ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດແຂວງຄໍາມ່ວນ ປາຖະກະຖາວັນສ້າງຕັ້ງພັກ ແລະ ວັນເສຍອົງຄະ, ເສຍສະຫຼະຊີວິດເພື່ອປະເທດຊາດ

ໃນຕອນບ່າຍ ວັນທີ່ 22 ມີນາ ຜ່ານມານີ້ ຢູ່ທີ່ຫ້ອງປະຊຸມ ຫ້ອງການແນວລາວສ້າງຊາດ ແຂວງຄໍາມ່ວນ, ໄດ້ຈັດພິທີປາຖະກະຖາວັນສໍາຄັນ ຂອງຊາດ-ຂອງພັກ, ເປັນກຽດເຂົ້າຮ່ວມ ຂອງທ່ານ ຈັນ ບຸບຜາລີວັນ ກໍາມະການສູນກາງແນວລາວສ້າງຊາດ ປະທານແນວລາວສ້າງຊາດແຂວງ, ໃຫ້ກຽດເຜີຍແຜ່ເອກະສານດັ່ງກ່າວ ໂດຍ ທ່ານ ສຸກກະເສີມ ອຸດອນ ແລະ ທ່ານ ພຸດທະວົງ ພົນອາສາ ຮອງປະທານແນວລາວສ້າງຊາດແຂວງ, ມີຄະນະພັກ, ຄະນະປະທານ ພ້ອມດ້ວຍພະນັກງານແນວລາວສ້າງຊາດແຂວງ ເຂົ້າຮ່ວມ.

ກອງປະຊຸມໄດ້ຮັບຟັງການເຜີຍແຜ່ມູນເຊື້ອ ວັນສ້າງຕັ້ງພັກ ຄົບຮອບ 66 ປີ(22/3/1955-22/3/2021), ວັນເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 75 ປີ(21/3/1946-21/3/2021), ​ການ​​ເຜີຍ​ແຜ່​ເອກະສານ ເປັນການຍົກໃຫ້ເຫັນເຖິງຄວາມໝາຍຄວາມສໍາຄັນ ແລະ ມູນເຊື້ອແຫ່ງການເຕີບໃຫຍ່ຂະຫຍາຍຕົວ, ຜົນສໍາເລັດທີ່ຍາດມາໄດ້ຕະຫຼອດໄລຍະ 66 ປີຜ່ານມາ ພາຍໃຕ້ການຊີ້ນໍາ-ນໍາພາຂອງພັກປະຊາຊົນປະຕິວັດລາວ ເຊິ່ງເຫັນໄດ້ວ່າປະເທດຊາດໄດ້ຮັບການພັດທະນາຢ່າງຮອບດ້ານ ດ້ວຍບາດກ້າວທີ່ໜັກແໜ້ນ, ພ້ອມກັນນັ້ນກໍ່ຍັງຍົກໃຫ້ເຫັນເຖິງ ມູນເຊື້ອອັນພິລາດອາດຫານຕໍ່ສູ້ຂອງນັກຮົບປະຕິວັດ ພ້ອມດ້ວຍປະຊາຊົນລາວບັນດາເຜົ່າ ຊາວເມືອງທ່າແຂກ ໃນບັ້ນຮົບປ້ອງກັນຕົວເມືອງທ່າແຂກຢ່າງອົງອາດ, ກ້າແກ່ນດ້ວຍນໍ້າໃຈເສຍສະຫຼະເພື່ອປະເທດຊາດ ຕ້ານຈັດກະພັດຜູ້ຮຸກຮານ, ເຊິ່ງການປາຖະກະຖາວັນປະຫວັດສາດທີ່ສຳຄັນໃນຄັ້ງນີ້ ກໍ່ເພື່ອເປັນການທົບທວນຫວນຄືນມູນເຊື້ອ ແລະ ໄຊຊະນະອັນຍິ່ງໃຫຍ່ ພາລະກິດແຫ່ງການຕໍ່ສູ້ປົດປ່ອຍປະເທດຊາດໃນເມື່ອກ່ອນ ແລະ ຜົນສໍາເລັດໃນພາລະກິດປົກປັກຮັກສາ ແລະ ພັດທະນາປະເທດຊາດ ພາຍໃຕ້ການນໍາພາຂອງພັກເຮົາ ພ້ອມທັງຖືເອົາໂອກາດນີ້ ເປັນການເພີ້ມທະວີສຶກສາອົບຮົມໃຫ້ສະມາຊິກພັກ, ພະນັກງານ-ລັດຖະກອນ ພາຍໃນຫ້ອງການແນວລາວສ້າງຊາດແຂວງໄດ້ຮັບຮູ້ ມີນ້ຳໃຈຮັກຊາດ, ມູນເຊື້ອສາມັກຄີປອງດອງຂອງປະຊາຊົນບັນດາເຜົ່າ ແລະ ຊັ້ນຄົນ, ນໍ້າໃຈຕໍ່ສູ້ ອັນອົງອາດກ້າຫານຂອງກອງທັບ ແລະ ປະຊາຊົນລາວ.

info@lfnd.org.la | 021 213754 | (856-21) 453191