ສູນກາງແນວລາວສ້າງຊາດ

Lao Front For National Development

ເມືອງບໍ່ແຕນຮັບຮອງເປັນເມືອງສາມັກຄີປອງດອງ

ວັນທີ 24 ມີນາ 2021 ນີ້, ແຂວງໄຊຍະບູລີໄດ້ຈັດພິທີປະກາດຮັບຮອງ ເອົາເມືອງບໍ່ແຕນ ເປັນເມືອງຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ຂຶ້ນຢູ່ທີ່ເດີ່ນກິລາຂອງເມືອງ, ພາຍໃຕ້ການເປັນປະທານຂອງ ທ່ານ ສົມສະໜຸກ ໄຊອຸດົມ ວ່າການເລຂາພັກເມືອງ, ເຈົ້າເມືອງໆບໍ່ແຕນ, ເປັນກຽດເຂົ້າຮ່ວມຂອງທ່ານ ພົງສະຫວັນ ສິດທະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງໄຊຍະບູລີ ແລະ ທ່ານ ຄຳສີ ແພງສະຫວັນ ກຳມະການປະຈຳພັກແຂວງ, ປະທານແນວລາວສ້າງຊາດແຂວງ, ມີແຂກຖືກເຊີນຂັ້ນແຂວງ ແລະ ເມືອງອ້ອມຂ້າງ, ການນຳຂອງເມືອງ, ອົງການຈັດຕັ້ງບ້ານ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ທ່ານ ສົມສະໜຸກ ໄຊອຸດົມ ໄດ້ຂຶ້ນກ່າວເປີດພິທີຢ່າງເປັນທາງການ, ຫຼັງຈາກນັ້ນ ທ່ານ ໄມແຍງ ເພັດກວ້າງ ກຳມະການປະຈຳພັກເມືອງ, ປະທານແນວລາວສ້າງຊາດເມືອງ ໄດ້ຂຶ້ນລາຍງານການຈັດຕັ້ງປະຕິບັດ ຂະບວນການສ້າງຄອບຄົວ ແລະ ບ້ານສາມັກຄີປອງດອງ ຂອງແນວລາວສ້າງຊາດ ໃນໄລຍະຜ່ານມາ ເຊິ່ງການຈັດຕັ້ງປະຕິບັດຂະບວນການດັ່ງກ່າວ ແມ່ນໄດ້ເລີ່ມແຕ່ ປີ 2017 ເປັນຕົ້ນມາ, ໄດ້ເປີດຂະບວນການສ້າງຂໍ້ແຂ່ງຂັນ ໄດ້ທັງໝົດ 26 ບ້ານ, ມີ 3,693 ຄອບຄົວ. ຜ່ານການຕິດຕາມ, ກວດກາ ແລະ ປະເມີນຜົນ ສາມາດປະກາດຮັບຮອງເປັນບ້ານສາມັກຄີປອງດອງໄດ້ 25 ບ້ານ ກວມເອົາ 96,15% ແລະ ສາມາດຮັບຮອງຄອບຄົວສາມັກຄີປອງດອງໄດ້ 3,631 ຄອບຄົວ, ກວມເອົາ 98,32%.

ຜົນສຳເລັດຂອງການຈັດຕັ້ງປະຕິບັດ ຂະບວນການສ້າງຄອບຄົວ ແລະ ບ້ານສາມັກຄີປອງດອງ ໄດ້ເປັນພື້ນຖານອັນສຳຄັນ ໃນການສ້າງຄວາມເຂັ້ມແຂງຂອງເມືອງ, ເສດຖະກິດ-ສັງຄົມຂອງເມືອງ ຂະຫຍາຍຕົວຢ່າງຕໍ່ເນື່ອງ, ລາຍຮັບສະເລ່ຍ 2,685 ໂດລາຕໍ່ຄົນຕໍ່ປີ. ໃນພິທີ, ທ່ານ ເຈົ້າແຂວງໄຊຍະບູລີ ໃຫ້ກຽດຂຶ້້ນມອບໃບຢັ້ງຢືນ ເມືອງຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ແລະ ເປັນກຽດຂຶ້ນຮັບໂດຍ ທ່ານ ສົມສະໜຸກ ໄຊອຸດົມ, ຫຼັງຈາກນັ້ນຄະນະປະທານ ພ້ອມດ້ວຍຜູ້ເຂົ້າຮ່ວມ ກໍ່ໄດ້ຮ່ວມກັນລັ່ນຄ້ອງ 9 ບາດ ແລະ ຕັດແຖບຜ້າເປີດປ້າຍຢ່າງເປັນທາງການ.

info@lfnd.org.la | 021 213754 | (856-21) 453191