ສູນກາງແນວລາວສ້າງຊາດ

Lao Front For National Development

ສູນກາງແນວລາວສ້າງຊາດ ເຄື່ອນໄຫວຢ້ຽມຢາມ ແລະ ມອບເຄື່ອງຊ່ວຍເຫຼືອໃຫ້ປະຊາຊົນທີ່ປະສົບໄພນ້ຳຖ້ວມ ຢູ່ 2 ແຂວງພາກໃຕ້

ວັນທີ 12-14 ກັນຍາ 2019 ນີ້, ທ່ານ ນາງ ຄຳຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມ ຢູ່ບ້ານໜອງບົວໃຫຍ່ ແລະ ບ້ານໜອງບົວນ້ອຍ ເມືອງປະທຸມພອນ ແຂວງຈຳປາສັກ, ໂດຍໄດ້ຮັບການຕ້ອນຮັບຢ່າງອົບອຸ່ນຈາກ ທ່ານ ສີທົນ ແກ້ວພູວົງ ຄະນະປະຈໍາພັກແຂວງ, ປະທານແນວລາວສ້າງຊາດແຂວງຈໍາປາສັກ, ທ່ານ ຄຳເຜືອກ ທອງຄຳ ເລຂາພັກເມືອງ, ເຈົ້າເມືອງ ເມືອງປະທຸມພອນ ແລະ ພໍ່ແມ່ປະຊາຊົນທັງສອງບ້ານດັ່ງກ່າວ.

ໃນໂອກາດທີ່ ທ່ານ ຮອງປະທານສູນກາງແນວລາວສ້າງຊາດ ໄປຢ້ຽມຢາມປະຊາຊົນທີ່ໄດ້ຮັບຜົນກະທົບຈາກໄພທຳມະຊາດນ້ຳຖ້ວມ ໃນຄັ້ງນີ້, ທ່ານ ໄດ້ມອບເຄື່ອງອຸປະໂພກ-ບໍລິໂພກ, ຢາປິ່ນປົວພະຍາດ ຈຳນວນໜຶ່ງ ແລະ ເຂົ້າສານ ຈຳນວນ 6 ໂຕນ ໃຫ້ກັບປະຊາຊົນທັງສອງບ້ານ ລວມມູນຄ່າ 79 ລ້ານກວ່າກີບ ເພື່ອຊ່ວຍບັນເທົາທຸກ ໃຫ້ກັບປະຊາຊົນທີ່ໄດ້ຮັບຜົນກະທົບຈາກໄພທຳມະຊາດນ້ຳຖ້ວມ ໃນຄັ້ງນີ້.

ພ້ອມກັນນັ້ນ, ທ່ານ ນາງ ຄຳຈັນ ພົມແສງສະຫວັນ ພ້ອມດ້ວຍຄະນະ ກໍໄດ້ມອບ ເຂົ້າສານ ຈຳນວນ 16 ໂຕນ ແລະ ຢາປິ່ນປົວພະຍາດ ຈຳນວນໜຶ່ງ ລວມມູນຄ່າ 88,700,000 ກີບ ໃຫ້ແຂວງສະຫວັນນະເຂດ ເພື່ອໃຫ້ແຂວງນຳໄປມອບຕໍ່ ໃຫ້ກັບປະຊາຊົນ ຢູ່ບັນດາເມືອງພາຍໃນແຂວງ ທີ່ໄດ້ຮັບຜົນກະທົບຈາກໄພທຳມະຊາດນ້ຳຖ້ວມ ໃນຄັ້ງນີ້, ເປັນກຽດກ່າວຮັບໂດຍ ທ່ານ ຄຳພູນ ຕຸໄພທູນ ຄະນະປະຈຳພັກແຂວງ, ຮອງເຈົ້າແຂວງ ແຂວງສະຫັວນນະເຂດ ແລະ ທ່ານ ສົມເພັດ ອິນທະທິລາດ ຄະນະປະຈຳພັກແຂວງ, ປະທານແນວລາວສ້າງຊາດ ແຂວງສະຫວັນນະຂດ.

ທ່ານ ຮອງເຈົ້າແຂວງສະຫວັນນະເຂດ ແລະ ທ່ານ ສຸບັນ ສຸວັນໄຊ ເລຂາຄະນະພັກຮາກຖານກຸ່ມບ້ານ, ຮອງປະທານສະຫະພັນກຳມະບານ ເມືອງປະທຸມພອນ ແຂວງຈຳປາສັກ ໄດ້ຕາງໜ້າປະຊາຊົນ ກ່າວສະແດງຄວາມຂອບໃຈເປັນຢ່າງຍິ່ງ ຕໍ່ທ່ານ ຮອງປະທານສູນກາງແນວລາວສ້າງຊາດ ທີ່ໄດ້ນໍາເອົາເຄື່ອງຊ່ວຍເຫຼືອຈຳນວນດັ່ງກ່າວ ມາມອບໃຫ້ປະຊາຊົນທັງສອງແຂວງ ໃນຄັ້ງນີ້.

info@lfnd.org.la | 021 213754 | (856-21) 453191