ສູນກາງແນວລາວສ້າງຊາດ

Lao Front For National Development

ຮອງປະທານຜູ້ປະຈຳການ ສູນກາງແນວລາວສ້າງຊາດ ຕ້ອນຮັບການເຂົ້າພົບປະຢ້ຽມຢາມ ຂອງຄະນະຜູ້ແທນສະພາທີ່ປຶກສາການເມືອງ ແຂວງກວາງຕຸ້ງ

     ໃນວັນທີ 25 ທັນວາ 2023 ນີ້ ທີ່ສູນກາງແນວລາວສ້າງຊາດ(ສນຊ); ທ່ານ ຄຳໄຫຼ ສີປະເສີດ ກຳມະການສູນກາງພັກ, ຮອງປະທານຜູ້ປະຈຳການສູນກາງແນວລາວສ້າງຊາດ ພ້ອມດ້ວຍຄະນະ ໄດ້ຕ້ອນຮັບການເຂົ້າພົບປະຢ້ຽມຢາມຂອງທ່ານ ນາງ ລີຊີນ ຮອງປະທານສະພາທີ່ປຶກສາການເມືອງ ແຂວງກວາງຕຸ້ງ ສປ ຈີນ ພ້ອມດ້ວຍຄະນະ.
     ທ່ານ ຮອງປະທານຜູ້ປະຈຳການສູນກາງແນວລາວສ້າງຊາດ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ ສ ປປ ລາວຂອງຄະນະ ໃນຄັ້ງນີ້ ເຊິ່ງເປັນການປະກອບສ່ວນເສີມສ້າງສາຍພົວພັນມິດຕະພາບ ແລະ ການຮ່ວມມືຍຸດທະສາດຮອບດ້ານ ລະຫວ່າງ ລາວ-ຈີນ ເວົ້າລວມ, ເວົ້າສະເພາະແມ່ນອົງການແນວລາວສ້າງຊາດ ກັບສະພາທີ່ປຶກສາການເມືອງຂອງ ສປ ຈີນ ກໍຄືແຂວງກວາງຕຸ້ງ ໃຫ້ເຂົ້າສູ່ລວງເລີກ. ພ້ອມກັນນັ້ນ, ທ່ານ ກໍ່ໄດ້ລາຍງານສະພາບລວມກ່ຽວກັບການພັດທະນາເສດຖະກິດ-ສັງຄົມ ຂອງ ສປປລາວ ແລະ ໄດ້ຍົກໃຫ້ເຫັນບັນດາຜົນງານການເຄື່ອນໄຫວຕ່າງໆ ຂອງແນວລາວສ້າງຊາດໃນໄລຍະຜ່ານມາ ໂດຍຫຍໍ້ ແລະ ທິດທາງແຜນການວຽກງານຈຸດສຸມຂອງອົງການແນວລາວສ້າງຊາດ ໃຫ້ຄະນະຜູ້ແທນ ໄດ້ຮັບຊາບ.
     ໂອກາດນີ້, ທ່ານ ຮອງປະທານສະພາທີ່ປຶກສາການເມືອງ ແຂວງກວາງຕຸ້ງ ກໍ່ໄດ້ສະແດງຄວາມຂອບໃຈຕໍ່ຄະນະນຳຂອງສູນກາງແນວລາວສ້າງຊາດ ທີ່ໄດ້ໃຫ້ການຕ້ອນຮັບຄະນະຜູ້ແທນສະພາທີ່ປຶກສາການເມືອງແຂວງກວ້າງຕຸ້ງ ໃນຄັ້ງນີ້ ແລະ ຊົມເຊີຍຕໍ່ບັນດາຜົນສຳເລັດທີ່ ສປປ ລາວ ກໍ່ຄືສູນກາງແນວລາວສ້າງຊາດ ຍາດມາໄດ້ໃນຕະຫຼອດໄລຍະທີ່ຜ່ານມາ. ພ້ອມກັນນີ້, ທ່ານ ຮອງປະທານສະພາທີ່ປຶກສາການເມືອງ ແຂວງກວາງຕຸ້ງໄດ້ຍົກໃຫ້ເຫັນເຖີງພາລະບົດບາດຂອງສະພາທີປຶກສາການເມືອງແຂວງກວາງຕຸ້ງ ແລະ ລາຍງານສະພາບການພັດນາເສດຖະກິດ-ສັງຄົມຂອງແຂວງກວາງຕຸ້ງໃຫ້ທ່ານຮອງປະທານຜູ້ປະຈຳການສູນກາງແນວລາວສ້າງຊາດ ຮັບຊາບ.
     ຫຼັງຈາກນັ້ນ, ທັງສອງຝ່າຍກໍ່ໄດ້ປຶກສາຫາລືກ່ຽວກັບບັນດາວຽກງານຈຸດສຸມທີ່ຈະຕ້ອງສຶບຕໍ່ພົວພັນຮ່ວມມືໃນຕໍ່ໜ້າ ເປັນຕົ້ນແມ່ນ ການແລກປ່ຽນຄະນະຜູ້ແທນເຊິ່ງກັນ ແລະ ກັນ, ການພັດທະຊັບພະຍາກອນມະນຸດ, ການແລກປ່ຽນດ້ານວັດທະນະທຳ, ການທ່ອງທ່ຽວ ແລະ ການຄ້າຂະໜາດນ້ອຍ, ກາງ, ຂະໜາດໃຫຍ່ ຕາມໜຶ່ງແລວທາງໜຶ່ງເສັ້ນທາງ ໃຫ້ມີປະໂຫຍດສູງສຸດສູ່ສອງປະເທດ.
ຂ່າວ-ພາບ: ເລົ່າລໍ່+ເຢ້ຢ່າ
ບກ: ສືເຊັ່ງ
info@lfnd.org.la | 021 213754 | (856-21) 453191