ປະຕິບັດຕາມແຜນດໍາເນີນງານຂອງຄະນະພັກສູນກາງແນວລາວສ້າງຊາດ ສະໄໝທີ XI, ໃນລະຫວ່າງວັນທີ 31 ຕຸລາ ຫາ 6 ພະຈິກ 2022 ນີ້,

ທ່ານ ຄໍາເຜີຍ ບຸດດາວຽງ, ກໍາມະການສູນກາງພັກ, ຮອງປະທານຜູ້ປະຈໍາການສູນກາງແນວລາວສ້າງຊາດ ພ້ອມດ້ວຍຄະນະ ລົງເຄື່ອນໄຫວເຮັດວຽກຢູ່ແຂວງອັດຕະປື ເພື່ອຕິດຕາມຊຸກຍູ້ຫຼາຍວຽກທີ່ສໍາຄັນຂອງແນວລາວສ້າງຊາດ. ການລົງເຄື່ອນໄຫວໃນຄັ້ງນີ້, ທ່ານຮອງປະທານສູນກາງແນວລາວສ້າງຊາດ ໄດ້ມີຄໍາເຫັນຊຸກຍູ້ແນວລາວສ້າງຊາດແຂວງອັດຕະປື ເອົາໃຈໃສ່ຄົ້ນຄ້ວາຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງທີ XI ຂອງແນວລາວສ້າງຊາດ ໂດຍສະເພາະ 5 ແຜງານ 41 ໂຄງການ ແຕ່ນີ້ຮອດປີ 2026

ເພື່ອສ້າງຄວາມເຂັ້ມແຂງໃຫ້ແນວລາວສ້າງຊາດຂັ້ນຕ່າງໆ ຕາມທ່າແຮງ, ເງື່ອນໄຂ, ຄວາມສາມາດ ແລະ ຄວາມຮຽກຮ້ອງຕ້ອງການຕົວຈິງຢູ່ຮາກຖານ ໄປພ້ອມໆກັບວຽກງານປຸກລະດົມຂົນຂວາຍປະຊາຊົນບັນດາເຜົ່າ ແລະ ຊັ້ນຄົນຕ່າງໆ, ການພົວພັນຮ່ວມມືກັບຕ່າງປະເທດເພື່ອຍາດແຍ່ງການລົງທຶນ ແລະ ສ້າງຄວາມເຂັ້ມແຂງໃຫ້ຕົນເອງເທື່ອລະກ້າວ; ສໍາລັບວຽກງານຂະບວນການສ້າງຄອບຄົວ ແລະບ້ານສາມັກຄີປອງດອງເປັນວຽກງານຍຸດທະສາດອັນພື້ນຖານຂອງແນວລາວສ້າງຊາດພວກເຮົາ ແລະ ເປັນວຽກງານໃຈ ກາງຂອງອໍານາດການປົກຄອງທຸກຂັ້ນ ໂດຍຕິດພັນກັບຂະບວນການສ້າງບ້ານພັດທະນາ-ບ້ານພົ້ນທຸກຂອງລັດຖະບານ. ສະນັ້ນ ການສ້າງຄອບຄົວ ແລະ ບ້ານສາມັກຄີປອງດອງ ຕ້ອງມີຈຸດສຸມ, ບັນດາບ້ານທີ່ມີຄວາມຫຍຸ້ງຍາກ, ບ້ານທີ່ບໍ່ມີຄວາມສະຫງົບ, ຖືເອົາຄຸນນະພາບເປັນສໍາຄັນ.

ພ້ອມດຽວກັນນີ້, ໃຫ້ສືບຕໍ່ເອົາໃຈໃສ່ຈັດຕັ້ງປະຕິບັດສິດ-ພາລະບົດ ບາດຂອງແນວລາວສ້າງຊາດໃຫ້ເຂັ້ມແຂງ, ສາມາດປົກປ້ອງສິດ-ຜົນປະໂຫຍດອັນຊອບທໍາຂອງປະຊາຊົນບັນດາເຜົ່າຢ່າງແທ້ຈິງ ແລະ ສ້າງການສະໜັບສະໜູນຂອງປະຊາຊົນບັນດາເຜົ່າ-ຊັ້ນຄົນຕ່າງໆ ຕໍ່ແນວທາງນະໂຍບາຍຂອງພັກ-ລັດ ຢ່າງສະເໝີຕົ້ນສະເໝີປາຍ ໂດຍສະເພາະການຈັດຕັ້ງປະຕິບັດຂໍ້ກໍານົດ ເລກທີ 01 ຂອງຄະນະເລຂາທິການສູນກາງພັກ ວ່າດ້ວຍການຕິດຕາມກວດກາຂອງແນວລາວສ້າງຊາດ ແລະ ອົງການຈັດຕັ້ງມະຫາຊົນ ຕໍ່ອໍານາດລັດ, ກ່ອນອື່ນ ແນວລາວສ້າງຊາດຂັ້ນທ້ອງຖິ່ນຕ້ອງໝັ່ນລົງໃກ້ຊິດຕິດແທດກັບປະຊາຊົນ ແລະ ເກັບກໍາຄໍາຄິດຄໍາເຫັນ, ຄວາມຮຽກຮ້ອງຕ້ອງ ການ ແລະ ຫາງສຽງຂອງປະຊາຊົນບັນດາເຜົ່າ, ການເຄື່ອນໄຫວປະຕິບັດນ້າທີ່ຂອງສະມາຊິກສະພາແຫ່ງຊາດ ແລະ ສະ ມາຊິກສະພາທ້ອງຖິ່ນ ເພື່ອສ່ອງແສງລາຍງານ ແລະ ປະກອບຄໍາຄິດຄໍາເຫັນຕໍ່ກອງປະຊຸມສະພາທ້ອງຖິ່ນ, ແຕ່ການຕິດ ຕາມກວດກາຂອງແນວລາວສ້າງຊາດ ແລະ ອົງການຈັດຕັ້ງມະຫາຊົນ ບໍ່ແມ່ນການເອົາຜິດເອົາຖືກປະການໃດ, ເມື່ອກວດກາພົບເຫັນແລ້ວສ່ອງແສງລາຍງານໃຫ້ພາກສ່ວນທີ່ກ່ຽວຂ້ອງລົງເລິກກວດກາ ແລະ ແກ້ໄຂ.

