ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດເມືອງຮຸນ ​ເປີດ​ຂະ​ບວນການ​ສ້າງ​ຄອບຄົວ ​ແລະ ບ້ານ​ສາມັກຄີ​ປອງ​ດອງ

ວັນ​ທີ 30 ມິຖຸນາ 2021 ນີ້ ແນວ​ລາວ​ສ້າງ​ຊາດ​ເມືອງຮຸນ ແຂວງອຸດົມໄຊ ​ໄດ້ເປີດ​ຂະ​ບວນການ​ສ້າງ​ຄອບຄົວ ​ແລະ ບ້ານ​ສາມັກຄີ​ປອງ​ດອງ ຢູ່​ທີ່​​ບ້ານໂພນ​ໄຊ, ໃຫ້ກຽດເຂົ້າຮ່ວມຂອງ ທ່ານ​ ສົມພົບ ນາມມະ​ວົງ ຮອງ​ປະ​ທານ​ແນວ​ລາວ​ສ້າງ​ຊາດ​ເມືອງຮຸນ   ພ້ອມ​ດ້ວຍທີມງານ, ​ມີອົງການປົກ​ຄອງບ້ານໂພນໄຊ, ​ຜູ້ຊົງ​ຄຸນ​ວຸດ​ທິ ຕະຫຼອດ​ຮອດພໍ່​ແມ່​ປະຊາຊົນ​ພາຍ​ໃນ​ບ້ານ ເຂົ້າຮ່ວມ.

ພິທີໃນ​ຄັ້ງ​ນີ້ ​​ໄດ້ຈັດຕັ້ງເຊື່ອມຊືມເອກະສານສຳຄັນຄື: ​ຂໍ້​ຕົກລົງ​​ເລກທີ 127/ສນຊ ວ່າ​ດ້ວຍ​ມາດຖານ​ຄອບຄົວ ​ແລະ ບ້ານ​ສາມັກ​ຄີ​ປອງ​ດອງ, ​ຄຳ​ແນະນຳ ເລກທີ 033/ຄປຈ.ສນຊ ວ່າ​ດ້ວຍ​ການຈັດ​ຕັ້ງ​ປະຕິບັດ​ຂະບວນ​ການ​ສ້າງ​ຄອບຄົວ ​ແລະ ບ້ານ​ສາມັກຄີ​ປອງ​ດອງ​ ຂອງ​ແນວ​ລາວ​ສ້າງ​ຊາດ, ຂໍ້​ຕົກລົງ​​ ວ່າ​ດ້ວຍ​ການ​ແຕ່ງ​ຕັ້ງ​ຄະນະ​ຮັບຜິດ​ຊອບ​ຊີ້​ນຳ​​ການ​ສ້າງ​ຄອບຄົວ ​ແລະ ບ້ານ​ສາມັກຄີ​ປອງ​ດອງ​ຂອງ​ແນວ​ລາວ​ສ້າງ​ຊາດ​ຂັ້ນ​ເມືອງ ແລະ ເອກະສານສຳຄັນອື່ນໆຈໍານວນໜຶ່ງ.

ການເປີດຂະບວນການສ້າງ​ຄອບຄົວ ​ແລະ ບ້ານ​ສາມັກຄີ​ປອງ​ດອງ ໃນຄັ້ງນີ້ກໍ່ເພື່ອໃຫ້ພໍ່ແມ່ປະຊາຊົນລາວບັນດາເຜົ່າພາຍໃນບ້ານ​ ໃຫ້ມີຄວາມຮັບຮູ້ ແລະ ເຂົ້າໃຈ ເຫັນໄດ້ຄວາມສໍາຄັນໃນການຈັດຕັ້ງປະຕິບັດຂະບວນການດັ່ງກ່າວ ແລະ ເພື່ອເຮັດໃຫ້ບ້ານໂພນໄຊ ໄດ້ປະກາດຮັບຮອງເປັນຄອບຄົວ ແລະ ບ້ານສາມັກຄີປອງດອງໃນຕໍ່ໜ້າ.

info@lfnd.org.la | 021 213754 | (856-21) 453191