ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດແຂວງຫົວພັນ ລົງເຜີຍແຜ່ຜົນສຳເລັດກອງປະຊຸມໃຫຍ່ ຄັ້ງທີ VIII ຂອງຕົນ

ວັນທີ 26-28 ມັງກອນ 2021 ນີ້ ທ່ານ ວີເຕັ່ງ ຈື່ໄມເຕັ່ງ ຮອງປະທານແນວລາວສ້າງຊາດແຂວງ ພ້ອມດ້ວຍຄະນະ ໄດ້ລົງເຜີຍແຜ່ຜົນສຳເລັດກອງປະຊຸມໃຫຍ່ ຄັ້ງທີ VIII ຜູ້ແທນແນວລາວສ້າງຊາດ ແຂວງຫົວພັນ ຢູ່ສາມເມືອງຄື: ເມືອງຫົວເມືອງ, ເມືອງຮ້ຽມ ແລະ ເມືອງຊ່ອນ ເຊິ່ງການລົງເຜີຍແຜ່ຢູ່ແຕ່ລະເມືອງນັ້ນມີບັນດາທ່ານການນຳຂອງເມືອງ, ຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ, ກຳມະການສູນກາງແນວລາວສ້າງຊາດ, ກຳມະການແນວລາວສ້າງຊາດແຂວງ, ເມືອງ, ບ້ານ, ອົງການປົກຄອງບ້ານ, ພະນັກງານປະຕິວັດອາວຸໂສບຳນານ, ຜູ້ຊົງຄຸນວຸດທິ, ທະຫານ, ຕຳຫຼວດ ຕະຫຼອດຮອດພະນັກງານ-ລັດຖະກອນ ເຂົ້າຮ່ວມ.

ການລົງເຜີຍແຜ່ຄັ້ງນີ້ ເພື່ອເປັນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VIII ຜູ້ແທນແນວລາວສ້າງຊາດແຂວງຫົວພັນ ໃຫ້ແຕ່ລະເມືອງ ແຕ່ລະເປົ້າໝາຍ ໄດ້ຮັບຮູ້ເຂົ້າໃຈ ແລະ ນຳໄປຈັດຕັ້ງຜັນຂະຫຍາຍໃຫ້ປະກົດຜົນເປັນຈິງເປັນຕົ້ນແມ່ນ: ການຈັດຕັ້ງປະຕິບັດທິດທາງແຜນການລວມ, ວຽກງານຈຸດສຸມຕົ້ນຕໍ, ແຜນງານ, ໂຄງການຂອງແນວລາວສ້າງຊາດແຂວງໃນໄລຍະ 5 ປີຕໍ່ໜ້າ ( 2021-2025 ). ໃນພິທີ ທ່ານ ວີເຕັ່ງ ຈື່ໄມເຕັ່ງ ຮອງປະທານແນວລາວສ້າງຊາດແຂວງ ໄດ້ຜ່ານບົດລາຍງານຜົນສຳເລັດກອງປະຊຸມໃຫຍ່ ຄັ້ງທີ VIII ຜູ້ແທນແນວລາວສ້າງຊາດແຂວງຫົວພັນ.

ພ້ອມກັນນັ້ນ, ກໍໄດ້ເຜີຍແຜ່ເຊື່ອມຊຶມມະຕິຂອງກົມການເມືອງສູນກາງພັກ ສະບັບເລກທີ 108 ວ່າດ້ວຍວຽກງານແນວໂຮມ ແລະ ວຽກງານມະຫາຊົນຂອງພັກ ໃນໄລຍະໃໝ່, ເຜີຍແຜ່ເອກະສານວ່າດ້ວຍພາລະບົດບາດ, ສິດ, ໜ້າທີ່ຂອງປະທານ, ຮອງປະທານ, ກຳມະການ, ຄະນະປະຈຳ, ຄະນະທີ່ປຶກສາ, ຄະນະກວດກາຂອງແນວລາວສ້າງຊາດແຂວງ, ເມືອງ ແລະ ຜູ້ຊົງຄຸນວຸດທິ ຕື່ມອີກ.

info@lfnd.org.la | 021 213754 | (856-21) 453191