ສູນກາງແນວລາວສ້າງຊາດ

Lao Front For National Development

ທ່ານ ຮອງປະທານແນວລາວສ້າງຊາດ ແຂວງສະຫວັນນະເຂດ ລົງເຄື່ອນໄຫວຊຸກຍູ້ກອງປະຊຸມໃຫຍ່ ແນວລາວສ້າງຊາດເມືອງ, ນະຄອນ

ໃນລະຫວ່າງ ວັນທີ10-11 ມິຖຸນາ 2020 ທ່ານ ຄຳຕຸ່ນ ສົມສະໜິດ ຮອງປະທານແນວລາວສ້າງຊາດແຂວງ ພ້ອມດ້ວຍຄະນະ ໄດ້​ລົງ​ເຄື່ອນ​ໄຫວ​ຊຸກ​ຍູ້​ ກອງ​ປະ​ຊຸມ​ໃຫຍ່​ແນວ​ລາວ​ສ້າງ​ຊາດ​ເມືອ​ງຈຳພອນ, ຊົນນະບູລີ ແລະ​ ນະຄອນໄກສອນພົມວິຫານ . ແຜນການລົງເຄື່ອນໄຫວວຽກງານໃນຄັ້ງນີ້ ທີ່ເມືອງຈຳພອນ ທ່ານ ຮອງປະທານແນວລາວສ້າງຊາດແຂວງ ໄດ້ເຂົ້າພົບ ທ່ານ ຄຳລຸຍ ຍາດຕິວົງ ກຳມະການພັກແຂວງ ເຈົ້າເມືອງໆ ຈຳພອນ ແລະ ໄດ້ພົບປະ -ເຮັດວຽກ ຢູ່ທີ່ຫ້ອງການແນວລາວສ້າງຊາດເມືອງ ເປັນກຽດຕ້ອນຮັບໂດຍ ທ່ານ ນາງ ແກ້ວກ່ອງ ສຸລິຍະວົງສາ ຄະນະປະຈຳພັກເມືອງ ປະທານແນວລາວສ້າງຊາດເມືອງ ພ້ອມດ້ວຍຄະນະ.

ຕອນບ່າຍຂອງວັນດຽວກັນ ໄດ້ເຂົ້າພົບ ທ່ານ ສຸວິໄລ ຫຼວງຊະລາດ ກຳມະການພັກແຂວງ ເຈົ້າເມືອງໆ ຊົນນະບູລີ, ໄດ້ເຂົ້າເຮັດວຽກທີ່ຫ້ອງການແນວລາວສ້າງຊາດ ໂດຍແມ່ນທ່ານ ຄຳປ້າຍ ເທບທອງແສນ ຄະນະປະຈຳພັກເມືອງ ປະທານແນວລາວສ້າງຊາດເມືອງພ້ອມດ້ວຍຄະນະ ຕ້ອນຮັບຢ່າງອົບອຸ່ນ;  ໃນການລົງເຄື່ອນໄຫວຊຸກຍູ້ກອງປະຊຸມໃຫຍ່ ແນວລາວສ້າງຊາດເມືອງໃນຄັ້ງນີ້ ໄດ້​ຮັບຟັງການລາຍ​ງານຄືນ​ການ​ກະ​ກຽມ​ໃນ​ແຕ່​ລະ​ດ້ານ: ມາ​ຮອດ​ປະ​ຈຸ​ບັນ​ ກາ​ນ​ກະ​ກຽມ​ທາງ​ດ້ານ​ເນື້ອ​ໃນ​ເຊັ່ນ: ບົດ​ລາ​ຍ​ງານ​ການ​ເມືອ​ງ ແລະ ​ເອ​ກະ​ສານ​ຕ່າງ​ໆແມ່ນ​ສຳ​ເລັດ​ກວ່າ 70% ແລ້ວ; ໂຄງ​ປະ​ກອບ​ບຸກ​ຄະ​ລາ​ກອນ​ແມ່ນ​ໄດ້​ມີ​ການ​ທາບ​ທາມ​ຕາມ​ເປົ້າ​ໝາຍ ແລະ ​ເງື່ອນ​ໄຂ​ຜູ້​ທີ່​ຈະ​ເຂົ້າ​ມາ​ເປັນ​ຄະ​ນະ​ກຳ​ມະ​ການ​ແນວ​ລາວ​ສ້າງ​ຊາດ​ເມືອງ​ໂດຍ​ເລັ່ງ​ໃສ່ຜູ້​ຊົງ​ຄຸນ​ວຸດ​ທິ, ຊົນ​ເຜົ່າ​, ສ​າ​ສະ​ໜາ ແລະ​ ເພດໄວ, ດ້ານ​ແຜນ​ງົບ​ປະ​ມານ ການ​ສ້າງ​ຂະ​ບວນ​ການ​ຕ່າງໆ​ແມ່ນ​ກຳ​ລັງ​ຢູ່​ໃນ​ຂັ້ນ​ກະ​ກຽມ​ປະ​ກອບ​ເອ​ກະ​ສານເພື່ອ​ສະ​ເໜີ​ຂໍ​ອະ​ນຸດ​ມັດ​ຈາກ​ຂັ້ນ​ເທິງ.

