ສູນກາງແນວລາວສ້າງຊາດ

Lao Front For National Development

ຮ່ວມນ້ຳໃຈໄປຊ່ວຍເຫຼືອປະຊາຊົນຜູ້ປະສົບໄພນ້ຳຖ້ວມ

ໃນວັນທີ 26-27 ກໍລະກົດ 2018 ນີ້, ສູນກາງແນວແນວລາວສ້າງຊາດ(ສນຊ) ໄດ້ຈັດພິທີເຊີນຊວນບັນດາອົງການຈັດ ຕັ້ງພັກ-ລັດ, ບັນດາທ່ານນັກທຸລະກິດ, ບໍລິສັດ, ຮ້າງຮ້ານ ແລະ ປະຊາຊົນລາວບັນດາເຜົ່າ ເພື່ອຮ່ວມນ້ຳໃຈບໍລິຈາກຊ່ວຍເຫຼືອ ປະຊາຊົນທີ່ປະສົບໄພນ້ຳຖ້ວມ ຢູ່ແຂວງອັດຕາປື, ຕາງໜ້າຮັບໂດຍທ່ານ ນາງ ຄຳຈັນ ພົມແສງສະຫວັນ ຮອງປະທານສູນກາງ ແນວລາວສ້າງຊາດ ແລະ ທ່ານ ຮສ.ດຣ ສົມອົກ ກິ່ງສະດາ ຮອງປະທານສູນກາງແນວລາວສ້າງຊາດ.

ພິທີຄັ້ງນີ້, ໄດ້ຮັບເງີນຊ່ວຍເຫຼືອຈາກບໍລິສັດໂອໂຕລາວ ຈຳກັດ 20 ລ້ານກີບ, ຮ້ານຊີ້ນດາດເຊເວັນພັດ ນ້ຳດື່ມ 100 ແກັດ ລວມມູນຄ່າ 5 ລ້ານກີບ; ບໍລິສັດ Seogwooe ຊ່ວຍນ້ຳດື່ມ 200 ແກັດ, ໝີ່ 140 ແກັດ ແລະ ເຂົ້າສານ 2 ໂຕນ ລວມມູນຄ່າ 25 ລ້ານກີບ ; ບໍລິສັດອີຊູຊຸຈຳປາລາວ ຊ່ວຍນ້ຳດື່ມ 100 ແກັດ ແລະ ເງີນສົດ 10 ລ້ານກີບ ລວມມູນຄ່າ 13 ລ້ານກີບ; ສະມາຄົມເກົາຫຼີປະຈຳຢູ່ ສປປ ລາວ ໝີ່ 90 ແກັດ ແລະ ນໍ້າດື່ມ 600 ແກັດມູນຄ່າ 15 ລ້ານກີບ; ສະມາຄົມ ມິດຕະພາບລາວ-ເຢຍລະມັນ ຊ່ວຍເງີນສົດ 14 ລ້ານກວ່າກີບ, ສະມາຄົມຈີນ ຢູ່ນະຄອນຫຼວງວຽງຈັນ ຊ່ວຍເຄື່ອນຸ່ງມູນຄ່າ 48 ລ້ານກີບ ແລະ ເງີນສົດ 65 ລ້ານກີບ ລວມມູນຄ່າ 113 ລ້ານກີບ; ບໍລິສັດນໍ້າດື່ມອະເມຊິງ ນໍ້າດື່ມ 90 ແກັດລວມມູນຄ່າ 5 ລ້ານກີບ; ມູນນິທິເພື່ອແຜ່ນດິນຂອງຣາຊະອານາຈັກໄທຊ່ວຍ 10,000 ບາດ, ໂຮງຮຽນສອນຂັບລົດເດີສະຕາ ຂອງຣາຊະອາ ນາຈັກໄທ ຊ່ວຍ 10,000 ບາດ, ບໍລິສັດຊະພາທອງການຄ້າ 2003 ຈຳກັດຂອງຣາຊະອານາຈັກໄທຊ່ວຍ 200,000 ບາດ, ປຕທ.ສະພານມິດຕະພາບໄທ-ລາວ ຊ່ວຍ 50,000 ບາດ; ຍາຕິທຳ ແລະ ຜູ້ປົກຄອງທິມງານຄຣູພະຍຸ ຈາກທົ່ວປະເທດ ຂອງຣາຊະອານາຈັກໄທ 115,000 ບາດ. ພ້ອມກັນນີ້, ກໍໄດ້ຮັບການຊ່ວຍເຫຼືອຂອງບາງບໍລິສັດ, ສະມາຄົມ, ຮ້າງຮ້ານ ໃນ ການຊ່ວຍລະດົມເຄື່ອງ; ມີຄອບຄົວການນຳພັກ-ລັດ, ຄອບຄົວປະຊາຊົນ ລາວບັນດາເຜົ່າຜູ້ທີ່ມີນ້ຳໃຈນຳເຄື່ອງອຸປະໂພກ ແລະ ບໍລິໂພກ ມາມອບໃຫ້ສູນກາງແນວລາວສ້າງຊາດເປັນຈຳນວນຫຼວງຫຼາຍ ລວມມູນຄ່າທັງໝົດ 600 ກວ່າລ້ານກີບ.

ໂອກາດນີ້, ທ່ານ ຮສ.ດຣ ສົມອົກ ກິ່ງສະດາ ກໍໄດ້ຕາງໜ້າການນຳຂອງ ສນຊ ແລະ ປະຊາຊົນຜູ້ປະສົບໄພນ້ຳຖ້ວມ ສະແດງຄວາມຂອບໃຈເປັນຢ່າງຍີ່ງຕໍ່ການຊ່ວຍເຫຼືອເຄື່ອງອຸປະໂພກ-ບໍລິໂພກ ແລະ ເງີນຈຳນວນດັ່ງກ່າວ. ເຄື່ອງທີ່ໄດ້ຮັບ ຄັ້ງນີ້, ສູນກາງແນວລາວສ້າງຊາດ ຈະນຳໄປມອບຊ່ວຍເຫຼືອປະຊາຊົນທີ່ປະສົບໄພນ້ຳຖ້ວມ ຢູ່ແຂວງອັດຕາປື ເພື່ອຊ່ວຍແກ້ໄຂ ຄວາມທຸກຍາກໃຫ້ປະຊາຊົນ ແລະ ທ່ານ ຍັງໄດ້ກ່າວຮຽກຮ້ອງວ່າໃຫ້ບັນດາທຸລະກິດ, ບໍລິສັດ, ຫ້າງຮ້ານ ແລະ ປະຊາຊົນລາວ ບັນດາເຜົ່າ ທີ່ມີນ້ຳໃຈຢາກຊ່ວຍເຫຼືອຄອບຄົວປະຊາຊົນທີ່ປະສົບໄພນ້ຳຖ້ວມໃນຄັ້ງນີ້ ແມ່ນສາມາດພົວພັນນຳ ຄະນະຮັບຜິດ ຊອບສະເພາະກິດ ຫຼື ຫ້ອງການ ສນຊ ໝາຍເລກໂທລະສັບ 021 213754 ຫຼື 02055212277 ເພື່ອນຳໄປມອບຕໍ່, ເນື່ອງ ຈາກວ່າ ນອກຈາກແຂວງດັ່ງກ່າວນັ້ນ ກໍຍັງມີອີກຫຼາຍໆແຂວງທີ່ໄດ້ຮັບໄພພິບັດຈາກໄພນໍ້າຖ້ວມອີກດ້ວຍ.

info@lfnd.org.la | 021 213754 | (856-21) 453191