ສູນກາງແນວລາວສ້າງຊາດ

Lao Front For National Development

ເຜີຍແຜ່ມະຕິກອງປະຊຸມໃຫຍ່ຄັ້ງທີ VII ຂອງຜູ້ແທນແນວລາວສ້າງຊາດ ແຂວງສະຫວັນນະເຂດ ຢູ່ເມືອງຊົນນະບູລີ ແລະ ເມືອງຈຳພອນ

ເພື່ອຂ່ຳນັບຮັບຕ້ອນວັນສ້າງຕັ້ງແນວລາວສ້າງຊາດ ຄົບຮອບ 71 ປີ(13 ສິງຫາ 1950-13 ສິງຫາ 2021).ໃນວັນທີ 11 ສິງຫາ 2021 ນີ້ ຄະນະກຳມະການແນວລາວສ້າງຊາດແຂວງ ໄດ້ລົງເຜີຍແຜ່ມະຕິກອງປະຊຸມໃຫຍ່ຄັ້ງທີ VII ຂອງຜູ້ແທນແນວລາວສ້າງຊາດ ແຂວງສະຫວັນນະເຂດ ເປັນກຽດເຜີຍແຜ່ໂດຍ ທ່ານ ຄຳຕູ່ນ ສົມສະນິດ ຮອງປະທານແນວລາວສ້າງຊາດແຂວງ, ກອງປະຊຸມໃນຄັ້ງນີ້ແມ່ນໄດ້ຄົ້ນຄວ້າປະກອບຄຳເຫັນຢ່າງເລິກເຊິ່ງ ແລະ ຮັບຮອງເອົາບົດລາຍງານການເມືອງ ຂອງຄະນະກຳມະການແນວລາວສ້າງຊາດ ຊຸດທີ VII ທີ່ສາມາດຍາດໄດ້ຜົນງານ ແລະຜົນສຳເລັດໃນຫລາຍໆດ້ານ, ຮັກສາໄດ້ຄວາມສາມັກຄີປອງດອງອັນເປັນປຶກແຜ່ນແໜ້ນໜາ ຂອງປະຊາຊົນບັນດາເຜົ່າ ໃຕ້ການຊີ້ນຳຂອງພັກ, ສະຕິຕື່ນຕົວທາງດ້ານການເມືອງ ຂອງປະຊາຊົນບັນດາເຜົ່າໄດ້ຮັບການເຊີດຊູສູ່ລະດັບໃໝ່, ຂະບວນການຜະລິດເປັນສິນຄ້າເພື່ອແກ້ໄຂຄວາມທຸກຍາກ ໄດ້ຮັບການຂະຫຍາຍຕົວ, ປະກົດການຫຍໍ້ທໍ້ຕ່າງໆໄດ້ຮັບການແກ້ໄຂ ແລະ ຫລຸດໜ້ອຍຖອຍລົງເທື່ອລະກ້າວສ້າງຄວາມເຊື່ອໝັ້ນຕໍ່ການຊີ້ນຳໆພາຂອງພັກ-ລັດໄດ້ຢ່າງໜັກແໜ້ນ, ຈາກບົດຮຽນທີ່ຖອດຖອນໄດ້ ແລະ ພຶດຕິກຳຕົວຈິງຂອງຄະນະກຳມະການແນວລາວສ້າງຊາດແຂວງ ໃນໄລຍະຜ່ານມາ;  ຜູ້ແທນ ແລະ ແຂກກອງປະຊຸມໄດ້ເປັນເອກະພາບຮັບຮອງເອົາທິດທາງແຜນການ-ຄາດໝາຍສູ້ຊົນໃນ 5 