ສູນກາງແນວລາວສ້າງຊາດ

Lao Front For National Development

ເຜີຍແຜ່ມະຕິກອງປະຊຸມໃຫຍ່ ຄັ້ງທີ VII ຂອງຜູ້ແທນແນວລາວສ້າງຊາດ ແຂວງສະຫວັນນະເຂດ ຢູ່ເມືອງສອງ​ຄອນ

ໃນຕອນເຊົ້າຂອງວັນທີ 9 ກໍລະກົດ 2021 ນີ້ ຢູ່ສະໂມສອນຂອງເມືອງສອງ​ຄອນ ແນວລາວສ້າງຊາດແຂວງສະຫວັນນະເຂດ ຮ່ວມກັບແນວລາວສ້າງຊາດເມືອງສອງ​ຄອນ ຈັດພິທີເຜີຍແຜ່ເອກະສານມະຕິກອງປະຊຸມໃຫຍ່ ຄັ້ງທີ VII ຂອງຄະນະກຳມະການແນວລາວສ້າງຊາດແຂວງສະຫວັນນະເຂດ; ໃຫ້ກຽດເຜີຍແຜ່ເອກສານແມ່ນ ທ່ານ ສິນໄຊ ວົງລະຄອນ ຮອງປະທານແນວລາວສ້າງຊາດແຂວງມີບັນດາທ່ານການນຳເມືອງ,ປະ​ທານ​ແນວ​ລາວ​ສ້າງ​ຊາດ​ເມືອງ, ຫົວໜ້າຫ້ອງການອ້ອມຂ້າງ, ອາ​ນາດ​ການ​ປົກ​ຄອງ​ບ້ານ​ຈຳ​ນວນ 23 ບ້ານ ແລະ ແຂກຖືກເຊີນເຂົ້າຮ່ວມ.

ໃນພິທີ ທ່ານຮອງປະທານແນວລາວສ້າງຊາດແຂວງ ໄດ້ເຜີຍແຜ່ມະຕິ VII ຂອງຄະນະກຳມະການແນວລາວສ້າງຊາດແຂວງສະຫວັນນະເຂດ ເຊິ່ງກອງປະຊຸມຄັ້ງນີ້ໄດ້ຄົ້ນຄວ້າປະກອບຄຳເຫັນຢ່າງເລິກເຊິ່ງ ແລະ ຮັບຮອງເອົາບົດລາຍງານການເມືອງຂອງຄະນະກຳມະການແນວລາວສ້າງຊາດ ຊຸດທີ VII ທີ່ສາມາດຍາດໄດ້ຜົນງານ ແລະ ຜົນສຳເລັດໃນຫລາຍດ້ານ, ຮັກສາໄດ້ຄວາມສາມັກຄີປອງດອງອັນເປັນປຶກແຜ່ນແໜ້ນໜາ ຂອງປະຊາຊົນບັນດາເຜົ່າ ຊາວແຂວງສະຫວັນນະເຂດ ພາຍໃຕ້ການຊີ້ນຳຂອງພັກ, ມີສະຕິຕື່ນຕົວທາງດ້ານການເມືອງ ຂອງປະຊາຊົນບັນດາເຜົ່າ ໄດ້ຮັບການເຊີດຊູສູ່ລະດັບໃໝ່, ຂະບວນການຜະລິດເປັນສິນຄ້າເພື່ອແກ້ໄຂຄວາມທຸກຍາກ ຂອງປະຊາຊົນໄດ້ມີການຂະຫຍາຍຕົວ,ປະກົດການຫຍໍ້ທໍ້ຕ່າງໆໄດ້ຮັບການແກ້ໄຂ ແລະ ຫລຸດໜ່ອຍຖອຍລົງເທື່ອລະກ້າວ, ສ້າງຄວາມເຊື່ອໝັ້ນຕໍ່ການຊີ້ນຳໆພາຂອງພັກ-ລັດໄດ້ຢ່າງໜັກແໜ້ນ ຈາກບົດຮຽນທີ່ຖອດຖອນໄດ້ ແລະ ພຶດຕິກຳຕົວຈິງ ຂອງຄະນະກຳມະການແນວລາວສ້າງຊາດແຂວງ ໃນໄລຍະຜ່ານມາ, ຜູ້ແທນ ແລະ ແຂກກອງປະຊຸມໄດ້ເປັນເອກະພາບຮັບຮອງເອົາທິດທາງແຜນການ-ຄາດໝາຍສູ້ຊົນໃນ 5 ປີຕໍ່ໜ້າ ຄື: ແຕ່ປີ 2021 – 2025.

