ສູນກາງແນວລາວສ້າງຊາດ

Lao Front For National Development

ອາດີດການນຳ ສນຊ ເຂົ້າຮ່ວມ ງານບຸນກິນຈຽງ ຢູ່ແຂວງຫົວພັນ

ທ່ານ ຕົ່ງເຢີ ທໍ່ ອະດີດກຳມະການສູນກາງພັກ ອະດີດຮອງປະທານສູນກາງແນວລາວສ້າງຊາດ (ສນຊ) ກໍາມະການສູນກາງແນວລາວສ້າງຊາດ ໄດ້ເຄື່ອນໄຫວຢ້ຽມຢາມ ແລະ ເຂົ້າຮ່ວມງານບຸນກິນຈຽງ ທີ່ບ້ານບວມງາມ ເມືອງຫົວເມືອງ ແຂວງຫົວພັນ ໃນວັນທີ 12 ທັນວາ 2017 ນີ້, ມີບັນດາທ່ານການນຳຂອງເມືອງຫົວເມືອງ, ບັນດາພະແນກອ້ອມຂ້າງເມືອງ, ແນວລາວສ້າງຊາດ, ອົງການຈັດຕັ້ງມະຫາຊົນ, ບັນດາທ່ານນາຍບ້ານອ້ອມຂ້າງເມືອງ, ແນວໂຮມບ້ານ ແລະ ປະຊາຊົນອ້ອມຂ້າງເມືອງເຂົ້າຮ່ວມ.

ໂອກາດນີ້, ທ່ານ ໄຊຈື່ທໍ່ ມາລະສີນ ກຳມະການພັກເມືອງ, ສະມາຊິກສະພາທ້ອງຖິ່ນ, ຫົວໜ້າຫ້ອງການຖະແຫຼງຂ່າວŒŒ-ວັດທະນະທຳ ແລະ ທ່ອງທ່ຽວ ໄດ້ຫວນຄືນປະຫວັດຄວາມເປັນມາຂອງບຸນກິນຈຽງຊົນເຜົ່າມົ້ງໂດຍຫຍໍ້ເຊິ່ງທ່ານໄດ້ຍົກໃຫ້ເຫັນວ່າ: ບຸນກິນຈຽງແມ່ນຮີດຄອງປະເພນີ ແລະ ວັດທະນະທຳ ອັນດີງາມ ເຊິ່ງມີຄວາມໝາຍປະຫວັດສາດສຳລັບເຜົ່າມົ້ງ ມາແຕ່ດຶກດຳບັນທີ່ປູ່ຍ່າຕາຍາຍເຄີຍປະຕິບັດການມາຫຼາຍ 100 ປີມາແລ້ວ ເມື່ອຈະເຖິງເດືອນຈຽງທຸກໆຄົນລ້ວນແຕ່ມີຄວາມດີອົກດີໃຈ ແລະ ມີໃບໜ້າຍິ້ມແຍ້ມແຈ່ມໃສ ເພື່ອຕ້ອນຮັບປີໃໝ່, ແມ່ນທົບທວນຄືນຜົນສຳເລັດວຽກງານຜົນຜະລິດຂອງແຕ່ລະຄອບຄົວ, ຊີງຊາວໃນໜຶ່ງປີຜ່ານມາ; ເຮັດທານໃຫ້ຜີພໍ່ຜີແມ່ໃນເມື່ອມີຜົນສຳເລັດໃນການຜະລິດຕ່າງໆ, ໃຫ້ມາກິນ ແລະ ມາປົກປ້ອງລູກຫຼານ ແລະ ຜົນຜະລິດຕ່າງໆໃນປີຕໍ່ໄປ; ໃນງານບຸນກິນຈຽງ ມີຫຼາຍກິດຈະກຳ ເປັນຕົ້ນ: ໂຍນໝາກຄອນລະຫວ່າງບ່າວ-ສາວ ຂັບລຳຕໍ່ແຍກັນ ແລະ ເອ້ຢ້ອງເຄື່ອງນຸ່ງປະເພດຕ່າງໆ ທີ່ຜະລິດຈາກແມ່ຍິງມົ້ງ; ເປີດຂະບວນການແຂ່ງຂັນກິລາ, ສີລະປະ-ວັນນະຄະດີປະເພດຕ່າງໆ; ສ້າງຄວາມສາມັກຄີລະຫວ່າງຊີງຊາວ, ບັນດາເຜົ່າ ເພື່ອພົບປະໂອ້ລົມໃນໂອກາດບຸນປີໃໝ່ ກິນເຂົ້າສາມັກຄີ ແລະ ຖືເອົາໂກາດນີ້ໄປຢ້ຽມຢາມພີ່ນ້ອງ,ລຸງຕາ, ອາວອາ, ນ້າບ່າວນ້າສາວ ແລະ ອື່ນໆ. ບຸນດັ່ງກ່າວແມ່ນຈັດຂຶ້ນໃນທຸກໆປີຂອງມື້ 30 ຫຼື ດັບ 15 ຄ່ຳ.

