ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດແຂວງຫຼວງນ້ຳທາ ເຜີຍແຜ່ມະຕິ XI ຂອງພັກ

ແນວລາວສ້າງຊາດແຂວງຫຼວງນ້ຳທາ ໄດ້ເຜີຍແຜ່ ແລະ ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະ ເທດ ຄັ້ງທີ XI ຂອງພັກ ໃນຕອນເຊົ້າວັນທີ 22 ມິຖຸນາ 2021 ທີ່ຫ້ອງປະຊຸມແນວລາວສ້າງຊາດແຂວງ ໂດຍການເປັນປະທານຂອງ ສະຫາຍ ສົມຈ໋າຍ ແຝງຫຼ້າ ຮອງປະທານແນວລາວສ້າງຊາດແຂວງ; ມີຫົວໜ້າຫ້ອງການ, ຫົວໜ້າຂະແໜງ, ຮອງຂະແໜງ ພ້ອມດ້ວຍພະນັກງານ-ລັດຖະກອນ ພາຍໃນອົງການເຂົ້າຮ່ວມ.

ໃນການເຜີຍແຜ່, ເຊື່ອມຊືມ ສະຫາຍ ສົມຈ໋າຍ ແຝງຫຼ້າ ໄດ້ເຜີຍແຜ່ເຊື່ອມຊືມ ມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ເພື່ອເຮັດໃຫ້ພະນັກງານ-ລັດຖະກອນ ຮັບຮູ້-ເຂົ້າໃຈ ກ່ຽວກັບແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX (2021-2025), ແບບແຜນວິທີເຮັດວຽກທີ່ຖືກຕ້ອງ, ສອດຄ່ອງໄລຍະຜ່ານມາ, ການຫັນປ່ຽນທາງດ້ານແນວຄິດ-ຈິນຕະນາການ, ປັບປຸງ, ຍົກສູງຫຼັກໝັ້ນການເມືອງ, ຍົກສູງນ້ຳໃຈເສຍສະຫຼະ, ເພີ່ມທະວີຄວາມສາມັກຄີພາຍໃນພັກ ແລະ ພາຍໃນສັງຄົມ ໃຫ້ໜັກແໜ້ນເຂັ້ມແຂງ, ເຄື່ອນໄຫວຈັດຕັ້ງປະຕິບັດໃຫ້ແທດເໝາະກັບໜ້າທີ່ວຽກງານໃນຂະແໜງການຂອງຕົນ ແລະ ມີຜົນສຳເລັດຕາມຄາດໝາຍທີ່ວາງໄວ້.

ການຈັດຕັ້ງເຜີຍແຜ່ຄັ້ງນີ້ ຜູ້ເຂົ້າຮ່ວມໄດ້ຮັບຟັງການເຜີຍແຜ່ ຄຳສັ່ງຂອງຄະນະເລທິການສູນກາງພັກ ສະບັບເລກທີ 38/ຄລສພ ລົງວັນທີ 9 ມີນາ 2021 ວ່າດ້ວຍການຈັດຕັ້ງເຊື່ອມຊຶມ ແລະ ຜັນຂະຫຍາຍ ມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ, ເອກະສານການຈັດຕັ້ງເຊື່ອມຊຶມ ແລະ ຜັນຂະຫຍາຍ ມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ ແລະ ເອກະສານ ອະທິບາຍ ກ່ຽວກັບເນື້ອໃນຄຳຂັວນ ຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ.

info@lfnd.org.la | 021 213754 | (856-21) 453191