ສູນກາງແນວລາວສ້າງຊາດ

Lao Front For National Development

ຮັບຮອງ 21 ບ້ານ ຂອງເມືອງນໍ້າບາກ ເປັນບ້ານມາມັກຄີປອງດອງ

ວັນທີ 4 ກຸມພາ ນີ້ ແນວລາວສ້າງຊາດເມືອງນໍ້າບາກ ແຂວງຫຼວງພະບາງ ໄດ້ຈັດພິທີຮັບຮອງບ້ານສາມັກຄີປອງດອງຂຶ້ນ ໂດຍມີ ທ່ານ ເອິງ ລໍສະຫວັນ ປະທານແນວລາວສ້າງຊາດແຂວງ, ທ່ານ ຫຸມເພັງ ໂພທິທຳ ປະທານກວດກາພັກ-ລັດເມືອງ ແລະ ແຂກຮັບເຊີນ ພ້ອມດ້ວຍອົງການຈັດຕັ້ງບ້ານ 21 ບ້ານ ພາຍໃນ 3 ກຸ່ມບ້ານຂອງເມືອງເຂົ້າຮ່ວມ.

ໃນພິທີ ນາຍບ້ານປາກມອງ ໄດ້ຕາງໜ້າຂື້ນຜ່ານບົດສະຫຼຸບການສ້າງຄອບຄົວ ແລະ ບ້ານສາມັກຄີປອງດອງ ໃນໄລຍະຜ່ານມາ ທ່ານໃຫ້ຮູ້ວ່າ  ໃນ 21 ບ້ານ ປະກອບມີຢູ່ກຸ່ມປາກມອງ 8 ບ້ານ, ກຸ່ມນໍ້າຖ້ວມ 12 ບ້ານ ແລະ ກຸ່ມເທດສະບານເມືອງ 1 ບ້ານ ທີ່ໄດ້ຮັບການປະກາດຮັບຮອງເປັນບ້ານສາມັກຄີປອງດອງຄັ້ງນີ້ ມີທັງຫມົດ 3.980 ຄອບຄົວ, ພົນລະເມືອງ 23.801 ຄົນ, ຍິງ 11.173 ຄົນ, ໃນນັ້ນ ເຜົ່າລາວມີ 919 ຄອບຄົວ 4.479 ຄົນ ຍິງ 2.182 ຄົນ, ເຜົ່າກຶມມຸ 2.102 ຄອບຄົວ 11.868 ຄົນ ຍິງ 5.805 ຄົນ, ເຜົ່າມົ້ງ 959 ຄອບຄົວ 6.743 ຄົນ ຍິງ 3.186 ຄົນ; ອາຊີບສ່ວນໃຫ່ຍຂອງປະຊາຊົນແມ່ນການປູກຝັງ ແລະ ຄ້າຂາຍ, ປີຜ່ານມາສະເລ່ຍລາຍຮັບໄດ້ 10 ລ້ານກ່ວາກີບຕໍ່ຄົນ, ສາມາດປະເມີນຄອບຄົວສາມັກຄີປອງດອງປະເມີນໄດ້ຕາມມາດຖານໃນນັ້ນມີ 3.814 ຄອບຄົວ ເຊິ່ງກວມ 96% ແລະ ຄອບຄົວທີ່ປະເມີນບໍ່ໄດ້ຕາມມາດຕະຖານມີ 165 ຄອບຄົວກວມເອົາ 4%. ຫຼັງຈາກນັ້ນ ປະທານກວດກາພັກ-ລັດເມືອງ ແລະ ປະທານແນວລາວສ້າງຊາດແຂວງ ໄດ້ຂື້ນມອບໃບຢັ້ງຢືນ ຄອບຄົວ ແລະ ບ້ານສາມັກຄີປອງດອງ ຢ່າງສົມກຽດ.

ຕອນທ້າຍ ທ່ານ ເອີງ ລໍສະຫວັນ ໄດ້ມີຄໍາເຫັນຍ້ອງຍໍຊົມເຊີຍຕໍ່ຜົນງານທີ່ອົງການປົກຄອງບ້ານທັງ 21 ບ້ານ ພ້ອມທັງຮຽກຮ້ອງໃຫ້ຄະນະພັກອົງການປົກຄອງ ແຕ່ລະຂັ້ນເປັນເຈົ້າການໃນການຊີ້ນໍາ ການຈັດຕັ້ງປະຕິບັດວຽກງານໃຫ້ຖືກຕ້ອງ ແລະ ໄດ້ຮັບຜົນດີ, ສືບຕໍ່ຮັກສາມູນເຊື້ອເປັນຄອບຄົວ ແລະ ບ້ານສາມັກຄີປອງດອງ ໃຫ້ຍືນຍົງຕະຫຼອດໄປ.

info@lfnd.org.la | 021 213754 | (856-21) 453191