ສູນກາງແນວລາວສ້າງຊາດ

Lao Front For National Development

ສ້າງຄວາມເຂັ້ມແຂງວຽກງານຂົນຂວາຍປະຊາຊົນ ໃຫ້ພະນັກງານຫຼັກແຫຼ່ງແນວລາວສ້າງຊາດ ແລະ ກະຊວງ-ອົງການທີ່ກ່ຽວຂ້ອງ

ວັນທີ 4 ມິຖຸນາ 2108, ຄະນະກຳມະການ ສູນກາງແນວລາວສ້າງຊາດ ຮ່ວມກັບ ຄະນະຂົນຂວາຍປະຊາຊົນສູນກາງພັກກອມ ມູນິດ ຫວຽດນາມ ໄດ້ຈັດກອງປະຊຸມຝຶກອົບຮົມວຽກງານຂົນຂວາຍປະຊາຊົນ ໃຫ້ພະນັກງານຫຼັກແຫຼ່ງ ແນວລາວສ້າງຊາດ ແລະ ກະຊວງ-ອົງການ ທີ່ກ່ຽວຂ້ອງ.

ໂດຍການເປັນປະທານຮ່ວມຂອງທ່ານ ນາງ ຄຳຈັນ ພົມແສງສະຫວັນ ຄະນະປະຈຳພັກ, ຮອງປະ ທານ ສນຊ ແລະ ທ່ານ ຮ່າ ຫງອກ ແອງ ຮອງຫົວໜ້າຄະນະຂົນຂວາຍປະຊາຊົນສູນກາງພັກກອມມຸນິດ ຫວຽດນາມ, ມີບັນດາທ່ານ ຮອງປະທານ ສນຊ, ຄະ ນະນຳກະຊວງ-ອົງການທີ່ກ່ຽວຂ້ອງ, ອົງການພາຄີຂອງແນວລາວສ້າງຊາດ, ຄະນະວິທະຍາກອນຈາກ ສສ ຫວຽດນາມ, ຄະນະທີ່ປຶກສາຂອງ ສນຊ, ຫົວໜ້າກົມ, ຫົວໜ້າຫ້ອງການ, ຫົວໜ້າສູນຝຶກອົບຮົມ ແລະ ພະນັກງານວິ ຊາການທີ່ກ່ຽວຂ້ອງພາຍໃນ ສນຊ; ບັນດາທ່ານ ຮອງປະທານ ແລະ ຫົວໜ້າຂະແໜງໂຄສະນາແນວລາວສ້າງຊາດແຂວງ-ນະ ຄອນຫຼວງ ໃນຂອບເຂດທົ່ວປະ ເທດເຂົ້າຮ່ວມ ທັງໝົດຈຳນວນ 100 ກວ່າທ່ານ

ທ່ານ ຮອງປະທານ ສນຊ ໄດ້ກ່າວວ່າວຽກງານຂົນຂວາຍປະຊາຊົນແມ່ນວຽກງານໜຶ່ງທີ່ສຳຄັນ ໃນການປຸກລະດົມ, ເຕົ້າໂຮມຄວາມສາມັກຄີປະຊາຊົນບັນດາເຜົ່າໃຫ້ນັບມື້ແໜ້ນແຟ້ນ, ປະຕິບັດແນວທາງນະໂຍບາຍຂອງພັກ-ລະບຽບກົດໝາຍຂອງລັດ ແລະເຂົ້າຮ່ວມພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ. ພ້ອມກັນນີ້, ທ່ານຍັງໄດ້ຮຽກຮ້ອງໃຫ້ບັນດາທ່ານຜູ້ແທນກອງປະຊຸມ ຈົ່ງຍົກສູງຄວາມຮັບຜິດຊອບໃນການຮັບຟັງ ພ້ອມທັງປະກອບຄຳຄິດຄຳເຫັນ ຍາດແຍ່ງເອົາຄວາມຮູ້ບົດຮຽນດ້ານທິດສະດີ, ພຶດຕິກຳຕົວຈິງຈາກບັນດາທ່ານ ວິທະຍາກອນ ທີ່ມາຈາກ ສສ ຫວຽດນາມ ໃນຊ່ວງໄລຍະເວລາຂອງການຝຶກອົບຮົມ ເພື່ອສາມາດກຳແໜ້ນເນື້ອໃນຈິດໃຈຂອງກອງປະຊຸມ ແລະ ນຳໄປໝູນໃຊ້ເຂົ້າໃນວຽກງານ ແນວລາວສ້າງຊາດ, ອົງການຈັດຕັ້ງມະຫາຊົນ ແລະ ພາກສ່ວນທີ່ກ່ຽວຂ້ອງ ໃຫ້ໄດ້ຮັບໝາກຜົນ.

ກອງປະຊຸມຄັ້ງນີ້ ແມ່ນເປັນຄັ້ງທຳອິດ ພາຍຫຼັງທັງສອງຝ່າຍໄດ້ເຊັນຂໍ້ຕົກລົງການຮ່ວມມືແຕ່ເດືອນ 11 ປີ 2016 ແລະ ຈະ ດໍາເນີນໄປເປັນເວລາ 3 ວັນ (4-6 ມິຖຸນາ 2018) ເຊິ່ງຈະໄດ້ຮຽນຮູ້ບາງຫົວຂໍ້ທີ່ສໍາຄັນຄື: ວຽກງານຂົນຂວາຍພັກ, ອົງການປົກຄອງ, ເສີມຂະຫຍາຍສິດເປັນເຈົ້າຂອງປະຊາຊົນ ແລະ ປະຕິບັດລະບອບປະຊາທິປະໄຕຢູ່ຮາກຖານ; ແຜນນະໂຍບາຍຂອງພັກ-ລັດ ແລະ ວຽກງານຂົນຂວາຍຄົນຫວຽດນາມຢູ່ຕ່າງປະເທດ, ວຽກງານຂົນຂວາຍຂອງແນວໂຮມປະເທດຊາດຫວຽດນາມ ແລະ ອົງການຈັດຕັ້ງມະຫາຊົນຂອງຫວຽດນາມ, ວຽກງານສາສະໜາ ແລະ ການຄຸ້ມຄອງລັດກ່ຽວກັບສາສະໜາ; ແລກປ່ຽນບົດຮຽນກ່ຽວກັບວຽກງານຂົນຂວາຍປະຊາຊົນ, ວຽກງານຊົນເຜົ່າ ແລະ ນະໂຍບາຍຕໍ່ຊົນເຜົ່າຂອງພັກ-ລັດຖະບານຫວຽດ ນາມ.

info@lfnd.org.la | 021 213754 | (856-21) 453191