ທ່່ານ ນາງ ຄໍາຈັນ ພົມແສງສະຫັວນ ຮອງປະທານ ສູນກາງແນວລາວສ້າງຊາດ ເຂົ້າຮ່ວມກອງປະຊຸມສະຫຼຸບວຽກງານໄອຍະການປະຊາຊົນ ແລະ ວຽກງານອະໄພຍະໂທດ ປະຈໍາປີ 2019 ທີ່ຈັດຂຶ້ນລະຫວ່າງ ວັນທີ 4–5 ກຸມພາ 2020 ທີ່ຫໍປະຊຸມແຫ່ງ ຊາດ ນະຄອນຫຼວງວຽງຈັນ. ພາຍໃຕ້ການເປັນປະທານ ຂອງທ່ານ ຄໍາສານ ສຸວົງ ກໍາມະການສູນກາງພັກ, ຫົວໜ້າອົງການໄອຍະການປະຊາຊົນສູງສຸດ, ມີຄະນະປົກປ້ອງກົດໝາຍຂັ້ນສູນກາງ ແລະ ທ້ອງຖີ່ນ, ຄະນະກໍາມະການອະໄພຍະໂທດລະດັບຊາດ, ແຂວງ-ນະຄອນຫຼວງ, ບັນດາຫົວໜ້າອົງການໄອຍະການປະຊາຊົນທົ່ວປະເທດ ແລະ ອົງການໄອຍະການທະຫານຂັ້ນສູງ.
ກອງປະຊຸມໄດ້ຜ່ານບົດສະຫຼຸບການເຄື່ອນໄຫວວຽກງານໄອຍະການປະຊາຊົນ ປະຈໍາປີ 2019 ແລະ ທິດທາງວຽກງານສຸມປີ 2020 ການເຜີຍແຜ່ຄໍາແນະນໍາຮ່ວມລະຫວ່າງກະຊວງປ້ອງກັນຄວາມສະຫງົບ, ອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ຮ່າງກັບການດໍາເນີນຄະດີຄ້າມະນຸດ, ເຜີຍແຜ່ຄໍາແນະນໍາຮ່ວມເລກທີ 014 ກ່ຽວກັບການແບ່ງຂອບເຂດສິດ ແລະ ໜ້າທີ່ໃນການດໍາເນີນຄະດີອາຍາ, ເລກທີ 015 ກ່ຽວກັບການເອົາພະນັນງານໄປປະຈໍາຢູ່ຄ້າຍຄຸມຂັງ ແລະ ຄ້າຍກັກຂັງ. ກອງປະຊຸມສືບຕໍ່ມື້ທີ່ 2 ກ່ຽວກັບວຽກງານອະໄພຍະໂທດປະຈໍາປີ 2019 ພາຍໃຕ້ການເຂົ້າຮ່ວມເປັນປະທານ ຂອງທ່ານ ສອນໄຊ ສີພັນດອນ. ກໍາມະການກົມການເມືອງສູນກາງພັກ, ຮອງນາຍນົກລັດທະມົນຕີ, ປະທານຄະນະກໍາມະການອະໄພຍະໂທດລະດັບຊາດ. ຜູ້ແທນເຂົ້າຮ່ວມກອງປະຊຸມໄດ້ປະກອບຄວາມຄິດຄວາມເຫັນຕໍ່ວຽກງານດັ່ງກ່າວຢ່າງກົງໄປກົງມາ.