ສູນກາງແນວລາວສ້າງຊາດ

Lao Front For National Development

ເຜີຍແຜ່ມະຕິກອງປະຊຸມໃຫຍ່ ຄັ້ງທີ VII ຂອງຜູ້ແທນແນວລາວສ້າງຊາດ ແຂວງສະຫວັນນະເຂດ

ວັນທີ 15 ກໍລະກົດ 2021 ນີ້ ຢູ່ສະໂມສອນຂອງນະຄອນໄກສອນພົມວິຫານ ແນວລາວສ້າງຊາດແຂວງສະຫວັນນະເຂດ ຮ່ວມກັບແນວລາວສ້າງຊາດນະຄອນ ໄດ້ຈັດພິທີເຜີຍແຜ່ມະຕິກອງປະຊຸມໃຫຍ່ ຄັ້ງທີ VII ຂອງຄະນະກຳມະການແນວລາວສ້າງຊາດແຂວງສະຫວັນນະເຂດຂຶ້ນ; ໃຫ້ກຽດເຜີຍແຜ່ໂດຍ ທ່ານ ສິນໄຊ ວົງລະຄອນ ຮອງປະທານແນວລາວສ້າງຊາດແຂວງ ມີບັນດາທ່ານການນຳນະຄອນ, ປະທານແນວລາວສ້າງຊາດນະຄອນ, ຫົວໜ້າຫ້ອງການອ້ອມຂ້າງ, ອຳນາດການປົກຄອງບ້ານ ແລະ ແຂກຖືກເຊີນເຂົ້າ.

