ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດແຂວງສະຫວັນນະເຂດໄດ້ຮັບການຍົກລະດັບວຽກງານຊົນເຜົ່າຂົງເຂດແນວລາວສ້າງຊາດ

ລະຫວ່າງວັນທີ 23-24 ເມສາ 2024 ທີ່ສະໂມສອນ ເມືອງພີນ ແຂວງສະຫວັນນະເຂດ ສູນກາງແນວລາວສ້າງຊາດ ຮ່ວມກັບແນວລາວສ້າງຊາດແຂວງສະຫວັນນະເຂດຈັດຊຸດຝຶກອົບຮົມກ່ຽວກັບວຽກງານຊົນເຜົ່າຂົງເຂດແນວລາວສ້າງຊາດ ແລະ ຜັນຂະຫຍາຍເນື້ອໃນກອງປະຊຸມ 3 ປະທານແນວໂຮມ ກຳປູເຈຍ-ລາວ-ຫວຽດນາມ ຄັ້ງທີ 5 ທີ່ຈັດຂຶ້ນໃນວັນທີ 9 ເມສາ 2024 ຜ່ານມາ ທີ່ ນະຄອນຫຼວງວຽງຈັນ.
ກອງປະຊຸມຝຶກອົບຮົມຄັ້ງນີ້ແມ່ນເພື່ອເປັນການສ້າງຄວາມເຂັ້ມແຂງຍົກລະດັບວຽກງານຊົນເຜົ່າຂົງເຂດແນວລາວສ້າງຊາດ ໃຫ້ແກ່ແນວລາວສ້າງຊາດຂັ້ນທ້ອງຖີ່ນໂດຍສະເພາະແມ່ນພະນັກງານແນວລາວສ້າງຊາດແຂວງ ແລະ ບັນດາເມືອງທົ່ວແຂວງສະຫວັນນະເຂດ ໂດຍການເປັນປະທານ ຂອງ ທ່ານ ຄຳໄຫຼ ສີປະເສີດ ກຳມະການສູນກາງພັກ, ຮອງປະທານຜູ້ປະຈຳການສູນກາງແນວລາວສ້າງຊາດ, ເຂົ້າຮ່ວມມີ ທ່ານ ສຸດໃຈ ໄຊຍະວົງ ວ່າການເຈົ້າເມືອງໆພີນ, ທ່ານ ສິນໄຊ ວົງລະຄອນ ຮອງປະທານແນວລາວສ້າງຊາດແຂວງສະຫວັນນະເຂດ, ພ້ອມດ້ວຍແນວລາວສ້າງຊາດ ເມືອງ 14 ເມືອງ 1 ນະຄອນ ແລະພາກສ່ວນທີ່ກ່ຽວຂ້ອງ ເຂົ້າຮ່ວມທັງໝົດ 56 ທ່ານ, ຍິງ19 ທ່ານ.
ທ່ານຮອງປະທານຜູ້ປະຈຳການສູນກາງແນວລາວສ້າງຊາດ ໄດ້ມີຄຳເຫັນກ່າວເປີດຊຸດຝຶກອົບຮົມເຊິ່ງ ທ່ານກ່າວວ່າ: ວຽກງານຊົນເຜົ່າເປັນວຽກລະອຽດອ່ອນທີ່ຕ້ອງໄດ້ເອົາໃຈໃສ່ ຕົ້ນຕໍແມ່ນການເຕົ້າໂຮມຄວາມສາມັກຄີບັນດາຊົນເຜົ່າເພື່ອເປັນກຳລັງແຮງສັງລວມເຂົ້າ ໃນການປົກປັນຮັກສາ ແລະ ສ້າງສາພັດທະນາປະເທດຊາດ, ສະນັ້ນການຈັດຊຸດຝຶກອົບຮົມຄັ້ງນີ້ແມ່ນເປັນການທົບທວນຄືນການຈັດຕັ້ງປະຕິບັດວຽກງານຊົນເຜົ່າໃນຂົງເຂດແນວລາວສ້າງຊາດ, ທົບທວນບັນດານະໂຍບາຍຂອງພັກຕໍ່ຊົນເຜົ່າ ແລະ ວຽກງານຊົນເຜົ່າໃນໄລຍະໃໝ່. ພ້ອມກັນນີ້, ທ່ານໄດ້ເນັ້ນໃຫ້ສຳມະນຳກອນຈົ່ງເອົາໃຈໃສ່ແລກປ່ຽນບົດຮຽນ, ພຶດຕິກຳຕົວຈິງວຽກງານຊົນເຜົ່າໃນຂົງເຂດແນວລາວສ້າງຊາດ. ຊຸດຝຶກອົບຮົມຄັ້ງນີ້ ໄດ້ມີທັງໝົດ 5 