ສູນກາງແນວລາວສ້າງຊາດ

Lao Front For National Development

ແຂວງໄຊສົມບູນ ປະຖະກະຖາ 3 ວັນປະຫັວດສາດສຳຄັນຂອງຊາດ

ວັນທີ 16 ສີຫາ 2021 ນີ້ ຢູ່ທີ່ສະໂມສອນຂອງແຂວງໄຊສົມບູນ ໄດ້ຈັດພິທີປາຖະກະຖາວັນລັດຖະທໍາມະນູນ ແຫ່ງຊາດ ຄົບຮອບ 30 ປີ, ປະຖະກະຖາວັນສ້າງຕັ້ງແນວລາວສ້າງຊາດ ຄົບຮອບ 71 ປີ( 13 ສິງຫາ 1950-13 ສິງຫາ 2021 ), ປະຖະກະຖາວັນສ້າງຕັ້ງສື່ມວນຊົນ ຄົບຮອບ 71 ປີ. ໂດຍໃຫ້ກຽດເຂົ້າຮ່ວມຂອງທ່ານ ພົນຕີ ຄຳລຽງ ອຸທະໄກສອນ ກໍາມະການສູນກາງພັກ, ເລຂາພັກແຂວງ ເຈົ້າແຂວງໄຊສົມບູນ, ມີການນໍາແຂວງ, ພະນັກງານອາວຸໂສບຳນານ, ຜູ້ຊົງຄຸນວຸດທິ, ພຣະສົງ, ນັກຮົບແຂ່ງຂັນ, ສອງກອງກໍາລັງປ້ອງກັນຊາດ-ປ້ອງກັນຄວາມສະຫງົບ, ຕົວແທນຊົນເຜົ່າ, ສາສະຫນາ, ພະນັກງານຫຼັກແຫຼ່ງ ຕະຫຼອດຮອດນັກຮຽນຮູ້ປັນຍາຊົນອ້ອມຂ້າງແຂວງເຂົ້າຮ່ວມ.

ໃນພິທີ ທ່ານ ແດງ ປະທຸມທອງ ຮອງເລຂາພັກແຂວງ ປະທານສະພາປະຊາຊົມແຂວງ ໄດ້ຍົກໃຫ້ເຫັນຄວາມ ເປັນມາ ແລະ ຄວາມໝາຍຄວາມສໍາຄັນຂອງລັດຖະທໍາມະນູນ ແຫ່ງຊາດໂດຍສັງເຂບ ເຊິ່ງທ່ານໄດ້ໃຫ້ຮູ້ວ່າ: ລັດຖະທໍາມະນູນ ແຫ່ງຊາດ ແມ່ນແນວທາງທາງປ່ຽນແປງໃຫມ່ຮອບດ້ານ, ມີຫຼັກການຂອງພັກ ທີ່ໄດ້ຖືກຫັນມາເປັນກົດໝາຍພື້ນຖານຂອງລັດເຮົາ ຊຶ່ງເປັນເຄື່ອງມືພື້ນຖານໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ຂອງລັດເຮົາແນ່ໃສ່ເຮັດໃຫ້ປະເທດຊາດມີສະຖຽນລະພາບ ທາງດ້ານການເມືອງຢ່າງຫມັ້ນທ່ຽງ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ທັງເປັນພື້ນຖານໃຫ້ແກ່ການພັດທະນາກົດໝາຍ ຂອງປະເທດເຮົາໃຫ້ເປັນລະບົບ, ຄົບຊຸດ ແລະ ເຂັ້ມແຂງຂຶ້ນເທື່ອລະກ້າວ, ຮັບປະກັນໃຫ້ແກ່ການປົກປັກຮັກສາ ແລະ ສ້າງສາພັດທະນາປະເທດຊາດ.

ພ້ອມກັນນີ້, ທ່ານ ເລັ່ງຊົ່ງ ຕົ່ງສີ ຄະນະປະຈໍາພັກແຂວງ ປະທານແນວລາວສ້າງຊາດແຂວງ ໄດ້ຂຶ້ນຜ່ານບົດລາຍງານຜົນສໍາເລັດ ກອງປະຊຸມໃຫຍ່ຄັ້ງທີ I ຂອງແນວລາວສ້າງຊາດແຂວງ ແລະ ມູນເຊື້ອອັນສະຫງ່າລາສີ ຂອງແນວລາວສ້າງຊາດ ຕະຫຼອດໄລຍະ 71 ປີ ຜ່ານມາ,  ທ່ານໄດ້ຍົກໃຫ້ເຫັນປະຫວັດສາດ ແຫ່ງການກໍາເນີດ ແລະ ການເຕີບໃຫຍ່ຂະຫຍາຍຕົວຂອງແນວລາວສ້າງຊາດ ໃນແຕ່ລະໄລຍະ ຄື: ໄລຍະແນວລາວອິດສະຫຼະ, ແນວລາວຮັກຊາດ ໃນເມື່ອກ່ອນ ແລະ ແນວລາວສ້າງຊາດ ໃນປະຈຸບັນ, ເພື່ອເຮັດໃຫ້ພະນັກງານ-ລັດຖະກອນ ເປັນຜູ້ນໍາທີ່ມີຄວາມຈົ່ງຮັກພັກດີຕໍ່ອຸດົມການປະຕິວັດຢ່າງເດັດຂາດ, ຍາມໃດກໍຍົກສູງສະຕິລະບຽບວິໄນຕໍ່ການຈັດຕັ້ງ ນັບຖືຫມູ່ຄະນະ, ມີນ້ໍາໃຈຮັກຊາດອັນດູດດື່ມ, ມີທັດສະນະຫຼັກໝັ້ນອັນໜັກແໜັນ, ມີນ້ໍາໃຈເສຍສະຫຼະອັນສູງສົງ ເພື່ອຊາດ ເພື່ອປະຊາຊົນ ສືບຕໍ່ເພີ່ມທະວີຄວາມສາມັກຄີທົ່ວປວງຊົນ.

ໂອກາດນີ້, ທ່ານ ຕົ່ງມົວ ຊົວໂກ້ ຄະນະປະຈໍາພັກແຂວງ ຮອງເຈົ້າແຂວງ ໄດ້ຫວນຄືນມູນເຊື້ອວັນສ້າງຕັ້ງສື່ມວນຊົນ ຄົບຮອບ 71 ປີ, ສື່ມວນຊົນລາວໃນແຕ່ລະໄລຍະ ຕິດພັນສະໜິດແໜ້ນກັບປະຫັວດສາດຂອງຊາດ, ຂອງພັນ, ຂອງການປະຕິວັດ ແລະ ຂອງປະຊາຊົນບັນດາເຜົ່າ, ພັກເຮົາໄດ້ສ້າງຕັ້ງໜັງສືພິມລາວອິດສະຫຼະ ເຊິ່ງປະຈຸບັນແມ່ນໜັງສືພິມປະຊາຊົນ ສະບັບທຳອິດ ແລະ ສ້າງຕັ້ງໂຮງພິມລາວອິດສະຫຼະ ຂື້ນໃນວັນດຽວກັນ ຄືວັນທີ 13 ສິງຫາ 1950 ເຊິ່ງແມ່ນທີ່ມາຂອງວັນສື່ມວນຊົນ ແລະ ການພິມຈໍາໜ່າຍ.

info@lfnd.org.la | 021 213754 | (856-21) 453191