດາທ່ານຮອງປະທານປະຈໍາການ-ບໍ່ປະຈຳການ, ກຳມະການແນວລາວສ້າງຊາດ ນວ ພ້ອມດ້ວຍພະນັກງານລັດຖະກອນຂອງແນວລາວສ້າງຊາດ ນວ ແລະ ແຂກຖືກເຊີນ ເຂົ້າຮ່ວມ ໃນວັນທີ 14 ກຸມພາ 2024 ທີ່ຫ້ອງປະຊຸມໃຫຍ່ຂອງສຳນັກງານປົກຄອງນະຄອນຫຼວງວຽງຈັນ.

ກອງປະຊຸມ, ໄດ້ຮັບຟັງບົດສະຫຼຸບຕີລາຄາຄືນກ່ຽວກັບການເຄື່ອນໄຫວວຽກງານ ຂອງແນວລາວສ້າງຊາດ ນວ ປະຈຳປີ 2023 ແລະ ທິດທາງແຜນການປີ 2024 ເຊິ່ງໄດ້ຍົກໃຫ້ເຫັນຜົນງານທີ່ພົ້ນເດັ່ນ ໃນການເຄື່ອນໄຫວວຽກງານຮອບດ້ານໃນໄລຍະຜ່ານມາ ເປັນຕົ້ນແມ່ນຄະນະກຳມະການແນວລາວສ້າງຊາດ ໄດ້ເອົາໃຈໃສ່ຕໍ່ວຽກງານຈຸດສຸມ ແລະ ແຜນພັດທະນາຂອງອົງການແນວລາວສ້າງຊາດ ທີ່ກອງປະຊຸມສາມັນຄົບຄະນະກຳມະການແນວລາວສ້າງຊາດ ຄັ້ງທີ 2 ໄດ້ວາງໄວ້ ເຊັ່ນ: ວຽກງານການເມືອງ-ແນວຄິດ, ວຽກງານການເຕົ້າໂຮມຄວາມສາມັກຄີປອງດອງ, ວຽກງານປຸກລະດົມຂະບວນການທົ່ວສັງຄົມ, ວຽກງານການປັບປຸງການຈັດຕັ້ງ, ວຽກງານຊົນເຜົ່າ, ວຽກງານຊັ້ນຄົນ-ການຈັດຕັ້ງສັງຄົມ, ວຽກງານສາສະໜາ ແລະ ວຽກງານພົວພັນຕ່າງປະເທດ  ພ້ອມທັງໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ໃນໄລຍະຜ່ານມາ. ພ້ອມກັນນີ້, ຜູ້ແທນກອງປະຊຸມຍັງໄດ້ປະກອບຄຳເຫັນແລກປ່ຽນຢ່າງກົງໄປກົງມາຕໍ່ບັນດາວຽກວຽກງານຕ່າງໆ. ຫຼັງຈາກນັ້ນ, ກອງປະຊຸມໄດ້ຮັບຮອງການແຕ່ງຕັ້ງຮອງປະທານແນວລາວສ້າງຊາດ ນະຄອນຫຼວງວຽງຈັນ 1 ທ່ານ.

ໂອກາດນີ້, ທ່ານ ຮອງປະທານສູນກາງແນວລາວສ້າງຊາດ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ພົ້ນເດັ່ນທີ່ແນວລາວສ້າງຊາດນະຄອນຫຼວງວຽງຈັນ ສາມາດຍາດໄດ້ໃນໄລຍະຜ່ານມາ ແລະ ທ່ານໄດ້ມີຄຳເຫັນເນັ້ນຕໍ່ກອງປະຊຸມຕື່ມວ່າ ໃຫ້ແນວລາວສ້າງຊາດແຕ່ລະຂັ້ນ ຈົ່ງສືບຕໍ່ຮັກສາມູນເຊື້ອຂອງແນວລາວສ້າງຊາດ, ໃຫ້ສະມາຊິກພັກ-ພະນັກງານຈົ່ງເອົາໃຈໃສ່ສຶກສາຄົ້ນຄວ້າບັນດານິຕິກຳຕ່າງໆທີ່ກ່ຽວຂ້ອງກັບວຽກງານແນວລາວສ້າງຊາດ ເພື່ອຍົກລະດັບຄວາມຮູ້ຄວາມສາມາດຕໍ່ກັບວຽກງານແນວໂຮມ ແລະ ນຳໄປຈັດຕັ້ງຜັນຂະຫຍາຍເຂົ້າໃນການຈັດຕັ້ງປະຕິບັດວຽກງານຕົວຈີງໃຫ້ໄດ້ຮັບຜົນສຳເລັດ; ສືບຕໍ່ເຜີຍແຜ່ແນວທາງນະໂຍບາຍຂອງພັກ-ລະບຽບກົດໝາຍຂອງລັດ ໃຫ້ປະຊາຊົນລາວບັນດາເຜົ່າມີຄວາມເຂົ້າໃຈ, ເອົາໃຈໃສ່ເຕົ້າໂຮມຄວາມສາມັກຄີປະຊາຊົນລາວບັນດາເຜົ່າໃຫ້ເປັນອັນໜຶ່ງອັນດຽວ, ເສີມຂະຫຍາຍສິດເປັນເຈົ້າຂອງປະຊາຊົນ ແລະ ປົກປັກຮັກສາຮີດຄອງປະເພນີອັນດີງາມຂອງແຕ່ລະຊົນເຜົ່າ ແລະ ພ້ອມກັນເຂົ້າຮ່ວມສອງໜ້າທີ່ຍຸດສາດ ຄື: ປັກປັກຮັກສາ ແລະ ສ້າງສາພັດທະນາປະເທດຊາດ.

ຂ່າວ+ພາບ: ເຢ

ບກ: ແພງພັນ

info@lfnd.org.la | 021 213754 | (856-21) 453191