ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດເມືອງໄຊບົວທອງ ປາຖະກະຖາວັນສ້າງຕັ້ງ ແນວລາວສ້າງຊາດ ຄົບຮອບ 71 ປີ

ພິທີປາຖະກະຖາວັນສ້າງຕັ້ງແນວລາວສ້າງຊາດ ຄົບຮອບ 71 ປີ(13 ສິງຫາ 1950–13 ສິງຫາ 2021) ໄດ້ຈັດຂຶ້ນໃນວັນທີ 26 ສິງຫາ 2021 ຢູ່ທີ່ສະໂມສອນຫ້ອງວ່າການເມືອງໄຊບົວທອງ ແຂວງຄຳມ່ວນ, ເປັນກຽດປາຖະກະຖາໂດຍ ທ່ານ ບຸນໂຈມ ປັນຍາຄຸນນຸວົງ ຄະນະປະຈໍາພັກເມືອງ, ປະທານແນວລາວສ້າງຊາດເມືອງໄຊບົວທອງ, ມີບັນດາທ່ານຄະນະພັກເມືອງ, ຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ, ນາຍ ແລະ ພົນທະຫານ, ນາຍ ແລະ ພົນຕຳຫຼວດ ຕະຫຼອດຮອດພະນັກງານວິຊາການ ເຂົ້າຮ່ວມຢ່າງພ້ອມພຽງ.

ພິທີດັ່ງກ່າວ, ທ່ານ ບຸນໂຈມ ປັນຍາຄຸນນຸວົງ ກໍ່ໄດ້ໃຫ້ກຽດຂຶ້ນປາຖະກະຖາ ເລົ່າມູນເຊື້ອການກໍາເກີດ ແລະ ເຕີບໃຫຍ່ຂະຫຍາຍຕົວຂອງອົງການແນວລາວສ້າງຊາດ, ເຊິ່ງທ່ານໄດ້ຍົກໃຫ້ເຫັນເຖິ່ງຄວາມໝາຍ, ຄວາມສຳຄັນ ແລະ ການເຕີບໃຫຍ່ຂະຫຍາຍຕົວຂອງອົງການແນວລາວສ້າງຊາດ ແລະ ຜົນສຳເລັດທີຍາດມາໄດ້ໃນໄລຍະ 71 ປີຜ່ານມາ, ພາຍໃຕ້ການຊີ້ນຳ-ນຳພາອັນສະຫຼາດສ່ອງໃສ ຂອງພັກປະຊາຊົນປະຕິວັດລາວ, ເຮັດໃຫ້ກຳລັງປະຕິວັດໄດ້ເຕີບໃຫຍ່ຂະຫຍາຍຕົວຂຶ້ນ, ເຂດປົດປ່ອຍໄດ້ຮັບການປົກປັກຮັກສາ ແລະ ເປີດກວ້າງຕິດຈອດກັນແຕ່ເໜືອຮອດໃຕ້  ກວມເອົາຍຸດທະສາດທີ່ສຳຄັນຕ່າງໆ, ວຽກງານທຸກດ້ານໄດ້ຮັບການປັບປຸງກໍ່ສ້າງໃຫ້ມີຄວາມເຂັ້ມແຂງຂຶ້ນເປັນກ້າວໆ, ພ້ອມນັ້ນຍັງໄດ້ຍົກໃຫ້ເຫັນມູນເຊື້ອອັນອົງອາດກ້າຫານ ຂອງຂະບວນການຕໍ່ສູ້ຂອງປະຊາຊົນລາວບັນດາເຜົ່າພາຍໃຕ້ການນໍາພາຂອງພັກ, ໄດ້ເຕີບໃຫຍ່ຂະຫຍາຍຕົວຢ່າງແຂງແຮງ, ຜູ້ເສຍສະຫຼະເລືອດເນື້ອ ແລະ ຊີວິດເພື່ອປະເທດຊາດ ໃນການຕໍ່ສູ້ຕ້ານພວກຈັກກະພັດລ່າເມືອງຂຶ້ນທີ່ມາຮຸກຮານ, ການປະຕິວັດມີເຂດຕໍ່ຕ້ານ ແລະ ກໍາລັງປະກອບອາວຸດຢູ່ທຸກພາກຂອງປະເທດເດັ່ນກ່ວາໝູ່ແມ່ນບັ້ນຮົບປ້ອງກັນຕົວເມືອງທ່າແຂກ, ໃນວັນທີ 21 ມີນາ 1946 ພ້ອມກັນນັ້ນ ຂະບວນການຕໍ່ຕ້ານພວກລ່າເມືອງຂຶ້ນຝຣັ່ງ ຢູ່ທົ່ວສະໜາມຮົບອິນດູຈີນກໍ່ມີບາດກ້າວກະໂດດຂຶ້ນຢ່າງໄວວາ.

ການປາຖະກະຖາໃນຄັ້ງນີ້ກໍ່ເພື່ອເປັນການທົບທວນຫວນຄືນມູນເຊື້ອ ແລະ ໄຊຊະນະອັນຍິ່ງໃຫຍ່ ຂອງພາລະກິດແຫ່ງການຕໍ່ສູ້ປົດປ່ອຍຊາດໃນເມືອກ່ອນ, ພ້ອມທັງເປັນການສຶກສາອົບຮົມພະນັກງານ, ສະມາຊິກພັກໃຫ້ເຂົ້າໃຈກ່ຽວກັບ ມູນເຊື້ອສາມັກຄີປອງດອງຂອງປະຊາຊົນລາວບັນດາເຜົ່າ, ນ້ຳໃຈອັນອົງອາດກ້າຫານຂອງແນວລາວສ້າງຊາດ ແລະ ປະຊາຊົນລາວ ພາຍໃຕ້ຄຳຂວັນ “ ນໍ້າໃຈວັນທີ 13 ສິງຫາ ໝັ້ນຍືນ, ຊົມເຊີຍວັນສ້າງຕັ້ງແນວລາວສ້າງຊາດ ຄົບຮອບ 71 ປີ ຢ່າງສຸດໃຈ, ເສີມຂະຫຍາຍມູນເຊື້້ອອັນດີງາມຂອງແນວລາວສ້າງຊາດ, ການສຶກສາ-ອົບຮົມເຕົ້າໂຮມຄວາມສາມັກຄີ ແລະ ການປຸກລະດົມ, ຊຸກຍູ້ທົ່ວປວງຊົນ ເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ, ສາມັກຄີຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19”.

 

info@lfnd.org.la | 021 213754 | (856-21) 453191