ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດແຂວງຄໍາມ່ວນ ສະເຫຼີມສະຫຼອງວັນແມ່ຍິງສາກົນ

ພິທີສະເຫຼີມສະຫຼອງວັນແມ່ຍິງສາກົນ ຄົບຮອບ 111 ປີ ( 8/3/1910-8/3/2021) ໄດ້ຈັດຂຶ້ນໃນວັນທີ່ 18 ມີນາ 2021 ຢູ່ທີ່ສະໂມສອນໃຫຍ່ຂອງແຂວງ ພາຍໃຕ້ການເປັນປະທານ ຂອງທ່ານ ນາງ  ກຽນຕາ ວັນມະນາ ປະທານຄະນະບໍລິຫານງານສະຫະພັນແມ່ຍິງແຂວງຄໍາມ່ວນ, ໂດຍເປັນກຽດເຂົ້າຮ່ວມຂອງທ່ານ ຈັນ ບຸບຜາລີວັນ ກໍາມະການປະຈໍາພັກແຂວງ ປະທານແນວລາວສ້າງຊາດແຂວງ, ມີບັນດາການນໍາຂອງແຂວງ, ພະແນກການ, ພະນັກງານອາວຸໂສບໍານານ, ຮາກຖານສະຫະພັນແມ່ຍິງອ້ອມຂ້າງແຂວງ ເຂົ້າຮ່ວມ.

ພິທີດັ່ງກ່າວທ່ານ ນາງ ກຽນຕາ ວັນມະນາ ໄດ້ຫວນຄືນມູນເຊື້ອ ແລະ ຍົກໃຫ້ເຫັນປະຫວັດຄວາມເປັນມາຂອງວັນດັ່ງກ່າວ ເຊິ່ງວັນທີ່ 8 ມີນາ ແມ່ນເຫດການ-ການເມືອງທີ່ສໍາຄັນ ເປັນຂີດໝາຍແຫ່ງໄຊຊະນະອັນພື້ນຖານ ຂອງຂະບວນການແມ່ຍິງສາກົນ ໃນການຕໍ່ສູ້ທວງເອົາສິດຜົນປະໂຫຍດ ອັນຊອບທໍາຂອງແມ່ຍິງຊາວຜູ້ອອກແຮງງານໃນທົ່ວໂລກ ເປັນວັນລະນຶກເຖິງການຕໍ່ສູ້ຂອງແມ່ຍິງ ເພື່ອປົດປ່ອຍຕົນເອງ ແລະ ທວງໃຫ້ມີສິດສະເໝີພາບ ປະຊາທິປະໄຕຄືກັນກັບຜູ້ຊາຍ, ພ້ອມນີ້ຍັງຍົກໃຫ້ເຫັນ ບັນດາອົງການຈັດຕັ້ງ, ສົນທິສັນຍາ, ຖະແຫຼງການ ແລະ ກອງປະຊຸມຕ່າງໆ ກ່ຽວກັບແມ່ຍິງລະດັບສາກົນ, ພາກພື້ນ ແລະ ອາຊຽນ, ໃນໂອກາດນີ້ຍັງໄດ້ມອບໃບຍ້ອງຍໍໃຫ້ແກ່ບຸກຄົນ ແລະ ກົມກອງທີ່ໄດ້ປະກອບສ່ວນ ເຂົ້າໃນງານສະເຫຼີມສະຫຼອງວັນແມ່ຍິງສາກົນ ຄົບຮອບ 111 ປີຕື່ມອີກ.

info@lfnd.org.la | 021 213754 | (856-21) 453191