ໃນໂອກາດດັ່ງກ່າວ, ທ່ານ ຮອງປະທານສູນກາງແນວລາວສ້າງຊາດ ຍັງໄດ້ລົງໄປພົບປະຢ້ຽມຢາມປະຊາຊົນບັນ ດາເຜົ່າຢູ່ເຂດຈຸດສຸມບ້ານຄໍາວົງສາ, ບ້ານນາເຊືອກ, ເມືອງພູວົງ, ແຂວງອັດຕະປື ເພື່ອເບິ່ງຄວາມສຸກ-ທຸກ, ຮັບຟັງຄໍາຄິດຄໍາເຫັນ, ຄໍາສະເໜີຕ່າງໆ ແລະ ມີແນວຄິດຈິດໃຈແນວໃດ ຕໍ່ສະພາບທີ່ປະເທດຂອງພວກເຮົາພວມປະເຊີນໜ້າກັບສິ່ງທ້າທາຍດ້ານເສດຖະກິດ-ການເງິນ, ອັດຕາເງິນເຟີ້, ຄ່າຄອງຊີບສູງ, ບັນຫານໍ້າເຊື້ອໄຟແພງ ແລະ ບັນຫາຕ່າງໆໃນສັງຄົມ. ພ້ອມກັນນີ້ ທ່ານ ໄດ້ມີຄໍາເຫັນໂອ້ລົມປະຊາຊົນບັນດາເຜົ່າໃຫ້ມີແນວຄິດອຸ່ນອຽນທຸນທ່ຽງ ແລະ ເຊື່ອໝັ້ນແນວທາງນະໂຍບາຍຂອງພັກ-ລັດ, ຮຽກຮ້ອງມາຍັງອໍານາດການປົກຄອງການຈັດຕັ້ງບ້ານ ໂດຍສະເພາະເລຂາໜ່ວຍພັກ-ນາຍບ້ານ, ແນວໂຮມ, ອົງການ ຈັດຕັ້ງມະຫາຊົນ ແລະ ຜູ້ຊົງຄຸນວຸດທິພາຍໃນບ້ານ ຕ້ອງເພີ່ມທະວີການເຮັດວຽກງານປຸກລະດົມຂົນຂວາຍ, ສຶກສາອົບຮົມ, ເຕົ້າໂຮມຄວາມສາມັກຄີຂອງປະຊາຊົນບັນດາເຜົ່າ, ເສີມຂະຫຍາຍນໍ້າໃຈຮັກຊາດ, ຮັກບ້ານເກີດເມືອງນອນຢ່າງດູດດື່ມ. ພ້ອມນີ້, ເອົາໃຈໃສ່ຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ, ສ້າງທ່າສະໜາມສົງຄາມປະຊາຊົນເພື່ອພ້ອມກັນຊອກທາງອອກ, ຊອກທາງແກ້ໄຂບັນຫາຄວາມຫຍຸ້ງຍາກຕ່າງໆ ໂດຍເລີ່ມຈາກຫົວໜ່ວຍຄອບຄົວ; ເອົາໃຈໃສ່ຄຸ້ມຄອງ, ສຶກສາອົບຮົມລູກຫຼານຂອງຕົນໃຫ້ເປັນພົນລະເມືອງດີ, ບໍ່ໃຫ້ຕົກໃນກຸນອຸບາຍທໍາລາຍມ້າງເພຂອງກຸ່ມຄົນບໍ່ດີ ແລະ ໄພສັງຄົມອື່ນໆ ເຊັ່ນ: ບັນຫາຢາເສບຕິດ, ບັນຫາຂີ້ລັກງັດແງະ, ການຄ້າຂາຍເຖື່ອນ ໂດຍສະເພາະເອົາໃຈໃສ່ຕໍ່ການພົວພັນຮ່ວມມືເສີມສ້າງຊາຍແດນມິດຕະພາບ, ສັນຕິພາບ ແລະ ການຮ່ວມມືທີ່ດີກັບປະເທດເພື່ອນບ້ານ, ບໍ່ໃຫ້ເກີດມີບັນຫາຢ່າງເດັດຂາດ ພ້ອມກັນນີ້, ຄະນະໄດ້ພົບປະກັບແນວລາວສ້າງຊາດແຂວງ ແລະ ໄດ້ຢ້ຽມຢາມໂຮງງານຜະລິດ ນໍ້າຕານ ທີທີຊີ ຕື່ມອີກ.