ເອກະສານທີ່ນໍາມາບັນຍາຍຄື: ຄວາມຮູ້ພື້ນຖານກ່ຽວກັບວຽກງານຊົນເຜົ່າ ແລະ ວຽກງານຊົນເຜົ່າຂົງເຂດແນວລາວສ້າງຊາດ; ຄວາມຮູ້ພື້ນຖານກ່ຽວກັບວຽກງານປົກປ້ອງສິດ ແລະ ຜົນປະໂຫຍດຂອງຊົນເຜົ່າ; ຄວາມຮູ້ພື້ນຖານກ່ຽວກັບວຽກງານຂົນຂວາຍຊົນເຜົ່າ ແລະ ວຽກງານສ້າງຄອບຄົວ-ບ້ານສາມັກຄີປອງດອງ; ປະຊາຊົນບັນດາເຜົ່າຢູ່ຮາກຖານ ແລະ ຢູ່ລຽບຕາມຊາຍແດນ; ນະໂຍບາຍວຽກງານຊົນເຜົ່າ ເຊິ່ງບັນຍາຍເອກະສານໂດຍວິທະຍາກອນຈາກສູນກາງແນວລາວສ້າງຊາດ ແລະ ກອງບັນຊາກັນປ້ອງກັນຄວາມສະຫງົບເມືອງພີນ. ພາຍຫຼັງໄດ້ຮັບຟັງການບັນຍາຍບັນດາເອກະສານດັ່ງກ່າວແລ້ວ ແບ່ງເປັນກຸ່ມຄົ້ນຄວ້າຫົວຂໍ້ສະເພາະ ແລະ ຂຽນເປັນບົດລາຍງານເພື່ອປະເມີນຄວາມເຂົ້າໃຈໃນການຈັດຕັ້ງປະຕິບັດ ພ້ອມທັງ ປະກອບຄຳຄິດຄຳເຫັນແລກປ່ຽນບົດຮຽນຮ່ວມກັນ ເພື່ອເຮັດໃຫ້ພະນັກງານຂັ້ນທ້ອງຖິ່ນ ເວົ້າລວມ ເວົ້າສະເພາະກໍຄືພະນັກງານແນວລາວສ້າງຊາດທົ່ວ ແຂວງສະຫວັນນະເຂດໄດ້ຮັບຮູ້ ແລະ ເຂົ້າໃຈຢ່າງເລີກເຊິ່ງຕໍ່ວຽກງານຊົນເຜົ່າໃນຂົງເຂດແນວລາວສ້າງຊາດຫຼາຍຂຶ້ນ.
ໂອກາດນີ້, ທ່ານ ຮອງປະທານຜູ້ປະຈຳການສູນກາງແນວລາວສ້າງຊາດ ໄດ້ມີຄຳເຫັນໂອ້ລົມຕໍ່ຊຸດຝຶກອົບຄັ້ງນີ້ ເຊິ່ງກ່ອນອື່ນທ່ານໄດ້ຍັອງຍໍຊົມເຊີຍຄະນະຮັບຜິດຊອບກະກຽມກອງປະຊຸມຝຶກອົບຮົມຊຸດນີ້ ; ພ້ອມດຽວກັນນີ້ ທ່ານຍັງເນັ້ນຕື່ມບາງບັນຫາຄື: ວຽກງານຊົນເຜົ່າ ແມ່ນກົກເຄົ້າຂອງ ການເຕົ້າໂຮມຄວາມສາມັກຄີວົງຄະນາຍາດແຫ່ງຊາດ ສະນັ້ນ, ໃຫ້ແນວລາວສ້າງຊາດແຕ່ລະເມືອງທີ່ເຮັດວຽກງານຕົວຈິງຢູ່ຮາກຖານຕ້ອງຖືສຳຄັນຕໍ່ວຽກງານດັ່ງກ່າວເພື່ອກຳໄດ້ແນວຄວາມຄິດ, ຄວາມມຸ່ງໝາດປາຖະໜາ ຂອງປະຊາຊົນລາວບັນດາເຜົ່າ ແລະ ທ່ານໄດ້ເນັ້ນໃຫ້ສຳມະນາກອນທຸກທ່ານຈົ່ງນຳເອົາເນື້ອໃນບົດຮຽນໃນຄັ້ງນີ້ໄປໝູນໃຊ້ຈັດຕັ້ງປະຕິບັດຢູ່ໃນຂົງເຂດວຽກງານຂອງຕົນທີ່ຮັບຜິດຊອບໃຫ້ໄດ້ຮັບຜົນດີ ແລະ ໃຫ້ເກີດດອກອອກຜົນ ແນໃສ່ເຮັດໃຫ້ວຽກງານຊົນເຜົ່າຂົງເຂດແນວລາວສ້າງຊາດຂັ້ນທ້ອງຖີ່ນນັບມື້ເຂັ້ມແຂງຂຶ້ນເປັນກ້າວໆ.
ບກ: ສ ຈື້ໄຊ
ຂ່າວ-ພາບ: ເລົ່າລໍ່
info@lfnd.org.la | 021 213754 | (856-21) 453191