ສູນກາງແນວລາວສ້າງຊາດ

Lao Front For National Development

ຮອງປະທານສູນກາງແນວລາວສ້າງຊາດ ພົບປະຄະນະຄົນເຊື້ອຊາດລາວ ຢູ່ຕ່າງປະເທດ

ໃນວັນທີ 5 ກຸມພາ 2024 ນີ້,  ທີ່ສູນກາງແນວລາວສ້າງຊາດ(ສນຊ) ທ່ານ ດຣ ຈັນເພັງ ສຸດທິວົງ, ຮອງປະທານສູນກາງແນວລາວສ້າງຊາດ ໄດ້ຕ້ອນຮັບການເຂົ້າພົບປະຢ້ຽມຢາມ ຂອງຄະນະສະມາຄົມກິລາເຕະບານ ຂອງພີ່ນ້ອງຄົນເຊື້ອຊາດລາວ ຢູ່ປະເທດສະຫະລັດອາເມລິກາ, ນຳພາໂດຍ ທ່ານ ນາງ ຖາວອນ ຊະນະຂຸນເພັດ ຕົວແທນຄະນະບໍລິຫານງານທິມບານເຕະລາວ-ອາເມລິກາ ພ້ອມດ້ວຍຄະນະນັກກິລາ ຂອງພີ່ນ້ອງຄົນເຊື້ອຊາດລາວຢູ່ປະເທດສະຫະລັດອາເມລິກາ.

ໂອກາດນີ້, ທ່ານ ຮອງປະທານສູນກາງແນວລາວສ້າງຊາດ ໄດ້ສະແດງຄວາມຍິນດີຕ້ອນຮັບອັນອົບອຸ່ນຕໍ່ຄະນະທີ່ໄດ້ມາຢ້ຽມຢາມ ສປປ ລາວ ໃນຄັ້ງນີ້. ທ່ານ ຍັງໄດ້ຍົກໃຫ້ເຫັນສະພາບລວມການສ້າງສາພັດທະນາປະເທດຊາດ, ຍົກໃຫ້ເຫັນພາລະບົດບາດ, ສິດ ແລະ ໜ້າທີ່ຂອງອົງການແນວລາວສ້າງຊາດ; ແຜນພັດທະນາຂອງອົງການແນວລາວສ້າງຊາດ ແຕ່ປີ 2021-2026 ໂດຍສະເພາະແມ່ນບັນດາແຜນງານ ແລະ ກິດຈະກຳທີ່ຕິດພັນກັບວຽກງານຄົນເຊື້ອຊາດລາວປະຈຳຢູ່ຕ່າງປະເທດ ໃຫ້ຄະນະໄດ້ຮັບຊາບ. ພ້ອມກັນນັ້ນ, ທ່ານ ໄດ້ຮຽກຮ້ອງໃຫ້ພີ່ນ້ອງຄົນເຊື້ອຊາດລາວ ຈົ່ງສືບຕໍ່ສຶກສາອົບຮົມໃຫ້ລູກຫຼານທີ່ດຳລົງຊີວິດຢູ່ຕ່າງປະເທດ ຈົ່ງຮັກສາວັດທະນະທຳ-ຮີດຄອງປະເພນີອັນດີງາມ ແລະ ພາສາຊາດ, ນຳພາລູກຫຼານມາຢ້ຽມຢາມ, ທ່ອງທ່ຽວ ແລະດຳເນີນກິດຈະກຳຕ່າງໆ ຢູ່ ສປປ ລາວ ເພື່ອເປັນການປະກອບສ່ວນເຂົ້າໃນການສ້າງສາປະເທດຊາດ.

ທ່ານ ທ່ານ ນາງ ຖາວອນ ຊະນະຂຸນເພັດ ກໍ່ໄດ້ກ່າວສະແດງຄວາມຂອບໃຈເປັນຢ່າງຍິ່ງ ຕໍ່ທ່ານຮອງປະທານສູນກາງແນວລາວສ້າງຊາດ ທີ່ໄດ້ຕ້ອນຮັບຄະນະຢ່າງອົບອຸ່ນ ແລະ ໄດ້ລາຍງານຈຸດປະສົງການມາຢ້ຽມຢາມ  ແລະ ເຮັດວຽກຢູ່ ສປປ ລາວໃນຄັ້ງນີ້ ໃຫ້ ທ່ານ ດຣ. ຈັນເພັງ ສຸດທິວົງ  ໄດ້ຮັບຊາບ. ພ້ອມກັນນັ້ນ, ຄະນະພີ່ນ້ອງຄົນເຊື້ອຊາດລາວຍັງໄດ້ໄປທັດສະນະສຶກສາ ແລະ ທ່ຽວຊົມຫໍມູນເຊື້ອແນວລາວສ້າງຊາດ ຕື່ມອີກ.

ຂ່າວ: ເຢ

ບກ: ຄຳຜາຍ

info@lfnd.org.la | 021 213754 | (856-21) 453191