ສູນກາງແນວລາວສ້າງຊາດ

Lao Front For National Development

ຮອງປະທານ ສນຊ ມອບເຄື່ອງຊ່ວຍເຫຼືອປະຊາຊົນ ບັນດາເຜົ່າ ທີ່ຖືກຜົນກະທົບຈາກໄພນ້ຳຖ້ວມ ທີ່ ແຂວງຫຼວງພະບາງ

ໃນ​​ລະ​ຫວ່າງວັນ​ທີ່ 20-24 ສິງ​ຫາ 2018 ນີ້ ທ່ານ ນາງ ຍອດ​ແກ້ວ​ມະ​ນີ ສູ​ພາ​ນຸ​ວົງ ຮອງ​ປະ​ທານ ສູນ​ກາງ​ແນວ​ລາວ​ສ້າງ​ຊາດ ພ້ອມ​ດ້ວຍທ່ານ ຄຳຫຼ້າ ທະສີ​ນີ​ພອນ ກຳ​ມະ​ການ​ພັກ​ແຂວງ, ປະ​ທານ​ແນວ​ລາວ​ສ້າງ​ຊາດ​ແຂວງຫຼວງ​ພະ​ບາງ ແລະ ​ຄະ​ນະ​ໄດ້​ເຄື່ອນ​ໄຫວ​ມອບ​ເຄື່ອ​ງຊ່ວຍ​ເຫຼືອ​ໃຫ້​ປະ​ຊາ​ຊົນ​ບັນ​ດາ​ເຜົ່າ​ທີ່​ຖື​ກ​ຜົນ​ກະ​ທົບ​ຈາກ​ໄພ​ນ້ຳ​ຖ້ວມ​ ​ທີ່​ແຂວງຫຼວງ​ພະ​ບາງ

ໃນ​ການມອບ​ເຄື່ອ​ງ​ຊ່ວຍ​ເຫຼືອ​ຄັ້ງ​ນີ້​ມີ: ເຂົ້າ​ສານ,ນ້ຳ​ດື່ມ,ເຄື່ອງ​ນູ່ງ​ຫົ່ມ ແລະ ອາ​ຫານ​ແຫ້ງ​ຈຳ​ນວນ​ໜຶ່ງ, ເພື່ອມອບ​ໃຫ້​ປະ​ຊາ​ຊົນ​ທີ່​ຖືກ​ຜົນ​ກະ​ທົບ​ໄພ​ນ້ຳ​ຖ້ວມ ​ທີ່​ເມືອງ​ປາກ​ອູ ມູນ​ຄ່າ​ລວມ​​ທັງ​ໝົດ 15.000.000 ກີບ ມອບ​ໃຫ້​ທ່ານ ບຸນ​ທັນ ບໍ​ລະ​ວົງ ຮອງ​ເລ​ຂາ​ພັກ​ເມືອງ, ປະ​ທານ​ແນວ​ລາວ​ສ້າງ​ຊາດ​ເມືອງ​ປາກ​ອູ , ພ້ອມດຽວ​ກັນ​ນີ້ ທ່ານ ນາງ ຍອດ​ແກ້ວ​ມະ​ນີ​ ສຸ​ພາ​ນຸ​ວົງ ພ້ອມ​ດ້ວຍ​ຄະ​ນະ​ຍັງ​ໄດ້​ໄປມອບ​ເຄື່ອ​ງຊ່ວຍ​ເຫຼືອ​ໃຫ້​ປະ​ຊາ​ຊົນ​ບັນ​ດາ​ເຜົ່າ​ທີ່​ຖື​ກ​ຜົນ​ກະ​ທົບ​ຈາກ​ໄພ​ນ້ຳ​ຖ້ວມ​ ທີ່​ເມືອງ​ນ້ຳ​ບາກ ມູນ​ຄ່າ​ລວມ​​ທັງ​ໝົດ 15.000.000 ກີບ ມອບ​ໃຫ້​ ທ່ານ ສົມ​ພອນ ສີ​ອຸ​ດົມ​ພັນ ກຳ​ມະ​ການ​ພັກ​ແຂວງ, ເລ​ຂາ​ພັກ​ເມືອງ​ເຈົ້າ​ເມືອງເມືອງ​ນ້ຳບາກ ​ແລະ ​ຍັງ​ໄດ້​ໄປມອບ​ເຄື່ອ​ງຊ່ວຍ​ເຫຼືອ​ໃຫ້​ປະ​ຊາ​ຊົນ​ບັນ​ດາ​ເຜົ່າ​ທີ່​ຖື​ກ​ຜົນ​ກະ​ທົບ​ຈາກ​ໄພ​ນ້ຳ​ຖ້ວມ​ ທີ່​ເມືອງ​ງອຍ ມູນ​ຄ່າ​ລວມ​​ທັງ​ໝົດ 15.000.000 ກີບ ມອບ​ໃຫ້​ ທ່ານ ລັດ​ຕະ​ນະ​ໄຊ ຄຳ​ສີ​ດາ ກຳ​ມະ​ການ​ພັກ​ແຂວງ, ເລ​ຂາ​ພັກ​ເມືອງ ​ເຈົ້າ​ເມືອງ ​ເມືອງ​ງອຍ ເພື່ອ​ໄປ​ຊ່ວຍ​ເຫຼືອ​ປະ​ຊາ​ຊົນ​ທີ່​ຖືກ​ຜົນ​ກະ​ທົບ​ຈາກ​ໄພ​ນ້ຳ​ຖ້ວມ, ລວມ​ມູນ​ຄ່າ​ທັງ​ໝົດ​ໃນ​ການມອບ​ເຄື່ອ​ງ​ຊ່ວຍ​ເຫຼືອ​ໃນສາມ​ເມືອງ​ຂອງ​ແຂວງຫຼວງ​ພະ​ບາງ​ຄັ້ງ​ນີ້ ແມ່ນ 45.000.000ກີບ.

