ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດແຂວງສາລະວັນ ເຊື່ອມຊຶມ 2 ເອກະສານສຳຄັນ

ເພື່ອລະນຶກເຖິງປະຫວັດແຫ່ງການກໍາເນີດເຕີບໃຫຍ່ຂະຫຍາຍຕົວຂອງພັກກອມມູນິດຈີນ ແລະ ມູນເຊື້ອອັນດີງາມຂອງປະທານ ສຸພາ ນຸວົງ ຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ, ໃນວັນທີ 4 ສິງຫາ 2021 ນີ້ ແນວລາວສ້າງຊາດແຂວງສາລະວັນ ໄດ້ຈັດພິທີປາຖະກະຖາວັນສ້າງຕັ້ງພັກກອມມູນິດຈີນ ຄົບຮອບ 100 ປີ(1 ກໍລະກົດ 1921 – 1 ກໍລະກົດ 2021), ວັນຄ້າຍວັນເກີດຂອງປະທານ ສຸພາ ນຸວົງ ຄົບຮອບ 112 ປີ (13 ກໍລະກົດ 1909 – 13 ກໍລະກົດ 2021). ທີ່ຫ້ອງປະຊຸມຂອງຕົນ, ໂດຍການເປັນປະທານຂອງ ທ່ານ ບຸນທົງ ເມືອງຈັນ ເລຂາໜ່ວຍພັກ ຮອງປະທານແນວລາວສ້າງຊາດແຂວງ, ມີສະມາຊິກພັກ, ພະນັກງານ-ລັດຖະກອນ ແນວລາວສ້າງຊາດແຂວງເຂົ້າຮ່ວມ.

ໃນໂອກາດນີ້ ທ່ານ ໜູການ ຊາທິລາດ ຮອງເລຂາໜ່ວຍພັກ, ຮອງທານແນວລາວສ້າງຊາດແຂວງ ໄດ້ເລົ່າຄືນປະຫວັດແຫ່ງການສ້າງຕັ້ງພັກກອມມູນິດຈີນ, 100 ປີ ແຫ່ງການນໍາພາຂອງພັກກອມມູນິດຈີນ ແລະ ການພົວພັນລະ ຫວ່າງສອງພັກ, ສອງລັດຖະບານລາວ-ຈີນ ໄດ້ສ້າງສາຍພົວພັນຮ່ວມກັນ ນັບແຕ່ປີ 1959 ແລະ ສ້າງສາຍພົວພັນການທູດຮ່ວມກັນວັນທີ 25 ເມສາ 1961, ພັກກອມມູນິດຈີນ ແມ່ນພັກການເມືອງທີ່ຍິ່ງໃຫຍ່ ໂດຍໄດ້ຮັບການສ້າງຕັ້ງຂຶ້ນ ຢູ່ໃນເຮືອລໍານ້ອຍລໍາໜຶ່ງໃນທະເລສາບໃຕ້ ຢູ່ເຂດກົງສູນຝຣັ່ງ ນະຄອນຊຽງໄຮ ເວລານັ້ນມີສະມາຊິກພຽງແຕ່ 58 ສະ ຫາຍ, ພັກໄດ້ເດີນຕາມຫຼັກການຂອງລັດທິມາກ-ເລນິນ, ພາຍຫຼັງກອງປະຊຸມໃຫຍ່ ຄັ້ງທີ 1 ຂອງພັກສໍາເລັດລົງແລ້ວ ບັນດາຜູ້ແທນກອງປະຊຸມ ກໍໄດ້ນໍາເອົາແນວທາງການປະຕິວັດໄປຈັດຕັ້ງຜັນຂະຫຍາຍຢູ່ໃນທຸກແຂວງ ແລະ ທຸກພາກຂອງປະເທດ, ສິ່ງເລົ່ານັ້ນມັນໄດ້ກາຍເປັນທວນໄຟປະຕິວັດໃຫ້ແກ່ການເລີ່ມຕົ້ນຂະບວນການຕໍ່ສູ້ປະຕິວັດ ທີ່ມີພັກກອມມູນິດນໍາພາ ນັບແຕ່ເວລານັ້ນເປັນຕົ້ນມາ ແລະ ໄດ້ກໍານົດເອົາວັນທີ 1 ກໍລະກົດ 1921 ເປັນວັນສ້າງຕັ້ງພັກກອມມູນິດຈີນ ເຊິ່ງໄດ້ຮັບການຈັດຕັ້ງປະຕິບັດຈົນເຖິງປະຈຸບັນ, ຕະຫຼອດໄລຍະ 100 ປີ ພັກກອມມູນິດຈີນ ໄດ້ເຕີບໃຫຍ່ຂະຫຍາຍ ຕົວທາງດ້ານລະບົບການຈັດຕັ້ງພັກ ແລະ ສະມາຊິກພັກກໍໄດ້ມີຈໍານວນເພີ່ມຂຶ້ນຢ່າງຫຼວງຫຼາຍ, ກອງປະຊຸມໃຫຍ່ຂອງພັກດໍາເນີນມາໄດ້ 19 ຄັ້ງ, ເລຂາທິການໃຫຍ່ຂອງພັກກອມມູນິດຈີນ ປະກອບມີ 11 ສະຫາຍ.

ພ້ອມກັນນັ້ນຜູ້ເຂົ້າຮ່ວມ ກໍໄດ້ສືບຕໍ່ເຊື່ອມຊືມເອກະສານວັນເກີດປະທານ ສຸພານຸວົງ ຄົບຮອບ 112 ປີ ໂດຍໃຫ້ກຽດເຜີຍແຜ່ຂອງທ່ານ ວຽງໄຊ ແກ້ວມະນີວົງ ຄະນະພັກ ຮອງປະທານແນວລາວສ້າງຊາດແຂວງ, ໃນນັ້ນທ່ານໄດ້ເລົ່າເຖິງປະຫວັດຂອງທ່ານປະທານ ສຸພານຸວົງ ເປັນຜູ້ນໍາທີ່ດີເດັ່ນ ແລະ ເຄົາລົບຮັກຊາດຂອງປະຊາຊົນລາວບັນດາເຜົ່າ, ເປັນຜູ້ນໍາທີ່ມີຄວາມຈົ່ງຮັກພັກດີຕໍ່ອຸດົມການປະຕິວັດຢ່າງເດັດຂາດ, ຕໍ່ສູ້ຢ່າງກ້າແກ່ນພິລະອາດຫານ, ແມ່ນຜູ້ນຳນັກປະຕິວັດປັນຍາຊົນຜູ້ຍິ່ງໃຫ່ຍ, ຊື່ສັດ ປະຫຍັດ ອົດທົນ ແລະ ລຽບງ່າຍ ສົມເປັນຜູ້ນຳປະຊາຊົນຢ່າງແທ້ຈິງ.

info@lfnd.org.la | 021 213754 | (856-21) 453191