ສືບຕໍ່ເພີ່ມທະວີກ້ອນກຳລັງສາມັກຄີປອງດອງທົ່ວປວງຊົນລາວບັນດາເຜົ່າ ພາຍໃນແຂວງໃຫ້ເປັນປຶກແຜ່ນແໜ້ນໜາ ຮັບປະກັນເຮັດໃຫ້ແຂວງສະຫວັນນະເຂດມີສະຖຽນລະພາບທາງດ້ານການເມືອງ, ມີຄວາມສະຫງົບ ແລະເປັນລະບຽບຮຽບຮ້ອຍທາງສັງຄົມ, ຕ້ານທຸກປະກົດການຫຍໍ້ທໍ້ທີ່ແບ່ງແຍກຄວາມສາມັກຄີບັນດາເຜົ່າ ແລະ ສາສະໜາ,ເອົາໃຈໃສ່ປັບປຸງການຈັດຕັ້ງແນວລາວສ້າງຊາດແຕ່ລະຂັ້ນ ໃຫ້ໄດ້ທາງດ້ານຈຳນວນ ແລະ ຄຸນນະພາບ ເປັນຕົ້ນແມ່ນ:ໂຄງປະກອບບຸກຄະລາກອນ ຕ້ອງປະກອບດ້ວຍສາມລຸ້ນຄື: ລຸ້ນອາວຸໂສ, ລຸ້ນກາງ ແລະລຸ້ນໜຸ່ມແໜ້ນ, ຕິດຕາມກວດກາບັນດາເມືອງ ແລະ ບ້ານ ທີ່ຄົບຮອບວາລະສະໄໝກອງປະຊຸມ ເພື່ອເປີດກອງປະຊຸມໃຫຍ່ຂັ້ນຂອງຕົນ ໃຫ້ຖືກຕ້ອງຕາມລະບຽບກົດໝາຍ ຂອງແນວລາວສ້າງຊາດ ພ້ອມທັງຝຶກອົບຮົມ ສ້າງຄວາມເຂັ້ມແຂງໃຫ້ແນວລາວສ້າງຊາດເມືອງ ແລະ ບ້ານໄດ້ເຄື່ອນໄຫວຕາມພາລະບົດບາດຂອງຕົນໃຫ້ດີຂື້ນເທື່ອລະກ້າວ.

ຕອນທ້າຍພິທີ ທ່ານ ສິນ​ໄຊ ວົງ​ລະ​ຄອນ ໄດ້ເນັ້ນໃຫ້ຄະນະກຳມະການແນວລາວສ້າງຊາດເມືອງ ຈົ່ງເປັນເຈົ້າການນຳເອົາເນື້ອໃນຈິດໃຈບົດລາຍງານການເມືອງ-ຄາດໝາຍສູ້ຊົນ ທີ່ກອງປະຊຸມໃຫຍ່ເທື່ອນີ້ໄດ້ຮັບຮອງເອົາ ເພື່ອຫັນເປັນໂຄງການ, ກິດຈະກຳອັນລະອຽດໃນແຕ່ລະໄລຍະ ພ້ອມທັງຊີ້ນຳໆພາ ຈັດຕັ້ງປະຕິບັດ ໃຫ້ບັນລຸຕາມຈຸດປະສົງ ແລະ ເປົ້າໝາຍທີ່ວາງໄວ້​ໃນ​ແຕ່​ລະ​ໄລ​ຍະ.

info@lfnd.org.la | 021 213754 | (856-21) 453191