ໃນຕອນເຊົ້າຂອງວັນທີ 11 ມິຖຸນາ  ທ່ານ ຮອງປະທານ ຍັງໄດ້ລົງສືບຕໍ່ຊຸກຍູ້ກອງປະຊຸມໃຫຍ່ ແນວລາວສ້າງຊາດນະຄອນໄກສອນພົມວິຫານ ເຊິ່ງໃຫ້ກຽດຕ້ອນຮັບໂດຍ ທ່ານ ກຸນາ ເຫຼື່ອມເທພາ ຮອງເລຂາພັກນະຄອນ ປະທານແນວລາວສ້າງຊາດ  ໃນໂອກາດດຽວກັນນີ້ ເພື່ອເປັນການຈັດຕັ້ງຜັນຂະຫຍາຍເນື້ອໃນແຈ້ງການ ເລກທີ143/ຫກ.ສນຊ ກ່ຽວກັບການເພີ່ມທະວີໂຄສະນາວັນສ້າງຕັ້ງແນວລາວສ້າງຊາດຄົບຮອບ70ປີ,  ທ່ານ ຄຳຕຸ່ນ ສົມສະໜິດ ໄດ້ຊີ້ນຳໆພາ ໃຫ້ມີການໂຄສະນາ ຜ່ານສື່ວິທະຍຸຂອງເມືອງ, ສື່ອອນລາຍຕ່າງໆ ແລະ ສ້າງເຟສບຸກເປັນຂອງແນວລາວສ້າງຊາດເມືອງ, ນະຄອນ ເພື່ອເຮັດໃຫ້ວຽກງານດັ່ງກ່າວຂະຫຍາຍຕົວອອກສູ່ວົງກວ້າງ.

ໃນ​ຕອນ​ທ້າຍ ທ່ານ ຮອງ​ປະ​ທານ​ແນວ​ລາວ​ສ້າງ​ຊາດ​ແຂວງ​ ໄດ້​ເນັ້ນ​ໜັກ​ໃຫ້​ປະທານ ,ຮອງປະທານ ແນວລາວສ້າງຊາດເມືອງ -ນະຄອນ ເອົ​າ​ໃຈ​ໃສ່​ ​ກະ​ກຽມ​ກອງ​ປະ​ຊຸມ​ໃຫ້​ໄດ້​ໄຂ​ຂື້ນ​ທ່ວງ​ທັນ​ກັບ​ເວ​ລາ, ເລືອກ​ເຟັ້ນ​ເອົາ​ບຸກ​ຄະ​ລາ​ກອນ​ທີ່​ບັນ​ຈຸ​ສັບ​ຊ້ອນ​ເຂົ້າ​ໃນ​ໂຄງ​ປະ​ກອບ​ໂດຍ​ເລັ່ງ​ໃສ່​ຜູ້​ຊົງ​ຄຸນ​ວຸດ​ທິ​ທີ່​ມີ​ບົດ​ບາດ​ໃນ​ການ​ຊີ້​ນຳ-ນຳ​ພາ​, ບັ​ນ​ດາ​ເຜົ່າ, ສາ​ສະ​ໜາ ແລະ ​ເພດ​ໄວ​ຕາມ​ມາດ​ຖານ​ທີ່​ວາງ​ໄວ້ ; ສຳ​ລັບ​ບົດ​ລາຍ​ງານ​ການ​ເມືອງ​ຕ້ອງ​ອີງ​ໃສ່​ສະ​ພາບ​ຄວາມ​ເປັນ​ຈິງ​ຂອງ​ການ​ເຄື່ອນ​ໄຫວ​ວຽກ​ງານ​ແນວ​ລາວ​ສ້າງ​ຊາດ​ໃນ​ໄລ​ຍະ​ໃໝ່​; ໃຫ້​ມີ​ການ​ແບ່ງ​ງານ​ກັນ​ຢ່າງ​ລະ​ອຽດ​ໃນ​ບັນ​ດາ​ອະ​ນຸ​ກຳ​ມະ​ການກະກຽມກອງ​ປະ​ຊຸມ ເພື່ອ​ເຮັດ​ໃຫ້​ວຽກ​ກະ​ກຽມ​ກອງ​ປະ​ຊຸມ​ໃຫຍ່​ຂອງ​ແນວ​ລາວ​ສ້າງ​ຊາດ​ເມືອງດຳ​ເນີນ​ໄປ​ດ້ວຍ​ດີ ແລະ​ ໄດ້​ຮັບ​ຜົນ​ສຳ​ເລັດ​ຕາມ​ຈຸດ​ປະ​ສົງຄາດ​ໝາຍ​ທີ່​ວາງ​ໄວ້.

info@lfnd.org.la | 021 213754 | (856-21) 453191