ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດແຂວງຄໍາມ່ວນ ດຳເນີນກອງປະຊຸມສາມັນຄົບຄະນະ ຄັ້ງທີ່ 2 ສະໄໝທີ VIII

ກອງປະຊຸມສາມັນຄົບຄະນະກຳມະການ ແນວລາວສ້າງຊາດ ແຂວງຄຳມ່ວນ ຄັ້ງທີ 2 ສະໄໝທີ VIII ໄດ້ໄຂຂຶ້ນ ໃນວັນທີ 8 ມັງກອນ 2021, ໂດຍການເປັນປະທານຂອງ ທ່ານ ຈັນ ບຸບຜາລີວັນ ກຳມະການປະຈໍາພັກແຂວງ, ກຳມະການສູນກາງແນວລາວສ້າງຊາດ, ປະທານແນວລາວສ້າງຊາດ ແຂວງຄຳມ່ວນ, ມີບັນດາທ່ານຄະນະປະຈຳ, ກຳມະການແນວລາວສ້າງຊາດໃນທົ່ວແຂວງ ເຂົ້າຮ່ວມ.

ກອງປະຊຸມແມ່ນໄດ້ຜ່ານມະຕິຕົກລົງຂອງຄະນະປະຈຳພັກແຂວງຄຳມ່ວນ ວ່າດ້ວຍການຮັບຮອງເອົາຄະນະ ກຳມະການ, ປະທານ, ຮອງປະທານ, ຄະນະປະຈຳ, ຄະນະກວດກາ ແລະ ຄະນະກຳມະການແນວລາວສ້າງຊາດ ແຂວງຄຳມ່ວນ, ມະຕິຕົກລົງວ່າດ້ວຍແບບແຜນ, ວິທີການນຳພາ ແລະ ວິທີເຮັດວຽກ, ຮ່າງບົດສະຫຼຸບ ປີ 2020, ທິດທາງແຜນການ ປີ 2021 ແລະ ຜ່ານໂຄງການດຳເນີນງານ ແລະ ການແບ່ງຄວາມຮັບຜິດຊອບພາຍໃນຄະນະປະຈຳ, ກຳມະການແນວລາວສ້າງຊາດແຂວງ  ເພື່ອຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VIII ຂອງຜູ້ແທນແນວລາວສ້າງຊາດ ແຂວງຄຳມ່ວນ ໃຫ້ເປັນແຜນງານ, ໂຄງການ, ມີການແບ່ງງານ ແລະ ແບ່ງຄວາມຮັບຜິດຊອບໃຫ້ຈະແຈ້ງ ເພື່ອສະດວກໃນການຕິດຕາມ, ກວດກາ ແລະ ສະຫຼຸບການຈັດຕັ້ງປະຕິບັດ, ສ້າງເງື່ອນໄຂສະດວກ ໃນການເຄື່ອນໄຫວ ຊີ້ນຳ-ນຳພາ ກໍ່ຄືການປະຕິບັດໜ້າທີ່ຂອງຄະນະປະຈຳ, ຄະນະກຳມະການ ທີ່ເປັນເສນາທິການ ໃຫ້ແກ່ການນຳພັກ-ລັດ ຕາມເນື້ອໃນຈຸດປະສົງ ລະດັບຄາດໝາຍຂອງແຕ່ລະວຽກ. ສຳລັບວຽກງານຈຸດສຸມ ຮອດປີ 2025 ຂອງຄະນະກຳມະການແນວລາວສ້າງຊາດ ແຂວງຄຳມ່ວນ ເພີ່ມທະວີຄວາມສາມັກຄີພາຍໃນໃຫ້ໜັກແໜ້ນ ຮັບປະກັນຄວາມມີສະຖຽນລະພາບທາງດ້ານການເມືອງ, ເສດຖະກິດ ແລະ ຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ, ເຕົ້າໂຮມຄວາມສາມັກຄີ, ສຶກສາອົບຮົມ, ປຸກລະດົມສະມາຊິກພັກ, ພະນັກງານ, ທະຫານ, ຕຳຫຼວດ, ປະຊາຊົນບັນດາເຜົ່າ, ຊັ້ນຄົນ, ສາສະໜາ, ເພດ-ໄວ ໄດ້ເຂົ້າຮ່ວມການຈັດຕັ້ງປະຕິບັດແນວທາງນະໂຍບາຍຂອງພັກ, ລະບຽບກົດໝາຍ ຂອງລັດ, ຍົກສູງນໍ້າໃຈຮັກຊາດ, ຮັກລະບອບໃໝ່ ປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ.

info@lfnd.org.la | 021 213754 | (856-21) 453191