ປີຕໍ່ໜ້າ, ສືບຕໍ່ເພີ່ມທະວີກ້ອນກຳລັງສາມັກຄີປອງດອງໃນທົ່ວປວງຊົນລາວບັນດາເຜົ່າ, ຮັບປະກັນເຮັດໃຫ້ແຂວງສະຫວັນນະເຂດມີສະຖຽນລະພາບທາງດ້ານການເມືອງ, ມີຄວາມສະຫງົບ ແລະ ເປັນລະບຽບຮຽບຮ້ອຍ ທາງສັງຄົ, ຕ້ານທຸກປະກົດການຫຍໍ້ທໍ້ທີ່ແບ່ງແຍກຄວາມສາມັກຄີບັນດາເຜົ່າ ແລະ ສາສະໜາ, ເອົາໃຈໃສ່ປັບປຸງກົງຈັກການຈັດຕັ້ງແນວລາວສ້າງຊາດແຕ່ລະຂັ້ນ ໃຫ້ໄດ້ປະລິມານ ແລະ ຄຸນນະພາບ ເປັນຕົ້ນແມ່ນ: ໂຄງປະກອບບຸກຄະລາກອນຕ້ອງແທດເໝາະກັບວຽກງານຕົວຈິງ ແລະ ປະກອບດ້ວຍສາມລຸ້ນຄື: ລຸ້ນອາວຸໂສ, ລຸ້ນກາງ , ລຸ້ນໜຸ່ມແໜ້ນ; ນອກນັ້ນຍັງຕ້ອງຕິດຕາມກວດກາບັນດາເມືອງ ແລະ ບ້ານ ທີ່ຄົບຮອບວາລະສະໄໝກອງປະຊຸມ ເພື່ອເປີດກອງປະຊຸມໃຫຍ່ຂັ້ນຂອງຕົນ ໃຫ້ຖືກຕ້ອງຕາມລະບຽບກົດໝາຍ ຂອງແນວລາວສ້າງຊາດ ພ້ອມທັງຝຶກອົບຮົມ ສ້າງຄວາມເຂັ້ມແຂງໃຫ້ແນວລາວສ້າງຊາດເມືອງ ແລະ ບ້ານໄດ້ເຄື່ອນໄຫວຕາມພາລະບົດບາດຂອງຕົນໃຫ້ດີຂຶ້ນເລື້ອຍໆ ພິທີໄດ້ຈັດຂຶ້ນຢູ່ທີ່ສະໂມສອນຂອງເມືອງຊົນນະບູລີ ແລະ ເມືອງຈຳພອນ; ມີບັນດາທ່ານການນຳເມືອງ, ຫົວໜ້າຫ້ອງການອ້ອມຂ້າງ ແລະ ແຂກຖືກເຊີນພາຍໃນ 2 ເມືອງເຂົ້າຮ່ວມ ລວມທັງໝົດ 85 ທ່ານ, ຍິງ 18 ທ່ານ.

ໃນຕອນທ້າຍພິທີ ທ່ານ ຄຳຕຸ່ນ ສົມສະນິດ ຮອງປະທານແນວລາວສ້າງຊາດແຂວງ ໄດ້ເນັ້ນໜັກ ແລະ ມອບຄວາມຮັບຜິດຊອບໃຫ້ຄະນະກຳມະການແນວລາວສ້າງຊາດເມືອງ ເປັນເຈົ້າການນຳເອົາເນື້ອໃນຈິດໃຈບົດລາຍງານການເມືອງ-ຄາດໝາຍສູ້ຊົນ ທີ່ກອງປະຊຸມໃຫຍ່ເທື່ອນີ້ໄດ້ຮັບຮອງເອົາ ເພື່ອຫັນເປັນໂຄງການກິດຈະກຳອັນລະອຽດໃນແຕ່ລະໄລຍະ ພ້ອມທັງຊີ້ນຳໆພາ ຈັດຕັ້ງປະຕິບັດ ໃຫ້ບັນລຸຕາມຈຸດປະສົງລະດັບຄາດໝາຍທີ່ວາງໄວ້ໃນແຕ່ລະໄລຍະ.

info@lfnd.org.la | 021 213754 | (856-21) 453191