ສູນກາງແນວລາວສ້າງຊາດ

Lao Front For National Development

ອະດີດການນຳພັກ-ລັດ ເຄື່ອນໄຫວຕິດຕາມຜົນເສຍຫາຍຈາກໄພນ້ຳຖ້ວມ ຢູ່ແຂວງວຽງຈັນ

ທ່ານ ສີສະຫວາດ ແກ້ວບຸນພັນ ອະດີດກຳມະການກົມການເມືອງສູນກາງພັກ, ອະດີດປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມຜົນເສຍຫາຍຈາກຜົນກະທົບໄພນ້ຳຖ້ວມ ຢູ່ແຂວງວຽງຈັນ, ໃນອາທິດຜ່ານມານີ້, ໂດຍໄດ້ຮັບການຕ້ອນຮັບອັນອົບອຸ່ນຂອງ ທ່ານ ບຸນສອນ ເພັດລາວັນ ຄະນະປະຈໍາພັກແຂວງ, ຮອງເຈົ້າແຂວງແຂວງວຽງຈັນ, ທ່ານ ທອງສະຫວັນ ວົງສຳພັນ ຄະນະປະຈຳພັກແຂວງ, ປະທານແນວລາວສ້າງຊາດແຂວງວຽງຈັນ ພ້ອມດ້ວຍຄະນະນຳແຕ່ລະຂະແໜງການຂອງແຂວງ.

ທ່ານ ຮອງເຈົ້າແຂວງ ໄດ້ລາຍງານສະພາບໄພນ້ຳຖ້ວມໃນໄລຍະຜ່ານມາຂອງແຂວງວຽງຈັນໂດຍສັງເຂບວ່າ: ເມືອງກາສີ, ເມືອງແມດ, ເມືອງວຽງຄຳ, ເມືອງໂພນໂຮງ ແລະ ເມືອງທຸລະຄົມ ແມ່ນນ້ຳໄດ້ຖ້ວມທີ່ຢູ່ອາໃສຂອງປະຊາຊົນ ແລະ ເນື້ອທີ່ທຳ ການຜະລິດກຳສິກຳລວມທັງໝົດ ຫຼາຍກວ່າ 3,896.34 ເຮັກຕາ, ຊົນລະປະທານຖືກເສຍຫາຍ 27 ແຫ່ງ, ຖ້ວມໜອງປາ 150 ໜອງ, ເສັ້ນທາງເປ່ເພ ແລະ ເຮັດໃຫ້ສັດລ້ຽງຈຳນວນໜຶ່ງຕາຍ. ພ້ອມກັນນີ້, ກໍ່ໄດ້ເຄື່ອນໄຫວຢ້ຽມຢາມເມືອງທຸລະຄົມ ແລະ ໄດ້ຮັບຟັງການລາຍງານຈາກທ່ານ ເສດໄຊ ວິໄລໄຟ ເລຂາພັກເມືອງ, ເຈົ້າເມືອງເມືອງທຸລະຄົມວ່າ: ເມືອງດັ່ງກ່າວມີຈຳ ນວນ 16 ບ້ານທີ່ໄດ້ຮັບຜົນກະທົບຈາກໄພນ້ຳຖ້ວມໃນປີນີ້ ລວມມີ 1,430 ຄອບຄົວ, ມີ 7,087 ຄົນ, ຖ້ວມໂຮງຮຽນ 12 ແຫ່ງ, ສັດລ້ຽງຈຳນວນໜຶ່ງຂາດອາຫານ ແລະ ມີຈຳນວນໜຶ່ງຕາຍ ແລະ ຖ້ວມເນື້ອທີ່ການປູກຝັງ-ລ້ຽງສັດຫຼາຍເຮັກຕາ. ເບື້ອງຕົ້ນຄະນະນຳຂອງແຂວງ ແລະ ບັນດາເມືອງ ໄດ້ແຕ່ງຕັ້ງຄະນະຮັບຜິດຊອບລົງເກັບກຳ-ສຳຫຼວດຜົນເສຍຫາຍຕົວຈິງຢ່າງໃກ້ສິດຕິດແທດ, ໄດ້ສ້ອມແປງເສັ້ນທາງທີ່ເປ່ເພ, ເຄື່ອນຍ້າຍສັດລ້ຽງຂອງປະຊາຊົນ, ມອບເຄື່ອງອຸປະໂພກ-ບໍລິໂພກ ແລະ ຢາປົວພະຍາດຈຳນວນໜຶ່ງຊ່ວຍເຫຼືອປະຊາຊົນ ເຮັດໃຫ້ສາມາດແກ້ໄຂຟື້ນຟູໄພພິບັດດັ່ງກ່າວກັບຄືນສູ່ສະພາບປົກກະຕິໂດຍພື້ນຖານ.

