ສູນກາງແນວລາວສ້າງຊາດ

Lao Front For National Development

ຮ່ວມບໍລິຈາກນ້ຳໃຈ ໄປຊ່ວຍຜູ້ປະສົບໄພນ້ຳຖ້ວມ

ສູນ​ກາງ​ແນວ​ລາວ​ສ້າງ​ຊາດ ຮ່ວມກັບ ອົງການພຸດທະສາສະໜາສຳພັນລາວ, ມູນ​ນິ​ທິ​ຊ່ວຍ​ເຫຼືອ​ຄົນ​ທຸກ​ຍາກແຫ່ງ ສປປ ລາວ ແລະ ສາຂາ ນະຄອນຫຼວງວຽງຈັນ ໄດ້​ນຳ​ເອົາ​ເຄື່ອງ​ອຸ​ປະ​ໂພກ-ບໍ​ລິ​ໂພກ ແລະ ເຄື່ອງ​ນຸ່ງ​ຮົ່ມ​ຈຳ​ນວນ​ໜຶ່ງ​ໄປ​ຊ່ວຍ​ເຫຼືອ​ບັນ​ເທົາທຸກ​​ ​ ໄປມອບ​ໃຫ້​ແກ່ຄອບ​ຄົວ​ທີ່​ຖືກ​ຜົນ​ກະ​ທົບ​ຈາກ​ໄພ​ນ້ຳ​ຖ້ວມ ທີ່​ເມືອງ​ແກ່ນ​ທ້າວ ແຂວງ​ໄຊ​ຍະ​ບູ​ລີ.

​ກ່າວມອບໂດຍ​​ທ່ານ ດ​ຣ. ຈັນ​ເພັງ ສຸດ​ທິ​ວົງ ກໍາມະການສູນກາງແນວລາວສ້າງຊາດ, ຫົວໜ້າຫ້ອງການ ສນຊ ກ່າວ​ຮັບ​ໂດຍ ທ່ານ ສຳ​ລານ ສຸ​ວັນ​ນະ​ໂຊດ ເຈົ້າ​ເມືອງ​ໆ​ແກ່ນ​ທ້າວ, ເປັນກຽດເຂົ້າຮ່ວມຂອງທ່ານ ດ​ຣ. ນ ວິ​ພາ​ວັນ ພົມ​ວິ​ຫານ (ຄອບຄົວທ່ານ ປະທານ ສນຊ), ມີ​ທ່ານ ນາງ ບຸນ​ໄທ ສິດ​ທະ​ວົງ ພັນ​ລະ​ຍາ ເຈົ້າ​ແຂວງ​ໄຊ​ຍະ​ບູ​ລີ, ທ່ານ ບົວ​ຈັນ ວັນພັນ ຮອງ​ປະ​ທານ​ແນວ​ລາວ​ສ້າງ​ຊາດ​ແຂວງ​ໄຊ​ຍະ​ບູລີ ພ້ອມດ້ວຍພະນັກງານ, ທະຫານ-ຕໍາຫຼວດເຂົ້າຮ່ວມ ໃນ​ວັນ​ທີ 22 ສິງ​ຫາ 2017.

​ເຄື່ອງທີ່ນຳມາມອບຄັ້ງນີ້, ປະ​ກອບມີ: ເຂົ້າ​ 150 ເປົາ, ນ້ຳ​ດື່ມ​ກາ​ຫົວ​ໃຈ 200 ຕຸກ ແລະ ​ເຄື່ອງ 200 ຖົງ, ລວມ​ມູນ​ຄ່າ 38.800.000 ກີບ.

ໃນ​ໂອ​ກາດນີ້, ທ່ານເຈົ້າ​ເມືອງ​ແກ່ນ​ທ້າວ ໄດ້​ຕາງ​ໜ້າ​ອຳ​ນາດ​ການ​ປົກ​ຄອງ ແລະ ພໍ່​ແມ່​ປະ​ຊາ​ຊົນ​ກໍ່​ຄື​ຄອບ​ຄົວ​ທີ່​ຖືກ​ຜົນ​ກະ​ທົບ ໄດ້​ສະ​ແດງ​ຄວາມ​ຂອບ​ໃຈ, ຄວາມ​ຮູ້​ບຸນ​ຄຸນ​ຢ່າງ​ສູງ​ຕໍ່​ກັບ​ສູນ​ກາງ​ແນວ​ລາວ​ສ້າງ​ຊາດ ແລະ ມູນ​ນິ​ທິ​ຊ່ວຍ​ເຫຼືອ​ຄົນ​ທຸກ​ຍາກ ​ທີ່​ໄດ້​ໃຫ້​ຄວາມ​ເປັນ​ຫ່ວງ​ເປັນ​ໃຍ​ທີ່​ນຳ​ເອົາ​ເຄື່ອງ​ຊ່ວຍ​ເຫຼືອ​ວັດ​ຖຸ​ປັດ​ໄຈ​ມາ​ມອບ​ໃຫ້​ໃນ​ຄັ້ງ​ນີ້ ແລະ ​ໃຫ້​ຄຳ​ໝັ້ນ​ສັນ​ຍາ​ວ່າ​ຈະ​ນຳ​ເຄື່ອງ ວັດ​ຖຸ​ດັ່ງ​ກ່າວ​ໄປ​ແຈກ​ຢາຍ​ໃຫ້​ຄອບ​ຄົວ​ທີ່​ຖືກ​ຜົນ​ກະ​ທົບ​ຢ່າງ​ທົ່ວ​ເຖິງ.

