ສູນກາງແນວລາວສ້າງຊາດ

Lao Front For National Development

ຫ້ອງວ່າການລັດຖະບານ ລະນຶກ ວັນສ້າງຕັ້ງ ແນວລາວສ້າງຊາດ ຄົບຮອບ 65 ປີ.

ໃນຕອນເຊົ້າ ຂອງວັນທີ 11 ສິງຫານີ້, ຢູ່ຫ້ອງວ່າການ ລັດຖະບານ ໄດ້ຈັດພິທີ ເຜີຍແຜ່ ປະຫວັດ ແລະ ມູນເຊື້ອ ອັນສະຫງ່າລາສີ ຂອງແນວລາວສ້າງຊາດ ເນື່ອງໃນໂອກາດ ວັນສ້າງຕັ້ງ ແນວລາວສ້າງຊາດ ຄົບຮອບ 65 ປີ (13/8/1950-13/8/2015) ຂຶ້ນ, ພາຍໃຕ້ການເປັນປະທານ ແລະ ໃຫ້ກຽດ ເຜີຍແຜ່ ໂດຍແມ່ນ ສະຫາຍ ເພັດສາຄອນ ຫຼວງອາໄພ ຮອງເລຂາຄະນະພັກcc,

ລັດຖະມົນຕີຊ່ວຍວ່າການ, ຮອງຫົວໜ້າຫ້ອງວ່າການລັດຖະບານ ໂດຍມີບັນດາຫົວໜ້າກົມ-ຮອງກົມ, ຫົວໜ້າ-ຮອງຫົວໜ້າຫ້ອງການ, ຫົວໜ້າ-ຮອງຫົວໜ້າພະແນກ ແລະ ສະມາຊິກພັກ ພາຍໃນຫ້ອງວ່າການ ລັດຖະບານ ເຂົ້າຮ່ວມຮັບຟັງຢ່າງພ້ອມພຽງ.
ໃນໂອກາດນີ້, ສະຫາຍ ປະທານ ກອງປະຊຸມ ໄດ້ຍົກໃຫ້ເຫັນ ເຖິງ ປະຫວັດມູນເຊື້ອ ແຫ່ງການກຳເນີດ, ເຕີບໃຫຍ່ ຂະຫຍາຍຕົວ ຂອງແນວລາວສ້າງຊາດ ໂດຍເລີ່ມແຕ່ ໄລຍະສ້າງຕັ້ງ ເປັນແນວລາວ ອິດສະຫຼະ ໃນວັນທີ 13 ສິງຫາ 1950 ແລະ ໄດ້ປ່ຽນຊື່ ມາເປັນແນວລາວຮັກຊາດ ໃນປີ 1956. ມາຮອດວັນທີ 16-20 ກຸມພາ 1979 ຄະນະກໍາມະການ ສູນກາງແນວລາວຮັກຊາດ ໄດ້ຮຽກຮ້ອງ ແລະ ໄຂກອງປະຊຸມໃຫຍ່ ແນວລາວຮັກຊາດ ສະໄໝທີ IV ຂຶ້ນຢູ່ທີ່ ສະໂມສອນໜອງບອນ, ນະຄອນຫຼວງວຽງຈັນ, ກອງປະຊຸມ ໄດ້ມີມະຕິປ່ຽນຊື່ ແນວລາວຮັກຊາດ ມາເປັນແນວລາວສ້າງຊາດ ຈົນເຖິງປະຈຸບັນ, ຕະຫຼອດໄລຍະ 65 ປີ ຍາມໃດ ແນວລາວສ້າງຊາດ ກໍ່ໄດ້ຍົກສູງບົດບາດ ໃນການເປັນຂົວຕໍ່ທີ່ດີ ລະຫວ່າງ ມະຫາຊົນ ກັບພັກ ແລະ ລະຫວ່າງ ປະຊາຊົນ ກັບລັດ ທັງເຮັດໜ້າທີ່ ເຕົ້າໂຮມ ກ້ອນກໍາລັງ ສາມັກຄີ ປອງດອງ ທົ່ວປະເທດ, ໂຄສະນາ-ສຶກສາອົບຮົມ ປະຊາຊົນລາວ ບັນດາເຜົ່າ ຢ່າງກວ້າງຂວາງ ເພື່ອປະຕິບັດ 2 ໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ; ໂດຍສະເພາະ ໃນໄລຍະໃໝ່ ຕ້ອງໄດ້ປະຕິບັດ ແນວທາງປ່ຽນແປງໃໝ່ ຢ່າງຮອບດ້ານ ແລະ ມີຫຼັກການ ຂອງພັກ, ປຸກລະດົມ ຂະບວນການ ແກ້ໄຂ ຄວາມທຸກຍາກ, ຫັນລົງ ກໍ່ສ້າງ ຮາກຖານ ການເມືອງ ຕິດພັນ ກັບ ການ ພັດທະນ ຊົນນະບົດ ຮອບດ້ານ, ສ້າງກຸ່ມບ້ານ ພັດທະນາ, ຍູ້ແຮງວຽກງານ 3 ສ້າງ, ຊຶ່ງໄດ້ ປະກອບສ່ວນ ອັນສໍາຄັນ ໃຫ້ແກ່ ການຫຼຸດຜ່ອນ ຄວາມທຸກຍາກ ຂອງປະຊາຊົນ ບັນດາເຜົ່າ ເທື່ອລະກ້າວ ແລະ ສ້າງເງື່ອນໄຂ ໃຫ້ແກ່ການນໍາພາ ປະເທດຊາດ ຫຼຸດພົ້ນ ສະຖານະພາບ ປະເທດດ້ອຍພັດທະນາ ໃນປີ 2020.
