ໃນໂອກາດນີ້, ຄະນະໄດ້ເຂົ້າພົບປະທ່ານ ບຸນໂຮມ ເທດທານີ ຮອງເລຂາພັກແຂວງ, ປະທານສະພາປະຊາຊົນແຂວງຊຽງຂວາງ ເພື່ອແຈ້ງຈຸດປະສົງການເຄື່ອນໄຫວເຮັດວຽກ ໃນຄັ້ງນີ້ໃຫ້ທ່ານໄດ້ຮັບຊາບ. ພ້ອມກັນນີ້, ກໍ່ໄດ້ເຂົ້າຮ່ວມກອງປະຊຸມພົບປະກັບຄະນະກຳມະການແນວລາວສ້າງຊາດແຂວງ ແລະ ພາກສ່ວນທີ່ກ່ຽວຂ້ອງ ເພື່ອຊຸກຍູ້ກ່ຽວກັບການ ແລະ ດໍາເນີນກອງປະຊຸມໃຫຍ່ 3 ຂັ້ນ ຂອງແນວລາວສ້າງຊາດ ຕາມນິຕິກໍາຕ່າງໆຂອງພັກ-ລັດ ແລະ ສະເພາະແນວລາວສ້າງຊາດ ໄລຍະ 5 ປີ 2024-2029 ໂດຍໄດ້ຮັບການຕ້ອນຮັບຈາກ ທ່ານ ນາງ ບົວສີ ນາຖາວົງ ຄະນະປະຈໍາພັກແຂວງ, ປະທານແນວລາວສ້າງຊາດແຂວງຊຽງຂວາງ ພ້ອມດ້ວຍຄະນະ.

     

       ພາຍຫລັງທີ່ຄະນະຮັບຜິດຊອບຂອງ ສນຊ ສະເໜີບາງເນື້ອໃນຂອງບັນດານິຕິກໍາທີ່ກ່ຽວຂ້ອງແລ້ວ ຜູ້ເຂົ້າຮ່ວມກອງປະຊຸມ ໄດ້ພ້ອມກັນປະກອບຄໍາເຫັນຢ່າງສ້າງສັນກົງໄປກົງມາ ຕໍ່ນິຕິກໍາ ແລະ ບົດຮຽນຕົວຈິງໃນການຈັດຕັ້ງປະຕິບັດຜ່ານມາ ໂດຍສະເພາະບັນຫາບຸກຄະລາກອນ ແລະ ໂຄງປະກອບບຸກຄະລາກອນທີ່ກະກຽມ ແລະດໍາເນີນກອງປະຊຸມໃຫຍ່ 3 ຂັ້ນຂອງແນວລາວສ້າງຊາດ ພ້ອມດ້ວຍຂໍ້ສະເໜີຈໍານວນໜຶ່ງທີ່ກ່ຽວຂ້ອງ.

ຂ່າວ-ຮູບ: ເຢ

ບ.ກ: ພ.ບຸບຜາ