ທ່ານ ຕົ່ງເຢີ ທໍ່ ໄດ້ໃຫ້ກຽດໂອລົມຕໍ່ບຸນປະເພນີດັ່ງກ່າວວ່າ: ການຫຼິ້ນບຸນແມ່ນໃຫ້ມີຄວາມເປັນເອກະພາບກັນ, ຕ້ອງມີຄວາມສາມັກຄີເປັນອັນໜຶ່ງອັນດຽວ, ຕ້ອງຮັກສາວັດທະນະທຳອັນດີງາມຂອງປະຊາຊົນບັນດາເຜົ່າໄວ້ ແລະ ການຫຼິ້ນບຸນບໍ່ຕ້ອງຫຼິ້ນຟຸມເຟືອຍເກີນໄປ. ພ້ອມກັນນີ້, ທ່ານຍັງໄດ້ເນັ້ນບາງບັນຫາທີ່ສຳຄັນວ່າໃຫ້ແຕ່ລະພາກສ່ວນເອົາໃຈໃສ່ວຽກງານສຶກສາອົບຮົມການເມືອງ-ແນວຄິດ, ເຊື່ອມຊຶມແນວທາງນະ ໂຍບາຍຂອງພັກ-ລັດ ໃຫ້ປະຊາຊົນລາວບັນດາເຜົ່າໄດ້ເຂົ້າໃຈຢ່າງເລິກເຊິ່ງ; ເອົາໃຈໃສ່ແກ້ໄຂປະກົດການຫຍໍ້ທໍ້ຂອງສັງຄົມ, ສະກັດກັ້ນການຄ້າຂາຍຢາເສບຕິດ, ໃຫ້ມີສະຕິລະວັງຕົວຕໍ່ກຸ່ມຄົນທີ່ບໍ່ຫວັງດີສວຍໃຊ້ວຽກງານຊົນເຜົ່າ, ສາສະໜາ ເພື່ອແບ່ງແຍກຄວາມສາມັກຄີພາຍໃນ; ໃຫ້ເອົາໃຈໃສ່ພັດທະນາທ້ອງຖິ່ນໂດຍສຸມໃສ່ວຽກງານການຜະລິດກະສິກຳເປັນສິນຄ້າ, ສົ່ງລູກຫຼານເຂົ້າໂຮງຮຽນ; ລະດົມຜູ້ອາວຸໂສ, ຊາວໜຸ່ມ, ແມ່ຍິງໃຫ້ມີຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ, ສ້າງສາພັດທະນາບ້ານໃຫ້ມີຄວາມຈະເລີນກ້າວໜ້າ. ພ້ອມກັນນີ້, ທ່ານຍັງໄດ້ມອບເຄື່ອງຊ່ວຍເຫຼືອບັນເທົາທຸກຈຳນວນໜຶ່ງໃຫ້ບ້ານບວມງາມ, ໄປຢ້ຽມຢາມ ແລະ ໂອ້ລົມກຸ່ມບ້ານຄັ້ງຄາວ ຕື່ມອີກ.

info@lfnd.org.la | 021 213754 | (856-21) 453191