ສູນກາງແນວລາວສ້າງຊາດ

Lao Front For National Development

ຮັບຮອງ 8 ບ້ານ ກຸ່ມຜາໂຄມ ນະຄອນ-ຫຼວງພະບາງ ເປັນບ້ານສາມັກຄີປອງດອງ

ໃນວັນທີ 24 ກຸມພາ 2021 ນີ້ ແນວລາວສ້າງຊາດ ນະຄອນ-ຫຼວງພະບາງ ແຂວງຫຼວງພະບາງ ໄດ້ຈັດພິທີຮັບຮອງ  8 ບ້ານ ຂອງກຸ່ມຜາໂຄມ ເປັນບ້ານສາມັກຄີປອງດອງ ຢູ່ທີ່ຫຫ້ອງປະຊຸມບ້ານຊ່າງຄ້ອງ, ເປັນກຽດເຂົ້າຮ່ວມມີທ່ານ ວຽງທອງ ຫັດສະຈັນ ເຈົ້ານະຄອນ-ຫຼວງພະບາງ, ທ່ານ ນາງ ສຸທາ ທອງສະໝຸດ ປະທານສະຫະພັນແມ່ຍິງນະຄອນ-ຫຼວງພະບາງ, ທ່ານ ນາງ ພອນສະຫວັນ ລຸນຍະລາດ ຮອງປະທານແນວລາວສ້າງຊາດນະຄອນ-ຫຼວງພະບາງ, ມີ ຫົວໜ້າ-ຮອງຫົວໜ້າຫ້ອງການອ້ອມຂ້າງນະຄອນ-ຫຼວງພະບາງ, ອົງການປົກຄອງບ້ານ ພ້ອມດ້ວຍປະຊາຊົນ ຂອງ 8 ບ້ານເຂົ້າຮ່ວມ.

ພິທີດັ່ງກ່າວ ທ່ານ ບຸນທະວີ ຈັນທິບ ນາຍບ້ານຊ່າງຄ້ອງ ໄດ້ຜ່ານບົດລາຍງານການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ຕະຫຼອດໄລຍະຜ່ານມາ ຢູ່ໃນ 8 ບ້ານ ຂອງກຸ່ມຜາໂຄມ ຄື: ບ້ານ ຊຽງເຫຼັກ, ບ້ານ ຊ່າງຄ້ອງ, ບ້ານ ໜອງຊາຍ, ບ້ານ ໂຄມຂວາງ, ບ້ານ ຜາໂຄມ, ບ້ານ ຄົກວ່າ, ບ້ານ ດອນເກົ່າ ແລະ ບ້ານ ດອນໃໝ່.  ໄລຍະຜ່ານມາແນວລາວສ້າງຊາດ ແລະ ອົງການປົກຄອງບ້ານໄດ້ເຜີຍແຜ່ຄູ່ມືການສ້າງຄອບຄົວ ແລະ ບ້ານສາມັກຄີປອງດອງ ໃຫ້ປະຊາຊົນບັນດາເຜົ່າໄດ້ຮັບຮູ້ ແລະ ເຊື່ອມຊຶມ  ເຮັດໃຫ້ແຕ່ລະຄອບຄົວ ມີຄວາມສາມັກຄີຮັກແພງ ຖືກຕ້ອງປອງດອງກັນ ມີຄວາມເຄົາລົບນັບຖືເຊິ່ງກັນ ແລະ ກັນ, ອານຸລັກຮັກສາວັດທະນະທໍາ ຮີດຄອງປະເພນີອັນດີງາມ ຂອງເຜົ່າ, ຂອງຊາດ ແລະ ປະຊາຊົນມີຄວາມສາມັກຄີປອງດອງ ເຊິ່ງເຫຼືອເຊິ່ງກັນ ແລະ ກັນ. ພ້ອມກັນນັ້ນ, ໄດ້ມອບໃບຢັ້ງຢືນບ້ານສາມັກຄີປອງດອງໃຫ້ 8 ບ້ານດັ່ງກ່າວ.

ໂອກາດນີ້,  ທ່ານ ວຽງທອງ ຫັດສະຈັນ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ພົ້ນເດັ່ນທີ່ກຸ່ມບ້ານ ກໍຄື 8 ບ້ານດັ່ງກ່າວ ຍາດມາໄດ້ໃນໄລຍະຜ່ານມາ ແລະ ທ່ານຍັງຮຽກຮ້ອງໃຫ້ອົງການຈັດຕັ້ງແຕ່ລະບ້ານ ຈົ່ງສືບຕໍ່ເຜີຍແຜ່ແນວທາງນະໂຍບາຍຂອງພັກ-ລະບຽບກົດໝາຍຂອງລັດ ໃຫ້ປະຊາຊົນໄດ້ຮັບຮູ້, ສືບຕໍ່ເຕົ້າໂຮມຄວາມສາມັກຄີປະຊາຊົນລາວບັນດາເຜົ່າ ໃຫ້ເປັນປຶກແຜ່ນແໜ້ນໜາ, ມີຄວາມຊ່ວຍເຫຼືອເຊິ່ງກັນ ແລະ ກັນ, ສົ່ງເສີມຫັດຖະກໍາ ແລະ ການຜະລິດກະສິກຳເປັນສິນຄ້າ ເພື່ອແກ້ໄຂຊີວິດການເປັນຢູ່ຂອງປະຊາຊົນໃຫ້ດີຂື້ນເທື່ອລະກ້າວ ແລະ ສືບຕໍ່ຊຸກຍູ້ວຽກງານການສຶກສາໃຫ້ລູກຫຼານໄດ້ຮັບການຮໍ່າຮຽນ.

info@lfnd.org.la | 021 213754 | (856-21) 453191