ໃນວັນທີ 11 ກັນຍາ 2024 ນີ້ ສູນກາງແນວລາວສ້າງຊາດ ໄດ້ຮັບເງິນຊ່ວຍເຫຼືອຜູ້ປະສົບໄພທຳມະຊາດນ້ຳຖ້ວມໃຫ້ບັນດາແຂວງພາກເໜືອ ລວມທັງໝົດເປັນຈຳນວນ 240 ກວ່າລ້ານກີບ, ກ່າວມອບໂດຍພະອາຈານໃຫຍ່ ມາຫາບຸນມາ ສິມມາພົມ ປະທານສູນກາງອົງການພຸດທະສາສະໜາ ສຳພັນລາວ ແລະ ກ່າວຮັບໂດຍທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ, ມີຄະນະສົງ-ສຳມະເນນ ແລະ ສັດທາຜູ້ໃຈບຸນທັງຫຼາຍ ເຂົ້າຮ່ວມ.

ເງິນຈຳນວນດັ່ງກ່າວ, ໄດ້ມາຈາກການປຸກລະດົມສັງຄົມ, ບໍລິສັດ-ຫ້າງຮ້ານ, ບຸກຄົນ-ນິຕິບຸນຄົນ ທີ່ມີນ້ຳໃຈສັດທາ ປະກອບສ່ວນບໍລິຈາກປັດໄຈ ເພື່ອຊ່ວຍເຫຼືອປະຊາຊົນທີ່ປະສົບໄພທຳມະຊາດນ້ຳຖ້ວມ ຢູ່ບັນດາແຂວງພາກເໜືອຂອງລາວເຮົາ ໃນໄລຍະຜ່ານມາ.

ທ່ານ ປະທານ ສູນກາງແນວລາວສ້າງຊາດ ໄດ້ສະແດງຄວາມຍ້ອງຍໍຊົມເຊີຍ ແລະ ຂອບໃຈເປັນຢ່າງຍິ່ງ ຕໍ່ອົງການພຸດທະສາສະໜາສຳພັນລາວ ແລະ ຜູ້ທີ່ໄດ້ປະກອບສ່ວນສົມທົບເງິນມາມອບໃຫ້ສູນກາງແນວລາວສ້າງຊາດ ໃນຄັ້ງນີ້ ຊິ່ງເງິນຈຳນວນດັ່ງກ່າວສູນກາງແນວລາວສ້າງຊາດ ຈະເອົາໄປຈັດຊື້ເຄື່ອງອຸປະໂພກ ແລະ ບໍລິໂພກ ເພື່ອນຳໄປຊ່ວຍເຫຼືອໃຫ້ປະຊາຊົນຜູ້ທີ່ຖືກປະສົບໄພທຳມະຊາດ ນ້ຳຖ້ວມຢູ່ບັນດາແຂວງພາກເໜືອ.

ຂ່າວ+ພາບ: ຢຢ

ບກ: ສືເຊັ່ງ