ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດເມືອງສົບເບົາ ຈັດກອງປະຊຸມເຜີຍແຜ່ເອກະສານກ່ຽວກັບວຽກງານສາສະໜາ

ວັນທີ 10-11 ພະຈິກ 2020 ນີ້ ແນວລາວສ້າງຊາດເມືອງສົບເບົາ ແຂວງຫົວພັນ ຈັດກອງປະຊຸມເຜີຍແຜ່ເອກະສານກ່ຽວກັບວຽກງານສາສະໜາ ໃຫ້ແກ່ນັກສອນສາສະໜາຕ່າງໆ, ໂດຍການເປັນປະທານຂອງທ່ານ ນາງ ສ້ຽງ ສໍສະຫວັນ ຄະນະປະຈຳພັກເມືອງ ປະທານແນວລາວສ້າງຊາດເມືອງ ແລະ ເປັນກຽດເຂົ້າຮ່ວມຂອງທ່ານ ຄຳຜິວ ວົງສະຫວັນ ຮອງເລຂາພັກແຂວງ, ປະທານແນວລາວສ້າງຊາດແຂວງ, ມີບັນດາທ່ານຜູ້ຕາງໜ້າຈາກສະພາປະຊາຊົນແຂວງ, ການນຳເມືອງ ຕະຫຼອດຮອດບັນດານັກສອນສາສະໜາຕ່າງໆຢູ່ 14 ບ້ານຂອງດັ່ງກ່າວເຂົ້າຮ່ວມ.

ເອກະສານທີ່ນຳມາເຜີຍແຜ່ຄັ້ງນີ້ມີ 4 ເອກະສານຄື: ສະພາບຈຸດພິເສດ ແລະ ການເຄື່ອນໄຫວຂອງສາສະໜາ ຢູ່ ສປປ ລາວ, ທັດສະນະຂອງພັກ-ລັດ ແລະ ແນວທາງນະໂຍບາຍຂອງລັດຕໍ່ວຽກງານສາສະໜາ, ດຳລັດ 315/ລບ ວ່າດ້ວຍການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາຢຸ່ ສປປ ລາວ, ເອກະສານເພີ່ມທະວີສະຕິລະວັງຕົວຕໍ່ກົນອຸບາຍຂອງພວກອິດທິກຳລັງປໍລະປັກໃນການສວຍໃຊ້ສາສະໜາ. ຈຸດປະສົງຂອງການເຜີຍແຜ່ເອກະສານຄັ້ງນີ້ກໍ່ເພື່ອເປັນການຍົກສູງຄວາມຮູ້ທາງດ້ານວຽກງານສາສະໜາໃຫ້ແກ່ການຈັດຕັ້ງ, ນັກສອນສາສະໜາຕ່າງໆໝູນໃຊ້ເຂົ້າໃນການເຄື່ອນໄຫວສາສະໜາຢູ່ເມືອງ, ບ້ານຂອງຕົນໃຫ້ມີປະສິດທິພາບ ແລະ ສອດຄ່ອງ ແນໃສ່ຮັບປະກັນຄວາມສາມັກຄີປອງດອງພາຍໃນຜູ້ເຊື່ອຖື ແລະ ສາສະນິກະຊົນຂອງແຕ່ລະສາສະໜາ ແລະ ເພີ່ມທະວີສະຕິລະວັງຕົວຕໍ່ການເຄື່ອນໄຫວຂອງກຸ່ມຄົນທີ່ບໍ່ຫວັງດີ ສວຍໃຊ້ວຽກງານສາສະໜາເພື່ອແບ່ງແຍກຄວາມສາມັກຄີພາຍໃນ.

ກອງປະຊຸມຄັ້ງນີ້,  ທ່ານ ຄຳຜິວ ວົງສະຫວັນ ໄດ້ມີຄຳເຫັນໂອ້ລົມວ່າ ໃຫ້ບັນດາຄູສອນສາສະໜາຕ່າງໆ ເອົາໃຈໃສ່ ເຮັດວຽກງານສຶກສາອົບຮົມສະມາຊິກຂອງຕົນໃຫ້ເຄື່ອນໄຫວຖືກຕ້ອງຕາມຫຼັກທຳຄຳສອນ, ຕາມທຳມະນູນຂອງແຕ່ລະສາສະໜາ, ທຸກສາສະໜາຕ້ອງເຄື່ອນໄຫວພາຍໃຕ້ລະບຽບກົດໝາຍຂອງລັດ ພ້ອມກັນເອົາໃຈໃສ່ບຸກບືນທຳການຜະລິດກະສິກຳໃຫ້ກຸ້ມຢູ່ກຸ້ມກິນ ແລະ ກາຍເປັນສິນຄ້າ ເພື່ອພ້ອມກັນພັດທະນາບ້ານເມືອງຂອງຕົນໃຫ້ມີຄວາມຈະເລີນກ້າວໜ້າ ແລະ ຫຼຸດພົ້ນອອກຈາກຄວາມທຸກຍາກເທື່ອລະກ້າວ.

 

info@lfnd.org.la | 021 213754 | (856-21) 453191