ສູນກາງແນວລາວສ້າງຊາດ

Lao Front For National Development

ອພສ ແຂວງເຊກອງ ສຳເລັດກອງປະຊຸມໃຫຍ່ ສະໄໝທີ V

ກອງປະຊຸມໃຫຍ່ຜູ້ແທນ ພຣະສົງ ທົ່ວແຂວງເຊກອງ ສະໄໝທີ V ຂອງອົງການພຸດທະສາສະໜາສຳພັນລາວ ໄດ້ໄຂຂຶ້ນ ໃນຕອນເຊົ້າຂອງວັນທີ 7 ມັງກອນ 2021 ແລະອັດລົງດ້ວຍຜົນສຳເລັດອັນຈົບງາມ ໃນຕອນແລງຂອງວັນດຽວກັນ ຢູ່ທີ່ສະໂມສອນຂອງແຂວງ ໂດຍການເປັນປະທານຂອງພຣະຫຼັກຄຳທຳມະເພຣີສັງຄະນາຈານ( ບຸນໂຖ້ຍ ໄຊຍະບຸດ) ເຈົ້າຄະນະແຂວງເຊກອງ,ໃຫ້ຄວາມເມດຕາເຂົ້າຮ່ວມຂອງ ພຣະຫຼັກແກ້ວມະຫາສຸເມທາທິບໍດີ ( ມະຫາບຸນມາ ສິມມາພົມ) ຮັກສາການປະທານສູນກາງ ອົງການພຸດທະສາສະໜາສຳພັນລາວ, ບັນດາພຣະມະຫາເຖຣານຸ-ເຖຣະ ແຂກ ອພສ 3 ແຂວງ ສາລະວັນ,ອັດຕະປື ແລະ ຈຳປາສັກ  ແລະ ຜູ້ແທນກອງປະຊຸມ, ມີທ່ານ ຄຳສອນ ກອນເຍີ ຮອງເຈົ້າແຂວງເຊກອງ , ມີທ່ານ ນາງ ບຸນຮຽງ ບຸນຈິດ ປະທານແນວລາວສ້າງຊາດແຂວງ, ບັນດາທ່ານໃນຄະນະບໍລິຫານງານພັກເມືອງ, ຫົວໜ້າຫ້ອງການ, ຄະນະຫ້ອງການ, ນາຍບ້ານພາຍໃນແຂວງ-ເມືອງເຂົ້າຮ່ວມ.

ກອງປະຊຸມໃຫຍ່ ຂອງອົງການພຸດທະສາສະໜາສຳພັນລາວ ແຂວງເຊກອງ ສະໄໝທີ  V ໄດ້ຕົກລົງປະຊາມະຕິເປັນເອກະສັນ ແລະ ຮັບຮອງເອົາ ບົດສະຫຼຸບລາຍງານການເຄື່ອນໄຫວວຽກງານ ຂອງອົງການພຸດທະສາສະໜາສຳພັນລາວແຂວງເຊກອງ ໃນໄລຍະ 5 ປີຜ່ານມາ( 2016-2020) , ທິດທາງແຜນການດຳເນີນງານ ແລະ ໜ້າທີ່ ຂອງອົງການພຸດທະສາສະໜາສຳພັນລາວແຂວງເຊກອງ ໃນໄລຍະ 5 ປີຕໍ່( 2021-2025), ບົດສຳຫຼວດ ການຊີ້ນຳ-ນຳພາ ຂອງຄະນະບໍລິຫານງານ ອພສ ແຂວງຊຸດເກົ່າ, ກອງປະຊຸມໄດ້ຕີລາຄາຜົນສຳເລັດ ການເຄື່ອນໄຫວວຽກງານໃນແຕ່ລະດ້ານ, ຕີລາຄາຈຸດດີ, ຈຸດອ່ອນຂໍ້ຄົງຄ້າງ ແລະ ພ້ອມທັງບົດຮຽນທີ່ຖອດຖອນໄດ້ ຈາກການຊີ້ນຳ-ນຳພາ ການຈັດຕັ້ງປະຕິບັດມະຕິກອງປະຊຸມໃຫຍ່ ສະໄໝທີ IV ທີ່ຜ່ານມາ, ກອງປະຊຸມໄດ້ເປັນເອກະສັນຮັບຮອງເອົາທິດທາງແຜນການ 5 ປີ (ແຕ່ປີ 2021-2025) ເຊິ່ງມີເນື້ອໃນຕົ້ນຕໍ ການນຳພາວຽກງານ ຫ້ອງການບໍລິຫານງານ, ການປົກຄອງສົງ, ວຽກງານສຶກສາສົງ, ວຽກງານເຜີຍແຜສີລະທຳ ແລະ ວິປັດສະນາກຳມະຖານ, ວຽກງານສາທຣະນູປະການ ແລະ ວຽກງານການພົວພັນຕ່າງປະເທດ.

ກອງປະຊຸມ ໄດ້ຮັບຮອງເອົາຄະນະກຳມະການບໍລິຫານງານ ອົງການພຸດທະສາສະໜາສຳພັນລາວ ແຂວງເຊກອງ ປະກອບດ້ວຍ 17 ອົງ, ຮັບຮອງເອົາຄະນະທີ່ປືກສາຄະນະບໍລິຫານງານ 3 ອົງ : ພຣະຫຼັກຄຳທຳມະນັນທິສີວໍຣະຄຸນ( ສົມສະໜຸກ ບຸດຕາລາດ), ພຣະອາຈານ ບຸນຫວ່ງ ດວງນິມິດ ແລະ  ພຣະອາຈານ ບົວລາ ຄຳຜົງໄຊຍະສິດ ເປັນທີ່ປືກສາ, ພ້ອມນັ້ນ ກອງປະຊຸມໄດ້ຮັບຮອງເອົາເຈົ້າຄະນະແຂວງ ແລະ ຮອງເຈົ້າຄະນະແຂວງ ປະກອບດ້ວຍ 3 ອົງຄື : ພຣະຫຼັກຄຳທຳມະເພຣີສີສັງຄະນາຈານ( ບຸນໂຖ້ຍ ໄຊຍະບຸດ) ເປັນເຈົ້າຄະນະແຂວງ, ຊີ້ນຳລວມໃນຄົງເຂດວຽກງານອົງການພຸດທະສາສະໜາສຳພັນລາວ ແຂວງເຊກອງ, ພຣະປຣີຊາອະຣິຍະທຳມະຍານເຖຣະ ( ມະຫາ ກິ ກະຕະສີໂລ) ແລະ ພຣະປຣີຊາປຸນຍະຈິຣັດຖິຕິຄຸນ( ບຸນຍືນ ບັ້ງທອງ) ເປັນຮອງເຈົ້າຄະນະແຂວງ ສະໄໝທີ V, ໃນຕອນທ້າຍຂອງກອງປະຊຸມ ຍັງໄດ້ຮັບຟັງຄຳໂອວາດຈາກ ພຣະຫຼັກແກ້ວມະຫາສຸເມທາທິບໍດີ ( ມະຫາບຸນມາ ສິມມາພົມ) ຮັກສາການປະທານສູນກາງ ອົງການພຸດທະສາສະໜາສຳພັນລາວ ນຳອີກດ້ວຍ.

info@lfnd.org.la | 021 213754 | (856-21) 453191