ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດເມືອງລະຄອນເພັງ ເປີດກອງປະຊຸມສາມັນຄົບຄະນະກຳມະການແນວລາວສ້າງຊາດ ຄັ້ງທີ II ສະໄໝທີ V

ແນວລາວສ້າງຊາດເມືອງລະຄອນເພັງ ແຂວງສາລະວັນ ຈັດກອງປະຊຸມສາມັນຄົບຄະນະກຳມະການແນວລາວສ້າງຊາດເມືອງ ຄັ້ງທີ 2 ສະໄໝທີ V ຕິດພັນກັບພິທີປະກາດບ້ານສາມັກຄີປອງດອງ. ໂດຍການເປັນປະທານຂອງ ທ່ານ ນາງ ມະນີໄລ ຈຳປາມະນີວົງ ກຳມະການປະຈຳພັກເມືອງ ປະທານແນວລາວສ້າງຊາດເມືອງ, ເປັນກຽດເຂົ້າຮ່ວມເປັນປະທານຂອງທ່ານ ທອງດີ ຈັນທະວົງ ກຳມະການພັກແຂວງ, ເລຂາພັກ-ເຈົ້າເມືອງລະຄອນເພັງ, ທ່ານ ໜູການ ຊາທິລາດ ຮອງປະທານແນວລາວສ້າງຊາດແຂວງສາລະວັນ, ມີບັນດາກຳມະການພັກເມືອງ, ຫົວໜ້າຫ້ອງການອ້ອມຂ້າງເມືອງ, ຄະນະກຳມະການແນວລາວສ້າງຊາດເມືອງເຂົ້າຮ່ວມ.

ໃນພິທີແມ່ນໄດ້ຮັບຟັງ ການສະຫຼຸບລາຍງານວຽກງານຮອບດ້ານ ໃນຈັດຕັ້ງປະຕິບັດເຄື່ອນໄຫວວຽກງານແນວລາວສ້າງຊາດເມືອງ ໃນໄລຍະ 1 ປີຜ່ານມາ ແລະ ທິດທາງແຜນການໃນຕໍ່ໜ້າປະຈໍາປີ 2021 ຈາກທ່ານ ຮອງປະທານແນວລາວສ້າງຊາດເມືອງ, ໂດຍທ່ານໃຫ້ຮູ້ວ່າ: ຕະຫຼອດໄລຍະຜ່ານມາແນວລາວສ້າງຊາດເມືອງລະຄອນເພັງ ໄດ້ເອົາໃຈໃສ່ເຄື່ອນໄຫວເຕົ້າໂຮມຄວາມສາມັກຄີປອງດອງປະຊາຊົນບັນດາເຜົ່າ, ຊັ້ນຄົນ, ສາສະໜາ, ເພດ-ໄວ ໃນທົ່ວປວງຊົນ, ເສີມຂະຫຍາຍສິດສະເໝີີພາບທາງດ້ານການເມືອງ, ເສີມຂະຫຍາຍມູນເຊື້ອນໍ້າໃຈຮັກຊາດ, ຮັກບ້ານເກີດເມືອງນອນ, ມີຄວາມສາມັກຄີປອງດອງກັນ, ໄດ້ໂຄສະນາສຶກສາອົບຮົມການເມືອງ-ແນວຄິດໃຫ້ພະນັກງານ, ສະມາຊິກພັກ ແລະ ປະຊາຊົນບັນດາເຜົ່າ ໃນທົ່ວເມືອງດ້ວຍຫຼາຍຮູບການ ເຊັ່ນ: ຈັດຕັ້ງການປາຖະກະຖາເລົ່າຄືນມູນເຊື່ອ ວັນສຳຄັນຕ່າງໆຂອງພັກ – ຂອງຊາດ, ເຊື່ອມຊືມເອກະສານສຳຄັນຕ່າງໆ, ໂດຍຈັດຕັ້ງແຜນພັດທະນາຊົນນະບົດ, ເພື່ອລຶບລ້າງຄວາມທຸກຍາກຕິດພັນກັບວຽກງານສາມສ້າງ, ໃນໄລຍະຜ່ານມາ ແນວລາວສ້າງຊາດເມືອງ ໄດ້ເອົາໃຈໃສ່ຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງໄດ້ 41 ບ້ານໃນຈໍານວນ 6.137 ຄອບຄົວ; ຊຸກຍູ້ປະຊາຊົນສ້າງຕັ້ງກອງທຶນພັດທະນາຂັ້ນບ້ານໄດ້ 3 ບ້ານ ແລະ ຍັງມີກອງທຶນຊ່ວຍເຫຼືອ ເຊິ່ງກັນແລະກັນ ພາຍໃນຫ້ອງການແນວລາວສ້າງຊາດເມືອງຕື່ມອີກ.

ຈາກນັ້ນ ຜູ້ເຂົ້າຮ່ວມກອງປະຊຸມຍັງໄດ້ມີການປະກອບຄຳຄິດຄຳເຫັນ ຕໍ່ບົດສະຫຼຸບ ແລະ ທິດທາງແຜນການໃນວຽກງານແນວລາວສ້າງຊາດເມືອງ ໃຫ້ມີເນືອໃນຄົບຖ້ວນ ແລະ ສົມບູນຂຶ້ນຕື່ມ. ກອງປະຊຸມດັ່ງກ່າວໄດ້ຈັດຂຶ້ນໃນວັນທີ 18 ມິຖຸນາ 2021 ຢູ່ທີ່ສະໂມສອນຂອງເມືອງ.

info@lfnd.org.la | 021 213754 | (856-21) 453191