ສູນກາງແນວລາວສ້າງຊາດ

Lao Front For National Development

ທ່ານຮອງປະທານ ສນຊ ເຄື່ອນໄຫວເຮັດວຽກຢູ່ 3 ແຂວງພາກໃຕ້

ທ່ານ ຄຳໃບ ດຳລັດ ກຳມະການສູນກາງພັກ ຮອງປະທານສູນກາງແນວລາວສ້າງຊາດ (ສນຊ) ພ້ອມດ້ວຍຄະນະຈາກກຳມະທິການບັນດາເຜົ່າສະພາແຫ່ງຊາດ, ສະຖາບັນວິທະຍາສາດສັງຄົມແຫ່ງ ຊາດ ແລະ ພະນັກງານກົມຊົນເຜົ່າ ສູນກາງແນວລາວສ້າງຊາດ ໄດ້ເຄື່ອນໄຫວເຮັດວຽກ ຢູ່ 3 ແຂວງ ພາກໃຕ້ຄື: ແຂວງສາລະວັນ, ເຊກອງ ແລະ ແຂວງຈຳປາສັກ ລະຫວ່າງ ວັນທີ 22-26 ສິງ ຫາ 2018;

ການລົງເຄື່ອນໄຫວເຮັດວຽກຢູ່ 3 ແຂວງດັ່ງກ່າວຂອງທ່ານຮອງປະທານ ສນຊ ເປັນການຜັນຂະຫຍາຍເນື້ອໃນ ຈິດໃຈກອງປະຊຸມເປີດກວ້າງກ່ຽວກັບຊົນເຜົ່າ ທີ່ມີຊື່ເອີ້ນວ່າ “ບຣູ” ໂດຍແມ່ນກໍາມະທິການບັນດາເຜົ່າສະພາແຫ່ງຊາດ ຮ່ວມກັບ ສູນ ກາງແນວລາວສ້າງຊາດ, ກະຊວງພາຍໃນ ແລະ ສະຖາບັນວິທະຍາສາດສັງຄົມແຫ່ງຊາດໄດ້ຈັດຂຶ້ນ ໃນ ຕົ້ນເດືອນສິງຫາ 2018 ທີ່ສູນຝຶກອົບຮົມສູນກາງແນວລາວສ້າງຊາດ ເຊິ່ງເປັນການລົງທາບທາມຄຳຄິດຄຳເຫັນກ່ຽວ ກັບຊົນເຜົ່າທີ່ມີຊື່ເອີ້ນວ່າ “ບຣູ” ການເຮັດ ວຽກຢູ່ບັນດາແຂວງດັ່ງກ່າວ ໂດຍມີການນຳຂັ້ນແຂວງ, ສະມາຊິກສະພາ ແຫ່ງຊາດປະຈຳແຂວງ, ແນວ ລາວສ້າງຊາດ, ພະນັກງານປະຕິວັດອາວຸໂສບຳນານ ແລະ ຜູ້ຊົງຄຸນວຸດທິບບັນດາຊົນເຜົ່າ ເຂົ້າຮ່ວມ ໃນການປະກອບຄຳຄິດຄຳເຫັນ ເພື່ອໃຫ້ມີຄວາມເປັນເອກະພາບກ່ຽວກັບຊື່ເອີ້ນ ໃຫ້ຖືກກັບຈຸດພິເສດຂອງຊົນເຜົ່າຢູ່ໃນລາວ, ຖືກກັບຊື່ຕົວຈິງຂອງເຂົາເຈົ້າມັກ. ພ້ອມກັນນີ້, ກໍເພື່ອກໍາຈັດ, ແກ້ໄຂ ແລະ ກ້າວໄປເຖິງການລຶບລ້າງຊື່ຊົນເຜົ່າທີ່ມີລັກສະນະສຽດສີ, ດູຖູກໝິ່ນປະໝາດ ແລະ ພາໃຫ້ເກີດມີການອາຄາດບາດໝາງກັນ; ເພື່ອນໍາເຂົ້າພິຈາ ລະນາໃນກອງປະຊຸມສະໄໝສາມັນ ເທື່ອທີ່ 6 ຂອງສະພາແຫ່ງຊາດຊຸດ ທີ VIII ທີ່ຈະຈັດຂຶ້ນໃນທ້າຍປີ 2018;

ພ້ອມດຽວກັນນີ້, ທ່ານ ຄຳໃບ ດຳລັດ ຍັງໄດ້ແຈ້ງກ່ຽວກັບວາລະການດຳເນີນກອງປະຊຸມພົບປະຜູ້ຊົງຄຸນວຸດທິ ບັນດາຊົນເຜົ່າ ທົ່ວປະເທດ ຄັ້ງທີ 3 ທີ່ຈະຈັດຂຶ້ນໃນທ້າຍປີ 2018, ຊຸກຍູ້ບັນດາຂະບວນການ ກະກຽມ ແລະ ດຳເນີນ ກອງປະຊຸມອົງຄະນະພັກສາມຂັ້ນ ໃຫ້ບັນລຸຜົນຕາມແຜນການ ໃນນັ້ນ, ໃຫ້ເອົາໃຈໃສ່ໃນການປັບປຸງກົງຈັກການຈັດ ຕັ້ງຂັ້ນບ້ານໃຫ້ມີຄວາມເຂັ້ມແຂງ; ຂະບວນການ ຕ່າງໆ ເພື່ອຂ່ຳນັບຮັບຕ້ອນວັນສຳຄັນຂອງຊາດ-ພັກ ໃຫ້ເປັນຂະບວນ ການຟົດຟືນ ເປັນຕົ້ນ: ວັນສ້າງຕັ້ງກອງທັບປະຊາຊົນປະຕິວັດລາວ ຄົບຮອບ 70 ປີ ໃຫ້ເປັນຂະບວນການຢ່າງຕໍ່ເນື່ອງ.

info@lfnd.org.la | 021 213754 | (856-21) 453191