ໂອກາດນີ້, ທ່ານ ສີສະຫວາດ ແກ້ວບຸນພັນ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກ, ຄະນະນຳຂອງແຂວງ ແລະ ບັນດາເມືອງ ທີ່ໄດ້ເອົາໃຈໃສ່ແກ້ໄຂໄພພິບັດບັດໃນຄັ້ງນີ້ ກັບຄືນສູ່ສະພາບປົກກະຕິໂດຍພື້ນຖານ ແລະ ທ່ານ ໄດ້ເນັ້ນຕື່ມວ່າ: ໃຫ້ຄະ ນະພັກ, ສະມາຊິກພັກ, ພະນັກງານທຸກຂະແໜງການ, ທະຫານ, ຕຳຫຼວດ ຂອງແຂວງ ແລະ ບັນດາເມືອງທີ່ໄດ້ຮັບຜົນກະ ທົບດັ່ງກ່າວ ຈົ່ງຍົກສູງຄວາມຮັບຜິດຊອບເປັນເຈົ້າການໃນການລົງຕິດແທດກັບປະຊາຊົນ, ຊຸກຍູ້ນຳພາປະຊາຊົນເຮັດຕົວຈິງໃນການຜະລິດຜົນລະປູກ, ລ້ຽງສັດ ເພື່ອທົດແທນ ແລະ ຂາຍອອກເປັນສິນຄ້າສູ່ຕະຫຼາດ ເພື່ອຊ່ວຍແກ້ໄຂຊີວິດການເປັນຢູ່ປະຊາຊົນ, ຍົກສູງນໍ້າໃຈຄວາມສາມັກຄີເປັນອັນໜຶ່ງອັນດຽວ ພ້ອມກັນແກ້ໄຂໄພພິບັດດັ່ງກ່າວໃຫ້ກັບຄືນສູ່ສະພາບປົກກະຕິ, ເປັນແບບຢ່າງໃນການນຳພາວຽກງານທຸກດ້ານໃຫ້ດີ, ບໍ່ຫຼີ້ນກິນຟູມເຟີຍ, ເອົາໃຈໃສ່ເຊື່ອມຊຶມບັນດາມະຕິຄໍາສັ່ງ, ຄໍາແນະນໍາຂອງຂັ້ນເທິງໃຫ້ເລິກເຊິ່ງ ແລະ ເຜີຍແຜ່ນະໂຍບາຍຂອງພັກ-ກົດໝາຍຂອງລັດ ໃຫ້ປະຊາຊົນຮູ້, ເຂົ້າໃຈຢ່າງທົ່ວເຖິງ; ໃຫ້ປະຊາຊົນຈົ່ງມີຄວາມຫ້າວຫັນ, ດຸໝັ່ນຂະຫຍານພຽນ ສືບຕໍ່ປູກຝັງ-ລ້ຽງສັດ ທົດແທນຜົນເສຍຫາຍດັ່ງກ່າວ ແລະ ແກ້ໄຂຊີວິດການເປັນຢູ່ຂອງຕົນໃຫ້ດີຂຶ້ນເທື່ອລະກ້າວ.

info@lfnd.org.la | 021 213754 | (856-21) 453191