ກິດຈະກຳຮ່ວມນ້ຳໃຈໄປຊ່ວຍເຫຼືອຜູ້ປະສົບໄພນ້ຳຖ້ວມ ຢູ່ແຂວງອຸດົມໄຊ ແລະ ແຂວງໄຊຍະບູລີ ໄດ້ຈັດຂຶ້ນ ລະຫວ່າງໃນ ວັນທີ 16-18 ສິງຫາ 2017, ທີ່ສູນຝຶກອົບຮົມ ສູນກາງແນວແນວລາວສ້າງຊາດ (ສນຊ), ໂດຍມີບັນດານັກທຸລະກິດ, ບໍລິສັດ, ຫ້າງຮ້ານ ແລະ ປະຊາຊົນລາວບັນດາເຜົ່າ ໄດ້ຮ່ວມນ້ຳໃຈບໍລິຈາກ, ນຳເອົາເຄື່ອງອຸປະໂພກ-ບໍລິໂພກ ແລະ ເງິນສົດຈຳນວນໜຶ່ງ ມາອຸປະຖຳຄັ້ງນີ້ປະກອບມີ: ບໍລິສັດຫົງຖາໂຊກດີຈຳກັດ, ບໍລິສັດທິບພະຈັນກໍ່ສ້າງ ແລະ ຕິດຕັ້ງໄຟຟ້າ, ບໍລິສັດ CEO of Climax multimedia, ບໍລິສັດຈິດປະສົງຂົນສົ່ງທາງບົກ, ບໍລິສັດອີຊູຊູ ປະຈຳລາວ, ບໍລິສັດ ພີທີທີລາວຈຳກັດ, ພະອາຈານ ຄຳ ສອນ ສະທິມຸງຄຸນ ເຈົ້າອາທິການວັດຈອມມະນີ, ທ່ານ ນາງ ພອນວິໄລ ແສນປະເສີດ, ຄອບຄົວການນຳແຂວງສະຫວັນນະເຂດ ຮ່ວມກັບນັກທຸລະກິດຍິງ ແຂວງສະຫວັນນະເຂດ, ທ່ານ ນາງ ພູທອນ ພູມສະຫວັນ, ກຸ່ມກິລາລີລາດ ນະຄອນຫຼວງວຽງຈັນ, ຊາວກາໂທລິກນະຄອນຫຼວງວຽງຈັນ, ຮ້ານຂາຍຄຳແສງມະນີ (ປາກເຊ), ທ່ານ ນາງ ໄມບຸນ ວົງສາ, ຮ້ານ ນາງ ຈັນລອນ, ທ່ານ ກິ ອາລຸນວັນ ເຊິ່ງລວມມູນຄ່າທັງໝົດ 130 ລ້ານກວ່າກີບ

ໃນວັນທີ 19 ສິງຫາ ກຸ່ມສິລະປິນໜຸ່ມລາວ ຮ່ວມກັບ ສູນກາງແນວລາວສ້າງຊາດ ໄດ້ຈັດງານ ຄອນເສີດການກຸສົນລະດົມ ທຶນ ເພື່ອຊ່ວຍເຫຼືອຄອບຄົວທີ່ໄດ້ຮັບໄພພິບັດຈາກໄພນ້ຳຖ້ວມ ໃນບັນດາແຂວງພາກເໜືອ ພາຍໃຕ້ການເປັນປະທານຂອງທ່ານ ຈັນທະວົງ ແສນອາມາດມົນຕີ ຄະນະປະຈຳ ຮອງປະທານ ສູນກາງແນວລາວສ້າງຊາດ. ໃນງານຄັ້ງນີ້, ສາມາດລະດົມໄດ້ເຄື່ອງນຸ່ງ ຫົ່ມ, ອາຫານແຫ້ງ ແລະ ເງິນຈຳນວນໜຶ່ງ ຄິດເປັນມູນຄ່າ 10 ລ້ານກວ່າກີບ ແລະ ຍອດໂອນເຂົ້າລະຫັດບັນຊີມູນິທິຊ່ວຍເຫຼືອ ຄົນທຸກຍາກນຳອີກ, ເຄື່ອງຊ່ວຍເຫຼືອ, ວັດຖຸປັດໃຈທັງໝົດແມ່ນມອບໃຫ້ ສນຊ ນຳໄປມອບຕໍ່ ໃຫ້ຄອບຄົວທີ່ໄດ້ຮັບໄພພິບັດ ຈາກໄພນ້ຳຖ້ວມ ຢູ່ແຂວງອຸດົມໄຊ ແລະ ແຂວງ ໄຊຍະບູລິ.

ໂອກາດດັ່ງກ່າວ ຄະນະນໍາສູນກາງແນວລາວສ້າງຊາດ ກໍ່ໄດ້ສະແດງຄວາມຂອບໃຈເປັນຢ່າງຍີ່ງ ຕໍ່ບັນດານັກທຸລະກິດ, ບໍລິ ສັດ, ຫ້າງຮ້ານ ແລະ ປະຊາຊົນລາວບັນດາເຜົ່າ ຜູ້ທີ່ມີນ້ຳໃຈໃຫ້ການອຸປະຖຳ ນຳເອົາເຄື່ອງຊ່ວຍເຫຼືອຈຳນວນດັ່ງກ່າວ ມາຮ່ວມບໍ ລິຈາກໃນຄັ້ງນີ້.

info@lfnd.org.la | 021 213754 | (856-21) 453191