ໃນພິທີ ທ່ານ ສິນໄຊ ວົງລະຄອນ ໄດ້ເຜີຍແຜ່ມະຕິກອງປະຊຸມໃຫຍ່ ຄັ້ງທີ VII ຂອງຄະນະກຳມະການແນວລາວສ້າງຊາດແຂວງ ເຊິ່ງທ່ານໄດ້ຍົກໃຫ້ເຫັນວ່າ: ກອງປະຊຸມຄັ້ງນີ້ໄດ້ຮັບຮອງເອົາບົດລາຍງານການເມືອງ ຂອງຄະນະກຳມະການແນວລາວສ້າງຊາດ ຊຸດທີ VII ທີ່ສາມາດຍາດໄດ້ຜົນງານ ແລະ ຜົນສຳເລັດໃນຫລາຍດ້ານ, ຮັກສາໄດ້ຄວາມສາມັກຄີປອງດອງ ອັນເປັນປຶກແຜ່ນແໜ້ນໜາຂອງປະຊາຊົນບັນດາເຜົ່າ ຊາວແຂວງສະຫວັນນະເຂດ ພາຍໃຕ້ການຊີ້ນຳຂອງພັກ, ສະຕິຕື່ນຕົວທາງດ້ານການເມືອງ ຂອງປະຊາຊົນບັນດາເຜົ່າ ໄດ້ຮັບການເຊີດຊູສູ່ລະດັບໃໝ່, ຂະບວນການຜະລິດເປັນສິນຄ້າເພື່ອແກ້ໄຂຄວາມທຸກຍາກ ຂອງປະຊາຊົນໄດ້ມີການຂະຫຍາຍຕົວ, ປະກົດການຫຍໍ້ທໍ້ຕ່າງໆໄດ້ຮັບການແກ້ໄຂ ແລະ ຫຼຸດໜ່ອຍຖອຍລົງເທື່ອລະກ້າວ, ສ້າງຄວາມເຊື່ອໝັ້ນຕໍ່ການຊີ້ນຳໆພາຂອງພັກ-ລັດ ໄດ້ຢ່າງໜັກແໜ້ນ ຈາກບົດຮຽນທີ່ຖອດຖອນໄດ້ ແລະ ພຶດຕິກຳຕົວຈິງ ຂອງຄະນະກຳມະການແນວລາວສ້າງຊາດແຂວງ ໃນໄລຍະຜ່ານມາ, ຜູ້ແທນ ແລະ ແຂກກອງປະຊຸມໄດ້ເປັນເອກະພາບຮັບຮອງເອົາທິດທາງແຜນການ – ຄາດໝາຍສູ້ຊົນໃນ 5 ປີຕໍ່ໜ້າຄື: ແຕ່ປີ 2021 – 2025. ສືບຕໍ່ເພີ່ມທະວີກ້ອນກຳລັງສາມັກຄີປອງດອງໃນທົ່ວປວງຊົນລາວບັນດາເຜົ່າ ພາຍໃນແຂວງໃຫ້ເປັນປຶກແຜ່ນແໜ້ນໜາ ຮັບປະກັນເຮັດໃຫ້ແຂວງສະຫວັນນະເຂດມີສະຖຽນລະພາບທາງດ້ານການເມືອງ, ມີຄວາມສະຫງົບ ແລະ ເປັນລະບຽບຮຽບຮ້ອຍທາງສັງຄົມ, ຕ້ານທຸກປະກົດການຫຍໍ້ທໍ້ທີ່ແບ່ງແຍກຄວາມສາມັກຄີບັນດາເຜົ່າ ແລະ ສາສະໜາ, ເອົາໃຈໃສ່ປັບປຸງການຈັດຕັ້ງແນວລາວສ້າງຊາດແຕ່ລະຂັ້ນ ໃຫ້ໄດ້ທາງດ້ານຈຳນວນ ແລະ ຄຸນນະພາບ ເປັນຕົ້ນແມ່ນ: ໂຄງປະກອບບຸກຄະລາກອນ ຕ້ອງປະກອບດ້ວຍສາມລຸ້ນຄື: ລຸ້ນອາວຸໂສ, ລຸ້ນກາງ ແລະ ລຸ້ນໜຸ່ມແໜ້ນ, ຕິດຕາມກວດກາບັນດາເມືອງ ແລະ ບ້ານ ທີ່ຄົບຮອບວາລະສະໄໝກອງປະຊຸມ ເພື່ອເປີດກອງປະຊຸມໃຫຍ່ຂັ້ນຂອງຕົນ ໃຫ້ຖືກຕ້ອງຕາມລະບຽບກົດໝາຍ ຂອງແນວລາວສ້າງຊາດ ພ້ອມທັງຝຶກອົບຮົມສ້າງຄວາມເຂັ້ມແຂງໃຫ້ແນວລາວສ້າງຊາດເມືອງ ແລະ ບ້ານໄດ້ເຄື່ອນໄຫວຕາມພາລະບົດບາດຂອງຕົນໃຫ້ດີຂື້ນເທື່ອລະກ້າວ, ນອກຈາກນີ້ ທ່ານກໍ່ຍັງໄດ້ເຜີຍແຜ່ ມະຕິ108/ກມສພ ວ່າດ້ວຍວຽກງານແນວໂຮມ ແລະ ວຽກງານມະຫາຊົນຂອງພັກໃນໄລຍະໃໝ່ອີກດ້ວຍ.

ໃນຕອນທ້າຍ ທ່ານ ສິນໄຊ ວົງລະຄອນ ຮອງປະທານແນວລາວສ້າງຊາດແຂວງ ໄດ້ເນັ້ນໜັກ ແລະ ມອບຄວາມຮັບຜິດຊອບໃຫ້ຄະນະກຳມະການແນວລາວສ້າງຊາດນະຄອນ ເປັນເຈົ້າການນຳເອົາເນື້ອໃນຈິດໃຈບົດລາຍງານການເມືອງ-ຄາດໝາຍສູ້ຊົນ ທີ່ກອງປະຊຸມໃຫຍ່ເທື່ອນີ້ ໄດ້ຮັບຮອງເອົາ ເພື່ອຫັນເປັນໂຄງການ, ກິດຈະກຳອັນລະອຽດໃນແຕ່ລະໄລຍະ ພ້ອມທັງຊີ້ນຳ-ນຳພາ ຈັດຕັ້ງປະຕິບັດ ໃຫ້ບັນລຸຕາມຈຸດປະສົງ ແລະ ເປົ້າໝາຍທີ່ວາງໄວ້.

ບກ: ສຊ ຈື້ໄຊ

info@lfnd.org.la | 021 213754 | (856-21) 453191