ສູນກາງແນວລາວສ້າງຊາດ

Lao Front For National Development

ແຂວງ ຄໍາມ່ວນຈັດພິທີປາຖະກະຖາຫວນຄືນມູນເຊື້ອວັນສ້າງຕັ້ງແນວລາວສ້າງຊາດ ຄົບຮອບ 71 ປີ

ພິທີປາຖະກະຖາຫວນຄືນມູນເຊື້ອວັນສ້າງຕັ້ງແນວລາວສ້າງຊາດ ຄົບຮອບ 71 ປີ(13/8/1950-13/8/2021) ໄດ້ຈັດຂຶ້ນໃນຕອນເຊົ້າວັນທີ່ 26 ສິງຫາ 2021 ນີ້ ຢູ່ທີ່ຫ້ອງປະຊຸມເບີ 1 ຂອງແຂວງ, ໂດຍເປັນກຽດປາຖະກະຖາຂອງທ່ານ ວົງເພັດ ຈິດປັນຍາ ຮອງເລຂາພັກແຂວງ, ມີຄະນະປະທານແນວລາວສ້າງຊາດແຂວງ, ຄະນະກໍາມະການສູນກາງແນວລາວສ້າງຊາດທີ່ປະຈໍາຢູ່ແຂວງ, ກໍາມະການແນວລາວສ້າງຊາດແຂວງ ພ້ອມດ້ວຍພະນັກງານແນວລາວສ້າງຊາດແຂວງຄໍາມ່ວນ ເຂົ້າຮ່ວມ.

ພິທີດັ່ງກ່າວ, ໄດ້ຮັບຟັງການຫວນຄືນມູນເຊື້ອແຫ່ງການກໍາເນີດເຕີບໃຫຍ່ ແລະ ການຂະຫຍາຍຕົວ ຂອງອົງການແນວລາວສ້າງຊາດ ໃນໄລຍະ 71 ປີຜ່ານມາ ທັງ 3 ໄລຍະ ຄື: ໄລຍະແນວລາວອິດສະຫຼະ ( 1950-1956), ໄລຍະແນວລາວຮັກຊາດ (1956-1979) ແລະ ໄລຍະແນວລາວສ້າງຊາດ (1979-ປະຈຸບັນນີ້), ເຊິ່ງນັບແຕ່ມື້ໄດ້ຮັບການສ້າງຕັ້ງອົງການແນວລາວສ້າງຊາດ ແມ່ນໄດ້ສ້າງຜົນງານອັນພົ້ນເດັ່ນໃນການຕໍ່ສູ້ຕ້ານກັບຈັກກະພັດ ແລະ ລູກມືຂາຍຊາດ, ປຸກລະດົມຂົນຂວາຍເຕົ້າໂຮມຄວາມສາມັກຄີມະຫາຊົນ ກໍ່ຄືປະຊາຊົນບັນດາເຜົ່າ ໃຫ້ເຂົ້າຮ່ວມສ້າງພື້ນຖານ ແລະ ສ້າງກຳລັງປະຕິວັດອັນເປັນປັດໃຈ ທີ່ໜັກແໜ້ນໃຫ້ແກ່ການຕໍ່ສູ້ທີ່ຢືດເຍື້ອຍາວນານ ຂອງປະຊາຊົນລາວ ສາມາດຕີເອົາຊະນະຈັກກະພັດທີ່ໃຫຍ່ໂຕ ແລະ ປົດປ່ອຍປະເທດຊາດອອກຈາກແອກຄອບຄອງ ຂອງຈັກກະພັດລ່າເມືອງຂຶ້ນ ໂດຍບົວບໍ່ຊໍ້ານໍ້າບໍ່ຂຸ່ນ. ພາຍຫຼັງທີ່ປະເທດຊາດ ໄດ້ຮັບການປົດປ່ອຍຢ່າງສົມບູນ ອົງການແນວລາວສ້າງຊາດກໍ່ໄດ້ເຕີບໃຫຍ່ ຂະຫຍາຍຕົວທາງດ້ານການຈັດຕັ້ງ ແລະ ໄດ້ຮ່ວມກັບບັນດາອົງການຈັດຕັ້ງສັງຄົມ ເພື່ອຍົກສູງບົດບາດໃນການເຕົ້າໂຮມ ກ້ອນກຳລັງມະຫາສາມັກຄີປອງດອງ ທົ່ວປວງຊົນ, ໂຄສະນາ-ສຶກສາອົບຮົມປະຊາຊົນຢ່າງກວ້າງຂວາງ, ເສີມຂະຫຍາຍສິດເປັນເຈົ້າປະຊາຊົນ ປະຕິບັດສອງໜ້າທີ່ຍຸດທະສາດ ນຳພາປະເທດຊາດກ້າວຂຶ້ນສູ່ຄວາມພັດທະນາຢ່າງບໍ່ຢຸດຢັ້ງ.

ໃນໂອກາດວັນສ້າງຕັ້ງແນວລາວສ້າງຊາດ ຄົບຮອບ 71 ປີແນວລາວສ້າງຊາດແຂວງ ຄໍາມ່ວນໄດ້ມີການສ້າງຂະບວນການຫຼາຍຢ່າງເປັນຕົ້ນແມ່ນ: ໄດ້ປຸກລະດົມວັດຖຸສິ່ງຂອງ, ເຄື່ອງອຸປະໂພກ, ບໍລິໂພກ, ຈາກພາກສ່ວນຕ່າງໆເພື່ອໄປຊ່ວຍ ເຫຼືອຜູ້ທີ່ຖືກຜົນກະທົບຈາກໄພພິບັດ, ປະຊາຊົນຜູ້ທຸກຍາກ ແລະ ປະກອບສ່ວນຊ່ວຍເຫຼືອໃຫ້ຄະນະສະເພາະກິດຂັ້ນແຂວງ ເພື່ອນໍາໃຊ້ເຂົ້າໃນສູນກັກກັນ ແລະ ສູນປິ່ນປົວເຊື້ອພະຍາດໂຄວິດ 19 ແຫ່ງຕ່າງໆພາຍໃນແຂວງ ລວມມູນຄ່າ 100 ກວ່າລ້ານກີບ.

info@lfnd.org.la | 021 213754 | (856-21) 453191