ສູນກາງແນວລາວສ້າງຊາດ

Lao Front For National Development

ສູນກາງແນວລາວສ້າງຊາດ ປາຖະກະຖາວັນກໍາມະກອນສາກົນ ຄົບຮອບ 131 ປີ

ໃນວັນທີ 28 ເມສາ 2017 ນີ້ ຢູ່ທີ່ສູນກາງແນວລາວສ້າງຊາດ ໄດ້ຈັດພິທີປາຖະກະຖາວັນກໍາມະກອນສາກົນ ຄົບຮອບ 131 ປີ ( 1 ພຶດສະພາ 1886 ຫາ 1 ພຶດສະພາ 2017 ) ໂດຍເປັນກຽດປາຖະກະຖາຂອງ ທ່ານ ວັນນາ ດວງພະຈັນ ຄະນະພັກ ຮອງປະທານສູນ ກາງສະຫະພັນກໍາມະບານລາວ

ເຂົ້າຮ່ວມໂດຍທ່ານ ນາງ ຄໍາຈັນ ພົມແສງສະຫວັນ ຄະນະປະຈໍາພັກ, ຮອງປະທານສູນກາງແນວລາວສ້າງຊາດ ມີບັນດາທ່ານຮອງປະທານສູນກາງແນວລາວສ້າງຊາດ, ບັນດາຫົວໜ້າກົມ, ຮອງຫົວໜ້າກົມ ຕະຫຼອດຮອດພະນັກງານ-ລັດຖະກອນ ເຂົ້າຮ່ວມ.


ທ່ານ ວັນນາ ດວງພະຈັນ ໄດ້ກ່າວເຖິງປະຫວັດຄວາມເປັນມາແຫ່ງການກໍາເນີດ, ການເຕີບໃຫຍ່ຂະຫຍາຍຕົວຂອງຊົນຊັ້ນກໍາມະກອນຊາວຜູ້ອອກແຮງງານ ແລະ ພາລະກໍາປະຫວັດສາດຂອງຂະບວນກໍາມະກອນສາກົນ ແລະ ກໍາມະກອນລາວ ທີ່ໂດດເດັ່ນໃນທ້າຍສັດຕະວັດທີ XVIII ຫາ ສັດຕະວັດທີ XIX. ຂະບວນການຕໍ່ສູ້ຂອງຊົນຊັ້ນກໍາມະກອນ, ຊາວຜູ້ອອກແຮງງານ ນັບມື້ນັບເຕີບໃຫຍ່ຂະຫຍາຍຕົວ ເພື່ອເລັ່ງທວງໃຫ້ຊົນຊັ້ນນາຍທຶນເອົາໃຈໃສ່ປະຕິບັດນະໂຍບາຍດ້ານຕ່າງໆຕໍ່ເຂົາເຈົ້າຢ່າງສົມເຫດສົມຜົນ, ເຊິ່ງຊົນຊັ້ນກໍາມະກອນ ແມ່ນຊົນຊັ້ນນໍາໜ້າແຫ່ງຍຸກສະໄໝຕິດພັນກັບພື້ນຖານການຜະລິດ, ເປັນຜູ້ມີຫົວຄິດປະດິດສ້າງ, ມີຄວາມຮູ້ຄວາມສາມາດພຽງພໍທີ່ຈະລົບລ້າງລະບອບນາຍທຶນທີ່ກົດຂີ່ຂຸດຮີດແຮງງານ, ຢ່າງບໍ່ຍຸຕິທໍາ ແລະ ສ້າງສັງຄົມໃໝ່ທີ່ກ້າວໜ້າສີວິໄລ ແລະ ຍຸຕິທໍາພາຍໃຕ້ການນໍາພາຂອງພັກຄອມມູນິດ ໂດຍຢຶດໝັ້ນລັດທິມາກ-ເລນີນ.

ສຳລັບກຳມະບານລາວ ແລະ ຊົນຊັ້ນກຳມະກອນລາວ ທ່ານຮອງປະທານສູນກາງກຳມະບານລາວ ໄດ້ເນັ້ນໃຫ້ເສີມຂະຫຍາຍທາດແທ້ ແລະ ມູນເຊື້ອອັນດີງາມຂອງກຳມະກອນລາວໃນໄລຍະໃໝ່, ເສີມຂະຫຍາຍສິດປະຊາທິປະໄຕ ເພີ່ມທະວີຄວາມສາມັກຄີໃນຖັນແຖວກໍາມະບານກໍາມະກອນຊາວຜູ້ອອກແຮງງານໃຫ້ເປັນປຶກແຜ່ນແໜ້ນໜ້າ ເປັນກໍາລັງແຮງໃນການຈັດຕັ້ງປະຕິບັດແນວທາງນະໂຍບາຍຂອງພັກ ຖືລັດທິມາກ-ເລນິນ ເປັນແນວຄິດທິດສະດີ, ເອົາທິດສະດີ ໄກສອນ ພົມວິຫານ ເປັນກົກໃນການສ້າງສາພັດທະນາປະເທດຊາດ, ສືບຕໍ່ປົກປ້ອງສິດ ແລະ ຜົນປະໂຫຍດຂອງຊາວຜູ້ອອກແຮງງານເພື່ອບໍ່ໃຫ້ເອົາລັດເອົາປຽບ ແລະ ເພີ່ມທະວີໃຫ້ອົງການກໍາມະບານ ປົກປ້ອງຜົນປະໂຫຍດຂອງກໍາມະກອນ.

ພ້ອມກັນນີ້, ທ່ານໄດ້ເນັ້ນໜັກໃຫ້ພະນັກງານຫຼັກແຫຼ່ງ, ກໍາມະກອນ ແລະ ຊາວຜູ້ອອກແຮງງານຈົ່ງກໍາໄດ້ເນື້ອໃນຈິດໃຈລວມຂອງວັນສໍາຄັນດັ່ງກ່າ ແລະ ເພີ່ມທະວີການຊີ້ນຳນຳພາຂອງຄະນະພັກຕໍ່ການຈັດຕັ້ງກຳມະບານ ເພື່ອພ້ອມກັນປະຕິບັດພາລະບົດບາດໃຫ້ສອດຄ່ອງ ແລະ ເພີ່ມສະຕິລະວັງຕົວ ເພື່ອບໍ່ໃຫ້ສັດຕູເຂົ້າມາແຊກແຊງພາຍໃນ ແນໃສ່ໃຫ້ມີຄວາມສະຫງົບສຸກ ແລະ ມີການພັດທະນາຂຶ້ນເລື່ອຍໆ.

info@lfnd.org.la | 021 213754 | (856-21) 453191