ທ່ານ ຄຳຂັນ ຈັນທະວີສຸກ ກຳມະການສູນກາງພັກ, ເຈົ້າແຂວງຫຼວງພະບາງ ໄດ້ຕ້ອນຮັບການເຂົ້າພົບປະຢ້ຽມຢາມ ຂອງທ່ານ ເລືອງ ກວກ ດວ່ານ ກຳມະການສູນກາງພັກ, ປະທານສູນກາງສະມາຄົມຊາວກະສິກອນຫວຽດນາມ ພ້ອມດ້ວຍຄະນະ ທີ່ແຂວງຫຼວງພະບາງ ໃນວັນທີ 8 ມີນາ 2024.

ທ່ານເຈົ້າແຂວງຫລວງພະບາງ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງຄະນະຜູ້ແທນ ໃນຄັ້ງນີ້ ເຊິ່ງເປັນການປະກອບສ່ວນເສີມສ້າງສາຍພົວພັນມິດຕະພາບແບບພິເສດ ແລະ ຮອບດ້ານ ລະຫວ່າງສອງພັກ, ສອງລັດ, ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ໃຫ້ເຂົ້າສູ່ລວງເລິກ. ພ້ອມກັນນີ້ ທ່ານ ເຈົ້າແຂວງ ຍັງໄດ້ລາຍງານກ່ຽວກັບສະພາບຈຸດພິເສດ, ທີ່ຕັ້ງ ແລະ ການພັດທະນາເສດຖະກິດ-ສັງຄົມ ຂອງແຂວງ ໂດຍຫຍໍ້ ເຊິ່ງໄດ້ໃຫ້ຮູ້ວ່າໃນໄລຍະຜ່ານມາ ຂະແໜງກະສິກຳ ໄດ້ມີການເຕີບໃຫຍ່ຂະຫຍາຍຕົວຫລາຍຂື້ນ ເຮັດໃຫ້ສາມາດກວມເອົາ 60% ຂອງລາຍຮັບແຂວງຫລວງພະບາງ ແລະ ຂະແໜງກະສິກຳຍັງໄດ້ກາຍເປັນແຫຼ່ງທ່ອງທ່ຽວ ອີກດ້ວຍ.

ທ່ານ ເລືອງ ກວກ ດວ່ານ ໄດ້ສະແດງຄວາມຂອບໃຈເປັນຢ່າງຍິ່ງຕໍ່ ທ່ານ ຄຳຂັນ ຈັນທະວີສຸກ ທີ່ໄດ້ຕ້ອນຮັບຄະນະ ພ້ອມທັງໄດ້ລາຍງານຈຸດປະສົງ ການມາຢ້ຽມຢາມ ແລະ ເຮັດວຽກ ຢູ່ ສປປ ລາວ ແລະ ໄດ້ຍົກໃຫ້ເປັນພາລະບົດບາດ, ສິດ ແລະ ໜ້າທີ່ ຂອງສະມາຄົມຊາວກະສິກອນຫວຽດນາມ ໃຫ້ທ່ານ ເຈົ້າແຂວງ ໄດ້ຮັບຊາບ ຕື່ມອີກ.

ຂ່າວ+ພາບ: ເຢ

ບກ: ຈິດຕະພົງ