ນອກ​ຈາກນັ້​ນ, ທ່ານ ນາງ ຍອດ​ແກ້ວ​ມະ​ນີ ສຸ​ພາ​ນຸ​ວົງ ພ້ອມ​ດ້ວຍ​ຄະ​ນະ​ຍັງ​ໄດ້​ໄປ​ວາງ​ກະ​ຕ່າ​ດອກ​ໄມ້​ຢູ່​​ອາ​ນຸ​ສາ​ວະ​ລີ ປະ​ທານ ສຸ​ພາ​ນຸ​ວົງ ໃນ​ວັນ​ຄົບ​ຮອບ 109 ປີ ແລະ ຍັງ​ເຂົ້າຢ້ຽມ​ຢາມ​ ທ່ານ ສາຍ​ສະ​ໝອນ ຄົ​ມ​ທະ​ວົງ ຮອງ​ເລ​ຂາ​ພັກ​ແຂວງ, ປະ​ທານ​ສະ​ພາ​ປະ​ຊາ​ຊົນ ເຂດ 6 ແຂວງຫຼວງ​ພະ​ບາງ, ​​ພ້ອມ​ກັນ​ນັ້ນ​ທ່ານ ຍັງ​ໄດ້​ໄປ​ຢ້ຽມ​ຢາມ​ພະ​ນັກ​ງານ​ແນວ​ລາວ​ສ້າງ​ຊາດ​ແຂວງ​,​ໄດ້ໂອ້​ລົມ,ຊຸກ​ຍຸ້​ວຽກ​ງານ​ແນວ​ລາວ​ສ້າງ​ຊາດ, ຊົມ​ເຊີຍ​ຜົນ​​ງານແນວ​ລາວ​ສ້າງ​ຊາດ​ແຂວງ ແລະ ຂອບ​ອົກ​ຂອບ​ໃຈ​ທີ່​ໄດ້​ຮັບ​ການ​ຕ້ອນ​ຮັບ​ຢ່າງ​ອົບ​ອຸ່ນ​ໃນ​ການ​ເຄື່ອນ​ໄຫວ​ວຽກ​ງານ​ຄັ້ງ​ນີ້. ​

info@lfnd.org.la | 021 213754 | (856-21) 453191