ສູນກາງແນວລາວສ້າງຊາດ

Lao Front For National Development

ສ້າງຄວາມເຂັ້ມແຂງໃຫ້ແກ່ຄະນະກຳມະທິການ ເຜີຍແຜ່ສີລະທຳ ແລະ ປະຕິບັດກຳມະຖານ ສູນກາງ

ອົງການພຸດທະສາສະໜາສຳພັນລາວ (ອພສ) ຈັດພິທີຝຶກອົບຮົມການສ້າງຄວາມເຂັ້ມແຂງໃຫ້ແກ່ຄະນະກຳມະທິການ ເຜີຍແຜ່ສີລະທຳ ແລະ ປະຕິບັດກຳມະຖານ ສູນກາງ ຂຶ້ນໃນລະຫວ່າງວັນທີ 5-9 ມີນາ 2018, ໂດຍການເປັນປະທານຂອງ ພະອາຈານໃຫຍ່ ປອ. ມະຫາເຫວດ ມະເສໄນ ຮອງປະທານສູນກາງ ອພສ, ມີທ່ານ ຈັນທະວົງ ແສນອາມາດມົນຕີ ຮອງປະທານສູນກາງແນວລາວວສ້າງຊາດ, ມີບັນດາພະອາຈານ, ຄູບາ ແລະ ສາມະເນນ ມາຈາກນະຄອນຫຼວງວຽງຈັນ ເຂົ້າຮ່ວມທັງໝົດ 46 ອົງ;

ການຝຶກອົບຮົມໃນຄັ້ງນີ້, ໄດ້ຮັບຟັງບາງເນື້ອໃນທີ່ສຳຄັນຄື: ມູນເຊື້ອການເຕີບໃຫຍ່ຂະຫຍາຍຕົວຂອງພັກປະຊາຊົນປະຕິວັດລາວ, ເຊື່ອມຊຶມມະຕິກອງປະຊຸມໃຫຍ່ ຄັ້ງທີ X ຂອງພັກ, ຄາດໝາຍຕົ້ນຕໍທີ່ຕ້ອງກຳແໜ້ນໃນຕໍ່ໜ້າ (2016-2020) ເພື່ອສູ້ຊົນນໍາພາປະເທດຊາດຫຼຸດພົ້ນອອກຈາກສະຖານະພາບດ້ອຍພັດທະນາໃນປີ 2020; ຄວາມເປັນມາ ແລະ ເນື້ອໃນຂອງລະບອບປະຊາທິປະໄຕປະຊາຊົນ, ອົງການອຳນາດລັດ; ບົດບາດຄວາມເຊື່ອຖືສາສະໜາຂອງສັງຄົມລາວ, ການເພີ່ມທະວີສະຕິລະວັງຕົວຕໍ່ກົມອຸ ບາຍຂອງອິດທິກຳລັງປໍລະປັກໃນການສວຍໃຊ້ວຽກງານສາສະໜາ ເພື່ອທຳລາຍຄວາມສາມັກຄີຂອງປະຊາຊົນ; ຄວາມສຳນຶກກ່ຽວກັບຊົນຊາດ, ຊົນເຜົ່າ, ສາສະໜາ ໃນການປະຕິວັດປະຊາທິປະໄຕປະຊາຊົນລາວ, ຮູບແບບວິທີການເຮັດວຽກ, ກົນໄກໃນການປະສານສົມທົບ ແລະ ວຽກງານບໍ່ລິຫານບຸກຄະລາກອນ. ພ້ອມກັນນີ້, ນັກສໍາມະນາກອນ ກໍໄດ້ມີການປະກອບຄໍາຄິດຄໍາເຫັນ ເພື່ອແລກປ່ຽນບົດຮຽນຢ່າງກົງໄປກົງມາຕໍ່ກັບບັນຫາເນື້ອໃນດັ່ງກ່າວ;

ທ່ານ ຮອງປະທານ ສນຊ ເປັນກຽດໂອ້ລົມຕໍ່ກອງປະຊຸມ ເຊິ່ງໄດ້ເນັ້ນຫຼາຍບັນຫາດັ່ງນີ້: ນອກຈາກຮຽນຮູ້ຫຼັກສິນທຳແລ້ວຕ້ອງຮຽນຮູ້ເຖິງສັງຄົມອີກ, ໃຫ້ບັນດານັກສໍາມະນາກອນທີ່ໄດ້ເຂົ້ຮ່ວມພ້ອມກັນເອົາໃຈ ໃສ່ຄົ້ນຄວ້າ, ຍົກລະດັບຄວາມຮູ້, ຄວາມສາມາດ ເພື່ອກຳແໜ້ນເນື້ອໃນຈິດໃຈຂອງກອງປະຊຸມດັ່ງກ່າວ, ເປັນນັກປົກປັກຮັກສາ ແລະ ສ້າງຊາດພັດທະນາປະເທດຊາດ, ປົກປັກຮັກສາພຸດທະສາສະໜາຂອງປະ ເທດເຮົາ, ສືບຕໍ່ນໍາເອົາບົດຮຽນນີ້ໄປເຜີຍແຜ່ສູ່ທ້ອງຖິ່ນຮາກຖານໃນຂອບເຂດຄວາມຮັບຜິດຊອບຂອງຕົນ ໃຫ້ໄດ້ຮັບເກີດດອກຜົນຕາມລະດັບຄາດໝາຍ.

info@lfnd.org.la | 021 213754 | (856-21) 453191