ສູນກາງແນວລາວສ້າງຊາດ

Lao Front For National Development

ອົງການຈັດຕັ້ງມະຫາຊົນ ແຂວງອຸດົມໄຊ ເຊື່ອມຊຶມມະຕິ XI ຂອງພັກ ແລະ ມະຕິ IX ອົງຄະນະພັກແຂວງ

ກອງປະຊຸມເຊື່ອມຊຶມ ແລະ ຜັນຂະຫຍາຍ ມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ແລະ ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງອຸດົມໄຊ ໃຫ້ແກ່ພະນັກງານຫລັກແຫລ່ງ ຈາກ 3 ພາກສ່ວນ ຄື: ສະຫະພັນກຳມະບານແຂວງ, ສະຫະພັນນັກຮົບເກົ່າ ແລະ ພະແນກການຕ່າງປະເທດ ແຂວງອຸດົມໄຊ ໄດ້ຈັດຂຶ້ນໃນວັນທີ 23 ມິຖຸນານີ້ ທີ່ຫ້ອງປະຊຸມ ຫ້ອງວ່າການແຂວງອຸດົມໄຊ ພາຍໃຕ້ການເປັນປະທານ ຂອງສະຫາຍ ວັນນາ ແກ້ວສັນຕິ ກໍາມະການປະຈໍາພັກແຂວງ, ປະທານແນວລາວສ້າງຊາດແຂວງອຸດົມໄຊ.

ໃນກອງປະຊຸມ ຄະນະພັກສະຫະພັນກຳມະບານແຂວງ ແລະ ພະແນກການຕ່າງປະເທດແຂວງ ໄດ້ຜັດປ່ຽນກັນ ຂຶ້ນເຜີຍແຜ່ເນື້ອໃນເອກະສານ ໂດຍສະເພາະແມ່ນມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ແລະ ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງອຸດົມໄຊ, ແຜນພັດທະນາເສດຖະກິດ – ສັງຄົມ ແຫ່ງຊາດ ແລະ ຂອງແຂວງ 5 ປີ ແລະ ເອກະສານທີ່ຕິດພັນຈໍານວນຫນຶ່ງ ເຊິ່ງການເຊື່ອມຊຶມ ແລະ ຜັນຂະຫຍາຍ ກໍເພື່ອເຮັດໃຫ້ສະມາຊິກພັກ, ພະນັກງານ ທັງ 3 ພາກສ່ວນ ຮັບຮູ້, ເຂົ້າໃຈ ຢ່າງລະອຽດ ຕໍ່ກັບເນື້ອໃນ ທິດທາງແຜນການ ແລະ ບັນດາຄາດຫມາຍອັນລວມ ແລະ ພ້ອມກັນນຳໄປຈັດຕັ້ງ ຜັນຂະຫຍາຍ ເຂົ້າສູ່ວຽກງານທີ່ຕົນເອງຮັບຜິດຊອບ ໃຫ້ຖືກຕ້ອງ, ສອດຄ່ອງ ແລະ ເຮັດໃຫ້ການດຳເນີນວຽກງານ ມີປະສິດທິພາບ ແລະ ມີຜົນສຳເລັດ, ເຮັດໃຫ້ມະຕິ XI ຂອງພັກ ແລະ ມະຕິ IX ຂອງອົງຄະນະພັກແຂວງອຸດົມໄຊ ລວມທັງ ແຜນພັດທະນາເສດຖະກິດ – ສັງຄົມ ແຫ່ງຊາດ 5 ປີ ແລະ ແຜນພັດທະນາເສດຖະກິດ-ສັງຄົມ 5 ປີ ຂອງແຂວງ ອຸດົມໄຊ ໄດ້ຮັບການຜັນຂະຫຍາຍທົ່ວເຖິງ ແລະ ໄປໃນທິດທາງດຽວກັນ.

ໂອກາດດັ່ງກ່າວ ຜູ້ເຂົ້າຮ່ວມໄດ້ສະແດງຄວາມຄິດເຫັນຕໍ່ກັບບາງບັນຫາ ທີ່ຂຶ້ນກັບຄວາມຮັບຜິດຊອບຂອງຕົນ ໂດຍແນ່ໃສ່ເຮັດໃຫ້ການເຄື່ອນໄຫວຈັດຕັ້ງປະຕິບັດວຽກງານຕົວຈິງ ໃນຕໍ່ຫນ້າ ຖືກຕ້ອງຕາມແນວທາງທີ່ພັກໄດ້ກຳນົດໄວ້.

ກອງປະຊຸມ ສະຫາຍ ວັນນາ ແກ້ວສັນຕິ ໄດ້ມີຄຳເຫັນອະທິບາຍບາງບັນຫາ ພ້ອມທັງເນັ້ນຫນັກໃຫ້ທຸກພາກສ່ວນ ຈັດຕັ້ງປະຕິບັດຕາມເນື້ອໃນທີ່ເຊື່ອມຊຶມ ໃຫ້ມີຜົນສຳເລັດຕາມລະດັບຄາດຫມາຍ. ຮັບຟັງການເຊື່ອຊຶມ ມີຄະນະພັກ, ຄະນະນຳ ຕະຫຼອດຮອດສະມາຊິກພັກ-ພະນັກງານ ຈາກ 3 ພາກສ່ວນ ເຂົ້າຮ່ວມ.

 

 

info@lfnd.org.la | 021 213754 | (856-21) 453191