ສູນກາງແນວລາວສ້າງຊາດ

Lao Front For National Development

ສູນກາງແນວລາວສ້າງຊາດ ແລະ ບໍລິສັດ ບົວລະພາ ກະສິກໍາ- ປ່າໄມ້ ຈໍາກັດ ຮ່ວມມື ແກ້ໄຂຄວາມທຸກຍາກ ຂອງປະຊາຊົນບັນດາເຜົ່າ

ພິທີເຊັນບົດບັນທຶກຊ່ວຍຈໍາ ລະຫວ່າງ ສູນກາງແນວລາວສ້າງຊາດ ແລະ ບໍລິສັດ ບົວລະພາ ກະສິກໍາ-ປ່າໄມ້ ຈໍາກັດ ກ່ຽວກັນການຮ່ວມມືຈັດຕັ້ງປະຕິບັດໂຄງການ “ສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກຂອງປະຊາຊົນບັນດາເຜົ່າ” ໂດຍມີພາກສ່ວນທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມເປັນສັກຂີພິຍານ ທີ່ ສູນກາງແນວລາວສ້າງຊາດ ວັນທີ 14 ສິງຫານີ້.

ພິທີເຊັນບົດບັນທຶກຄັ້ງນີ້ ໂດຍມີ ທ່ານ ຮສ ດຣ. ສົມອົກ ກິ່ງສະດາ ຮອງປະທານ ສູນກາງແນວລາວສ້າງຊາດ, ທ່ານ ມາຕິນ ຟໍແຊນ ອໍານວຍການບໍລິສັດ ບົວລະພາ ກະສິກໍາ-ປ່າໄມ້ ຈໍາກັດ ຮ່ວມລົງນາມໃນບົດບັນທຶກດັ່ງກ່າວ.

ການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ ແມ່ນໜຶ່ງໃນມາດຕະຖານສ້າງຄອບຄົວ ແລະ ບ້ານພັດທະນາຂອງລັດຖະບານ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ ຕາມທິດ 3 ສ້າງ; ການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກຂອງປະຊາຊົນບັນດາເຜົ່າ ແມ່ນການຈັດ ຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມ ຄັ້ງທີ VIII ແລະ ມະຕິກອງປະ ຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງແນວລາວສ້າງຊາດ ລົງສູ່ທ້ອງຖິ່ນຮາກຖານຕົວຈິງ; ເປັນການປຸກລະດົມກໍາລັງແຮງທົ່ວປວງຊົນ ເຂົ້າຮ່ວມຈັດຕັ້ງປະຕິບັດສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ; ເພີ່ມທະວີຄວາມສາມັກຄີ, ຄວາມເປັນເອກະພາບຂອງປະຊາຊົນບັນດາເຜົ່າ ເຂົ້າໃນການແກ້ໄຂຄວາມທຸກຍາກ ໂດຍເລີ່ມຈາກຄອບຄົວ ແລະ ຮາກຖານບ້ານ ເຊິ່ງແມ່ນມູນເຊື້ອ ແລະ ເປັນປັດໄຈສໍາຄັນໃນການສ້າງສະຖຽນລະພາບ, ຄວາມສະຫງົບ ແລະ ຄວາມມັ່ງຄັ່ງ ເຂັ້ມແຂງຂອງປະເທດ.

ຍ້ອນເຫັນໄດ້ຄວາມສໍາຄັນຂອງວຽກງານດັ່ງກ່າວ, ສູນກາງແນວລາວສ້າງຊາດ ແລະ ບໍລິສັດ ບົວລະພາ ກະສິກໍາ-ປ່າ ໄມ້ ຈໍາກັດ ຈຶ່ງໄດ້ປຶກສາຫາລື ແລະ ຕົກລົງເອກະພາບທາງດ້ານຫຼັກການຮ່ວມມືກັນ ເພື່ອຈັດຕັ້ງປະຕິບັດໂຄງການ “ສ້າງຄອບຄົວ ແລະ ບ້ານສາມັກຄີປອງດອງຕິດພັນກັບການແກ້ໄຂຄວາມທຸກຍາກ ຂອງປະຊາຊົນບັນດາເຜົ່າ”, ໂດຍສຸມໃສ່ການປູູໄມ້ອຸດສາຫະກໍາປັນຕົ້ນຕໍ ເພື່ອເປັນສິນຄ້າ ທັງເປັນການປະຕິບັດນະໂຍບາຍຂອງພັກ ວ່າດ້ວຍການປົກຫຸ້ມປ່າໄມ້ໃຫ້ໄດ້ 70% ໃນປີ 2020 ເຊິ່ງເນື້ອໃນການຮ່ວມມືລະອຽດມີ:

