ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດແຂວງຄໍາມ່ວນ ຮ່ວມກັບພາກສ່ວນຕ່າງໆ ມອບເຄືອງຊ່ວຍເຫຼືອ

ເພື່ອເປັນການສ້າງຂະບວນການ ຂໍ່ານັບຊົມເຊີຍວັນສ້າງຕັ້ງແນວລາວສ້າງຊາດ ຄົບຮອບ 71 ປີ( 13 ສິງຫາ 1950-13 ສິງຫາ 2021) ແລະ ເປັນການປະກອບສ່ວນຊ່ວຍເຫຼືອສັງຄົມ ເວົ້າລວມ, ເວົ້າສະເພາະກໍ່ເພື່ອເປັນຂວັນກໍາລັງໃຈ ໃຫ້ແກ່ແຮງງານລາວທີ່ກັບມາແຕ່ຕ່າງປະເທດ ທີ່ເຂົ້າຈໍາກັດບໍລິເວນຢູ່ສູນກັກກັນ ແລະ ສູນປິ່ນປົວຜູ້ຕິດເຊື້ອພະຍາດໂຄວິດ 19 ໃຫ້ສາມາດຜ່ານຜ່າວິກິດການດັ່ງກ່າວນີ້ໄປດ້ວຍດີ.

ໃນລະຫວ່າງເດືອນສິງຫານີ້ ແນວລາວສ້າງຊາດ ແຂວງຄໍາມ່ວນ ໄດ້ສົມທົບກັບຄະນະ ອພສ ແຂວງ, ວັດກາໂທລິກທ່າແຂກ, ກໍາມະການສູນກາງແນວລາວສ້າງຊາດ ແລະ ກໍາມະການແນວລາວສ້າງຊາດແຂວງຄໍາມ່ວນ ປຸກລະດົມວັດຖຸ, ປັດໃຈ, ເຄື່ອງບໍລິໂພກ, ອຸປະໂພກປະເພດຕ່າງໆ ໄປປະກອບສ່ວນຊ່ວຍເຫຼືອສັງຄົມ ໂດຍສະເພາະ ສູນກັກກັນ ແລະ ສູນປິ່ນປົວຜູ້ຕິດເຊື້ອພະຍາດໂຄວິດ 19 ແຫ່ງຕ່າງໆພາຍໃນແຂວງ ໄດ້ຫຼາຍຄັ້ງລວມມູນຄ່າ 30 ລ້ານກວ່າກີບ. ເຄື່ອງທີນໍາໄປຊ່ວຍເຫຼືອ ປະກອບມີ: ເຂົ້າກ່ອງ, ອາຫານສໍາເລັດຮູບ, ນໍ້າດື່ມ, ໜ້າກາກອານາໄມ ແລະ ເຈວລ້າງມື.

ການປະກອບສ່ວນຊ່ວຍເຫຼືອໃນແຕ່ລະຄັ້ງ ກໍ່ໄດ້ສະແດງເຖິງຄວາມເປັນຫ່ວງເປັນໃຍ ຕໍ່ພໍ່ແມ່ພີ່ນ້ອງແຮງງານລາວ ທີ່ເດີນທາງກັບມາ, ຊຶ່ງເວລາໃດພັກ-ລັດ, ອຳນາດການປົກຄອງທຸກຂັ້ນ ກໍ່ໄດ້ໃຫ້ຄວາມເອົາໃຈໃສ່ໃກ້ຊິດ ຕິດແທດ, ໃຫ້ຄວາມຊ່ວຍເຫຼືອດ້ານຕ່າງໆກ່ຽວກັບວຽກງານຕ້ານ ແລະ ສະກັດກັ້ນການລະບາດພະຍາດໂຄວິດ 19 , ໂດຍແນ່ໃສ່ການຮັບເອົາປະຊາຊົນລາວ ທີ່ໄປອອກແຮງງານຢູ່ຕ່າງປະເທດ ກັບຄືນສູ່ບ້ານເກີດເມືອງນອນທັງໝົດ ບໍ່ວ່າຜູ້ທີ່ໄປຖືກກົດໝາຍ ຫລືຜິດກົດໝາຍ ກໍ່ລ້ວນແຕ່ໄດ້ຮັບການປະຕິບັດທາງດ້ານນະໂຍບາຍເທົ່າທຽມກັນ ໂດຍບໍ່ໄດ້ມີການຈຳແນກ ແລະ ບໍ່ໄດ້ເສຍຄ່າໃຊ້ຈ່າຍໃດໆໃນການກັບມາ ແລະ ໃນການກວດຫາເຊື້ອພະຍາດ ລວມທັງການຮັກສາ ສຳລັບຜູ້ທີ່ຕິດເຊື້ອອີກດ້ວຍ.

info@lfnd.org.la | 021 213754 | (856-21) 453191