ສູນກາງແນວລາວສ້າງຊາດ

Lao Front For National Development

ເຊກອງ ມີຄວາມພ້ອມໃນການດໍາເນີນກອງປະຊຸມໃຫຍ່ແນວລາວສ້າງຊາດ

ປັດຈຸບັນ ວຽກ​ງານ​ການກະກຽມຄວາມ​ພ້ອມ ​​ເພື່ອດໍາເນີນກອງປະຊຸມໃຫຍ່ຄັ້ງທີ VI ຂອງແນວລາວສ້າງຊາດແຂວງເຊກອງ ທີ່​ຈະ​ຈັດ​ຂຶ້ນ​ໃນທ້າຍ​ເດືອນນີ້ ​​ເຫັນ​ວ່າ​​ໄດ້ມີ​ຄວາມ​ພ້ອມ​​ 100%.

ວັນທີ 19 ມັງກອນ 2021 ນີ້ ທີ່ຫ້ອງປະຊຸມຫ້ອງວ່າການແຂວງ ຄະນະກໍາມະການຊີ້ນໍາລວມ ແລະບັນດາອານຸກໍາມະການກະກຽມກອງປະຊຸມໃຫຍ່ຄັ້ງທີ VI ຂອງຄະນະກໍາມະການແນວລາວສ້າງຊາດແຂວງ ໄດ້ຈັດກອງປະຊຸມລາຍງານຄວາມຄືບໜ້າ ຂອງການກະກຽມວຽກງານໃນດ້ານຕ່າງໆ ໂດຍການເປັນປະທານຂອງທ່ານ ນາງ ບຸນຮຽງ ບຸນຈິດ ກໍາມະການປະຈໍາພັກແຂວງ, ປະທານແນວລາວສ້າງຊາດແຂວງ ພ້ອມດ້ວຍບັນດາທ່ານຄະນະກໍາມະການຊີ້ນໍາລວມ, ອານຸກໍາມະການ ແລະໜ່ວຍງານຊ່ວຍວຽກຕ່າງໆເຂົ້າຮ່ວມ.

ທ່ານ ​ນາງ ບຸນຮຽງ ບຸນຈິດ ລາຍງານວ່າ: ມາ​ຮອດ​ປັດຈຸບັນ ​ວຽກງານ​ການ​ກະກຽມ​ຄວາມ​ພ້ອມ ​​ເພື່ອ​ດໍາເນີນກອງ​ປະຊຸມ​ໃຫຍ່ ​ຄັ້ງ​ທີ VI ຂອງ​ຄະນະກໍາມະການແນວລາວສ້າງຊາດແຂວງເຊກອງ ​ແມ່ນມີ​ຄວາມ​ພ້ອມ​ໃນ​ຫຼາຍ​ດ້ານ ​ໂດຍ​ສະ​ເພາະ​ວຽກ​ງານດ້ານເນື້ອໃນ, ວຽກງານໂຄງປະກອບບຸກຄະລາກອນ, ວຽກງານ ປກຊ-ປກສ, ວຽກງານຂະບວນການ, ປະດັບປະດາ, ວຽກງານໂຄສະນາ​ ​ແລະ ສ້າງ​ຂະ​ບວນການຕ່າງໆ. ນອກ​ນັ້ນ ຍັງ​ໄດ້​ປຸກລະດົມ​ໃຫ້​ທຸກ​ເມືອງ ​ແລະ ພະ​ແນ​ກ, ຫ້ອງການ​ຕ່າງໆ​ອ້ອມ​ຂ້າງ​ແຂວງ ປະກອບສ່ວນ​ສ້າງ​ຂະ​ບວນການ​ຕ່າງໆ ​ເພື່ອ​ເຮັດ​ໃຫ້​ແຂວງເຊກອງ ເປັນ​ແຂວງ​ທີ່​ໜ້າ​ຢູ່, ມີ​ຄວາມ​ສະຫງົບ, ປອດ​ໄພ ​ແລະ ສະອາດ​ງາມ​ຕາ ​ເພື່ອ​ກຽມ​ຄວາມ​ພ້ອມ​ໃຫ້​ແກ່ການດໍາເນີນກອງປະຊຸມ​ໃຫຍ່​ຄັ້ງ​ທີ VI ຂອງຄະນະກໍາມະການແນວລາວສ້າງຊາດແຂວງ, ກໍຄືເພື່ອຂໍານັບຮັບຕ້ອນບັ້ນເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະມາຊິກສະພາປະຊາຊົນຂັ້ນແຂວງຊຸດທີ II ໃຫ້ມີບັນຍາກາດຟົດຟື້ນ ແລະປະສົບ​ຜົນສຳ​ເລັດ​ຢ່າງ​ຈົບງາມ.

ສຳລັບ​ວຽກ​ງານ​ອະນາ​ໄມ ​ແລະ ​ປະດັບ​ປະດາ​ຕົວ​ເມືອງ ຜ່ານມາອານຸໂຄສະນາ, ພິທີການ, ຂະບວນການ ແລະ ຮັບແຂກ ກໍຄືໜ່ວຍງານປະດັບປະດາພາຍໃນ ແລະ ພາຍນອກໄດ້​ເປັນ​ເຈົ້າ​ການ ​ແລະ ​ເຮັດ​ດ້ວຍ​ຄວາມ​ຮັບຜິດຊອບ​ສູງ ​ໂດຍ​ສະ​ເພາະ​ວຽກ​ງານ​ຕົບ​ແຕ່ງ​ປະດັບ​ປະດາທຸງຊາດ, ທຸງ​ພັກ, ທຸງ​ທີ​ວ ​ແລະ ວຽກ​ງານ​ຕິດ​ຕັ້ງ​ປ້າຍ​ຄຳ​ຂວັນຕາມເສັ້ນທາງສໍາຄັນຕ່າງໆ​ ໃຫ້​ມີ​ຄວາມສວຍງາມ. ນອກ​ນັ້ນ ຍັງໄດ້ປຸກລະດົມບັນດາເມືອງ, ພະແນກ, ຫ້ອງການ ແລະ ປະຊາຊົນບັນດາເຜົ່າ​ໃຫ້​ເອົາ​ໃຈ​ໃສ່​ບັນດາ​ວຽກ​ງານ​ປ້ອງ​ກັນຊາ​ດ-ປ້ອງກັນຄວາມສະຫງົບ, ວຽກງານ​ຂະ​ບວນການ​ອອກ​ແຮງ​ງານຢູ່​ບໍລິ​ເວນ​ທີ່​ຕົນ​ຮັບຜິດຊອບໃຫ້​ມີ​ຄວາມ​ສະອາດ​ງາມ​ຕາ ​ແລະ ອື່ນໆ.

info@lfnd.org.la | 021 213754 | (856-21) 453191