ສອງຝ່າຍ ຈະຮ່ວມກັນສ້າງເປັນໂຄງການສ້າງຄອບຄົວ ແລະ ບ້ານສາມັກຄືປອງດອງ ໂດຍເອົາການປູກໄມ້ ອຸດສາຫະກໍາ ເປັນສິນຄ້າ ເພື່ອແກ້ໄຂຄວາມທຸກຍາກຂອງປະຊາຊົນບັນດາເຜົ່າ.
ສອງຝ່າຍ ຈະຮ່ວມສ້າງແຜນດໍາເນີນງານ, ບົດສະເໜີໂຄງການ ແລະ ຈັດຕັ້ງປະຕິບັດໂຄງການ ສ້າງຄອບຄົວແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກ ເຊິ່ງທີ່ຕັ້ງຂອງໂຄງການແມ່ນ ກໍານົດເອົາບັນດາແຂວງພາກກາງເຊັ່ນ: ນະຄອນຫຼວງວຽງຈັນ, ແຂວງ ວຽງຈັນ, ແຂວງ ໄຊຍະບູລີ ແລະ ແຂວງ ໄຊສົມບູນ ໂດຍກໍານົດເອົາບາງເມືອງ ແລະ ບາງບ້ານ ຕາມເງື່ອນໄຂຕົວຈິງ ໄລຍະເວລາ 03 ປີ ( 2018-2020)
ສອງຝ່າຍຈະແຕ່ງຕັ້ງຄະນະຊີ້ນໍາ ແລະ ຄະນະຮັບຜິດຊອບປະຕິບັດງານຮ່ວມກັນ ເພື່ອວາງໂຄງການ ກິດຈະກໍາການ ຈັດຕັ້ງປະຕິບັດ, ຕິດຕາມກວດກາ ແລະ ປະເມີນຜົນໂຄງການໃນແຕ່ລະໄລຍະ.
ສອງຝ່າຍ ຈະຮ່ວມມືແລກປ່ຽນຂໍ້ມູນຂ່າວສານ, ຄົ້ນຄວ້າ, ວິເຄາະ-ວິໄຈທາງດ້ານວິຊາການໃນວຽກງານດັ່ງກ່າວເພື່ອເຫັນໄດ້ທາງດ້ານທ່າແຮງ ແລະ ສິ່ງທ້າທາຍ ນັບທັງຂໍ້ສະດວກ, ຂໍ້ຫຍຸ້ງຍາກ ແລະ ບົດຮຽນທີ່ສາມາດຖອດຖອນໄດ້ຈາກພຶດຕິກໍາຕົວຈິງ
ສອງຝ່າຍ ຕົກລົງ ແບ່ງຄວາມຮັບຜິດຊອບລະຫວ່າງ ສູນກາງແນວລາວສ້າງຊາດ ແລະ ບໍລິສັດ ບົວລະພາ ກະສິກໍາ-ປ່າໄມ້ ຈໍາກັດ.
ຄະນະຮັບຜິດຊອບ ທີ່ໄດ້ຮັບການແຕ່ງຕັ້ງຂອງສອງຝ່າຍ ຕ້ອງສ້າງກົນໄກການພົວພັນຮ່ວມມືສອງຝ່າຍ ຫຼື ຫຼາຍຝ່າຍໃນໄລຍະສັ້ນ ແລະ ໄລຍະຍາວ ເພື່ອສະເໜີຜ່ານການຮັບຮອງຂອງສອງຝ່າຍໃນແຕ່ລະໄລຍະ
ສັນຍາສະບັບນີ້ ມີຜົນບັງຄັບໃຊ້ໃນໄລຍະ 03 ປີ (2018-2020)

info@lfnd.org.la | 021 213754 | (856-21) 453191