ໃນຕອນທ້າຍ ຂອງກອງປະຊຸມ ສະຫາຍ ປະທານກອງປະຊຸມ ຈິ່ງໄດ້ຮຽກຮ້ອງ ໃຫ້ບັນດາສະຫາຍ ຜູ້ເຂົ້າຮ່ວມ ກອງປະຊຸມ ເອົາໃຈໃສ່ ເສີມຂະຫຍາຍ ມູນເຊື້ອ ຂອງແນວລາວສ້າງຊາດ ເຂົ້າໃນການ ເຄື່ອນໄຫວ ພາລະກິດປົກປັກຮັກສາ ແລະ ສ້າງສາ ປະເທດຊາດ ເປັນຕົ້ນ: ເພີ່ມທະວີ ກ້ອນກຳລັງມະຫາສາມັກຄີ ທົ່ວປວງຊົນ ຢ່າງແໜ້ນແໜ້ນ ບົນພື້ນຖານ ຄວາມສາມັກຄີ
ເປັນເອກະພາບ ໃນອຸດົມການ ແຫ່ງການ ສ້າງປະເທດຊາດ ໃຫ້ມັ່ງຄັ່ງ ເຂັ້ມແຂງ, ປະຊາຊົນ ຮັ່ງມີຜາສຸກ ແລະ ສັງຄົມ ມີຄວາມສີວິໄລ ແລະ ຍຸຕິທໍາ, ຖືເອົາ ຄວາມສາມັກຄີ ເປັນອັນໜຶ່ງອັນດຽວ ທົ່ວປວງຊົນ ເປັນປັດໄຈ ຕັດສິນການຄົງຕົວ ແລະ ຂະຫຍາຍຕົວ ຂອງຊາດ; ປຸກລະດົມ ກຳລັງແຮງ ຂອງປະຊາຊົນ ທຸກຊົນເຜົ່າ, ທຸກຊັ້ນຄົນ, ສາສະໜາ ແລະ ເພດໄວ ເຂົ້າຮ່ວມ ໃນທຸກຂະແໜງ ວຽກງານ ແຫ່ງການພັດທະນາ ປະເທດຊາດ ຢ່າງຫ້າວຫັນ ແລະ ມີຜົນສຳເລັດ ຢ່າງຈົບງາມ; ເພີ່ມທະວີ ບົດບາດ ແລະ ເຊີດຊູ ຄວາມສາມາດ ຂອງແນວລາວສ້າງຊາດ ເພື່ອເຕົ້າໂຮມ ຄວາມສາມັກຄີ ແລະ ເສີມຂະຫຍາຍ ສິດເປັນເຈົ້າ ຂອງປະຊາຊົນ ບັນດາເຜົ່າ ໃຫ້ສືບຕໍ່ ປະຕິບັດ ພາລະກິດ ປ່ຽນແປງໃໝ່ ໃຫ້ໄດ້ ຮັບຜົນສຳເລັດ ໃຫຍ່ຫຼວງ ກວ່າເກົ່າ; ໂຄສະນາອົບຮົມ ປຸກລະດົມ ແລະ ເສີມຂະຫຍາຍ ສິດເປັນເຈົ້າ ຂອງປະຊາຊົນ ບັນດາເຜົ່າ; ໂຄສະນາ, ສຶກສາອົບຮົມ, ປຸກລະດົມ ເສີມຂະຫຍາຍ ສິດເປັນເຈົ້າ ຂອງປະຊາຊົນບັນດາເຜົ່າ ໃນການປະຕິບັດແນວທາງ, ນະໂຍບາຍ, ລັດຖະທຳມະນູນ, ກົດໝາຍ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ ແຕ່ລະໄລຍະ; ຫັນລົງວຽກງານ 3 ສ້າງ ດ້ວຍການຫັນທິດລົງເລິກ ກໍ່ສ້າງແນວໂຮມ ຂັ້ນເມືອງ ໃຫ້ເປັນຫົວໜ່ວຍ ເຂັ້ມແຂງຮອບດ້ານ, ສ້າງແນວໂຮມ ຂັ້ນບ້ານ ໃຫ້ເປັນຫົວໜ່ວຍ ພັດທະນາ ພ້ອມທັງ ສ້າງສາຍ ພົວພັນມິດຕະພາບ ກັບບັນດາ ອົງການຈັດຕັ້ງ ແນວໂຮມ ຂອງບັນດາ ປະເທດເພື່ອນມິດຍຸດທະສາດ, ເປີດກວ້າງການຮ່ວມມື ກັບຕ່າງປະເທດ, ພາກພື້ນ ແລະ ສາກົນ.

info@lfnd.org.la | 021 213754 | (856-21) 453191