ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດເມືອງລະມາມ ສຳເລັດກອງປະຊຸມຄົບຄະນະກຳມະການ ຄັ້ງທີ I ສະໄໝທີ VI

ໃນຕອນເຊົ້າຂອງວັນທີ 7 ເມສາ 2021  ແນວລາວສ້າງຊາດເມືອງລະມາມ ໄດ້ຈັດກອງປະຊຸມສະຫຼຸບການເຄື່ອນໄຫວການຈັດຕັ້ງປະຕິບັດວຽກງານ 6 ເດືອນທ້າຍປີ 2020 ແລະ ປັບປຸງທິດທາງແຜນການໃນ 6 ເດືອນ ຕົ້ນປີ 2021 ຂຶ້ນທີ່ສະໂມສອນຫ້ອງວ່າການປົກຄອງເມືອງລະມາມ ແຂວງເຊກອງ. ໂດຍການເຂົ້າຮ່ວມເປັນປະທານຂອງທ່ານນາງ ບຸນຮຽງ ບຸນຈິດ ກຳມະການປະຈຳພັກແຂວງ, ປະທານແນວລາວສ້າງຊາດແຂວງເຊກອງ, ມີທ່ານ ຄຳຜ່ອງ ເຜົ່າລະວີ ຄະນະປະຈຳພັກເມືອງ, ປະທານແນວລາວສ້າງຊາດເມືອງລະມາມ, ມີພຣະເຖຣະ ນຸເຖຣະ, ມີກຳມະການພັກເມືອງ, ຫົວໜ້າ ແລະ ຮອງຫ້ອງການອ້ອມຂ້າງເມືອງ ພ້ອມດ້ວຍພະນັກງານວິຊາການ ເຂົ້າຮ່ວມ.

ທ່ານນາງ ລຳເນົາ ຂັນທະຈັກ ຮອງປະທານແນວລາວສ້າງຊາດເມືອງລະມາມ ໄດ້ຂຶ້ນຜ່ານບົດສະຫຼຸບຕີລາຄາຄືນໃນການເຄື່ອນໄຫວຈັດຕັ້ງປະຕິບັດວຽກງານໄລຍະ 6 ເດືອນທ້າຍປີ 2020 ແລະ ທິດທາງແຜນການ 6 ເດືອນຕົ້ນປີ 2021. ເຊິ່ງທ່ານກໍ່ໄດ້ຍົກໃຫ້ເຫັນດ້ານຜົນສຳເລັດ, ດ້ານດີ, ດ້ານອ່ອນ ແລະ ບັນດາຂໍ້ຄົງຄ້າງເປັນຕົ້ນແມ່ນ: ຄະນະພັກແຕ່ລະຂັ້ນໄດ້ເອົາໃຈໃສ່ຊີ້ນຳໆພາອົງການຈັດຕັ້ງມະຫາຊົນ, ອົງການຈັດຕັ້ງສັງຄົມ, ຜູ້ຊົງຄຸນວຸດທິ ໄດ້ໃຫ້ການສະໜັບສະໜູນຮ່ວມໄມ້ຮ່ວມມື ເຮັດໃຫ້ອົງການແນວລາວສ້າງຊາດແຕ່ລະຂັ້ນໄດ້ເຄື່ອນໄຫວຕາມພາລະບົດບາດ, ສິດ ແລະໜ້າທີ່ຂອງຕົນ, ຍາມໃດຄະນະກຳມະການແນວລາວສ້າງຊາດກໍເປັນຄັນທຸງເຕົ້າໂຮມຄວາມສາມັກຄີປອງດອງບັນດາເຜົ່າ ເຮັດໃຫ້ພາຍໃນເມືອງມີຄວາມສາມັກຄີປອງດອງ, ມີຄວາມເຊື່ອໝັ້ນຕໍ່ການນຳພາຂອງພັກ ເຮັດໃຫ້ເມືອງມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ເປັນລະບຽບຮຽບຮ້ອຍ.

ກອງປະຊຸມດັ່ງກ່າວຍັງໄດ້ຮັບຟັງການໂອ້ລົມຈາກທ່ານນາງ ບຸນຮຽງ ບຸນຈິດ ເຊິ່ງທ່ານກໍ່ໄດ້ຮຽກຮ້ອງມາຍັງຄະນະກຳມະການແນວລາວສ້າງຊາດທຸກຂັ້ນ, ຕ້ອງເອົາໃຈໃສ່ໃນການຊີ້ນຳ-ນຳພາວຽກງານທີ່ຍັງຄົງຄ້າງ ໂດຍສະເພາະວຽກງານການເມືອງແນວຄິດ, ຕ້ອງໄດ້ເພີ່ມທະວີເອົາໃຈໃສ່ໃນການສຶກສາ-ອົບຮົມເຕົ້າໂຮມຄວາມສາມັກຄີປອງດອງປະຊາຊົນບັນດາເຜົ່າ ໃຫ້ແໜ້ນແຟ້ນ, ບົນພື້ນຖານເປັນຈິດໜຶ່ງໃຈດຽວ, ລົງໂຄສະນາເຜີຍແຜ່ແນວທາງນະໂຍບາຍຂອງພັກ-ລັດ, ລົງສູ່ຮາກຖານທ້ອງຖິ່ນໃຫ້ຫຼາຍກ່ວາເກົ່າ. ພ້ອມນີ້, ຕ້ອງເພີ່ມທະວີລົງຊຸກຍູ້, ຕິດຕາມ, ກວດກາ ບັນດາຄອບຄົວ ແລະບ້ານທີ່ໄດ້ຮັບນາມມະຍົດເປັນຄອບຄົວ ແລະ ບ້ານສາມັກຄີປອງດອງໃຫ້ໄດ້ໄດ້ຮັບຜົນສຳເລັດເປັນກ້າວໆ.

info@lfnd.org.la | 021 213754 | (856-21) 453191