ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດແຂວງຫຼວງນ້ຳທາ ປະເມີນການຈັດຕັ້ງປະຕິບັດວຽກງານແນວລາວສ້າງຊາດ

ແນວລາວສ້າງຊາດແຂວງຫຼວງນ້ຳທາ ໄດ້ຈັດກອງປະຊຸມປະເມີນຜົນການຈັດຕັ້ງປະຕິບັດວຽກງານແນວລາວສ້າງຊາດຂອງປະທານ, ຮອງປະທານແນວລາວສ້າງຊາດແຂວງ  ປະຈຳປີ 2019 ໂດຍໃຫ້ກຽດເຂົ້າຮ່ວມຂອງທ່ານ ຄຳຈັນ ອິນທອງໄຊ ກຳມະການປະຈຳພັກແຂວງ, ຜູ້ຊີ້ນຳວຽກງານແນວລາວສ້າງຊາດ, ອົງການຈັດຕັ້ງມະຫາຊົນ ແລະ ວຽກງານສາທາລະນະສຸກ, ມີບັນດາປະທານ,ຮອງປະທານ, ຫົວໜ້າ, ຮອງຫົວໜ້າຫ້ອງການ-ຂະແໜງການ ແລະ ພະນັກງານວິຊາການເຂົ້າຮ່ວມ 20 ທ່ານ, ຍິງ 11 ທ່ານ ໃນວັນທີ 2 ພະຈິກ 2020.

ກອງປະຊຸມທ່ານ ນາງ ຫວງຄຳ ແກ້ວດວງປະເສີດ ຫົວໜ້າຂະແໜງຈັດຕັ້ງ ອົງການແນວລາວສ້າງຊາດແຂວງ ໄດ້ຜ່ານຂໍ້ຕົກລົງ ວ່າດ້ວຍການແຕ່ງຕັ້ງຄະນະຮັບຜິດຊອບການປະເມີນລັດຖະກອນ ແລະ ດຳລັດ ວ່າດ້ວຍການປະເມີນຜົນການຈັດຕັ້ງປະຕິບັດວຽກງານຂອງພະນັກງານ-ລັດຖະກອນ ເພື່ອເຮັດໃຫ້ວຽກງານດັ່ງກ່າວ ດຳເນີນຢ່າງເປັນລະບົບ, ຖືກຕ້ອງ, ສອດຄ່ອງກັບແນວທາງນະໂຍບາຍຂອງພັກ ແລະ ກົດໝາຍຂອງລັດ ຮັບປະກັນຄວາມເປັນເອກະພາບ, ໂປ່ງໃສ ແລະ ຖືກຕ້ອງກັບສະພາບຄວາມເປັນຈິງ ແນ່ໃສ່ເຮັດໃຫ້ວຽກງານການປະເມີນ ແລະ ຄຸ້ມຄອງຜົນການປະຕິບັດວຽກງານຂອງພະນັກງານ-ລັດຖະກອນ ທີ່ສັງກັດອົງການແນວລາວສ້າງຊາດແຂວງ ໃຫ້ມີປະສິດທິພາບ ແລະ ປະສິດທິຜົນ. ການປະເມີນຜົນການຈັດຕັ້ງປະຕິບັດວຽກງານ ຂອງປະທານ, ຮອງປະທານ ແມ່ນ ການຕີລາຄາ ແລະ ປະເມີນຜົນຕາມມາດຕະຖານວັດແທກ ການປະເມີນຜົນ ແລະ ຜົນສຳເລັດ ໃນການປະຕິບັດໜ້າທີ່ວຽກງານ ໃນ 1 ປີຜ່ານມາ. ໃນນັ້ນ ປະທານ, ຮອງປະທານ ໄດ້ຜ່ານບົດປະເມີນຜົນການປະຕິບັດໜ້າທີ່ວຽກງານຂອງຕົນ ໃນ 1 ປີຜ່ານມາ ເຊິ່ງໄດ້ສະແດງເຖິງຜົນງານດ້ານດີ, ດ້ານອ່ອນ, ຂໍ້ຄົງຄ້າງ ໃນການຊີ້ນຳໆພາວຽກງານທີ່ຕົນຮັບຜິດຊອບ.

ໃນໂອກາດນີ້, ທ່ານ ຄຳຈັນ ອິນທອງໄຊ ໄດ້ສະແດງຄວາມຍ້ອງຍໍຊົມເຊີຍ ແລະ ມີຄຳເຫັນໂອ້ລົມຕໍ່ ປະທານ, ຮອງປະທານແນວລາວສາ້ງຊາດ ຈົ່ງເອົາໃຈໃສ່ ສືບຕໍ່ເສີມຂະຫຍາຍມູນເຊື້ອອັນດີງາມ, ເພີ່ມທະວີຄວາມສາມາດໃນການຊີ້ນຳໆພາວຽກງານລວມ ແລະ ວຽກງານທີ່ຕົນຮັບຜິດຊອບໃຫ້ສູງ,​ ເອົາໃຈໃສ່ເຕົ້າໂຮມຄວາມສາມັກຄີເປັນເອກະພາບ ແລະປະກອບສ່ວນຢ່າງຕັ້ງໜ້າໃນຂະບວນການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ, ການສະກັດກັ້ນ-ແກ້ໄຂປະກົດການຫຍໍ້ທໍ້ທີ່ຢູ່ໃນຂອບເຂດຄວາມຮັບຜິດຊອບຂອງຕົນ.

 

info@lfnd.org.la | 021 213754 | (856-21) 453191