ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດແຂວງອຸດົມໄຊ ຈັດກອງປະຊຸມຖອດຖອນບົດຮຽນການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ VII

ກອງປະຊຸມສະຫຼຸບຖອດຖອນບົດຮຽນການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ 7 ຂອງແນວລາວສ້າງຊາດ ແຂວງອຸດົມໄຊ ລະຫວ່າງແນວລາວສ້າງຊາດແຂວງ ກັບ ແນວລາວສ້າງຊາດ 7 ເມືອງ ໄດ້ຈັດຂຶ້ນໃນວັນທີ 11 ສິງຫາ 2021 ໂດຍການເປັນປະທານຂອງທ່ານ ວັນນາ ແກ້ວສັນຕິ ຄະນະປະຈໍາພັກແຂວງ ກຳມະການສູນກາງແນວລາວສ້າງຊາດ ປະທານແນວລາວສ້າງຊາດແຂວງອຸດົມໄຊ, ເຂົ້າຮ່ວມມີຮອງປະທານແນວລາວສ້າງຊາດແຂວງ ພ້ອມດ້ວຍຫົວໜ້າຂະແໜງການ, ພະນັກງານວິຊາການ ພາຍໃນແນວລາວສ້າງຊາດແຂວງ ແລະ ປະທານ-ຮອງປະທານແນວລາວສ້າງຊາດເມືອງ 7 ເມືອງ ເຂົ້າຮ່ວມ.

ໃນກອງປະຊຸມ ໄດ້ຮັບຟັງການສະຫຼຸບລາຍງານການເຄື່ອນໄຫວວຽກງານຮອບດ້ານ ຂອງແນວລາວສ້າງຊາດແຂວງ ປະຈຳປີ 2021 ແລະ ທິດທາງແຜນການ 2022 ໂດຍໄດ້ຍົກໃຫ້ຮູ້ເຖີງດ້ານດີຜົນງານ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້. ໃນນັ້ນຜູ້ເຂົ້າຮ່ວມໄດ້ພ້ອມກັນປະກອບຄຳຄິດຄຳເຫັນ ຕາມຄຳຖາມເຈາະຈີ້ມຂອງປະທານກອງປະຊຸມ ເປັນຕົ້ນແມ່ນ ບັນຫາການລົງເຄື່ອນໄຫວສຶກສາອົບຮົມການເມືອງແນວຄິດໃຫ້ປະຊາຊົນບັນດາຊົນເຜົ່າ, ຊັ້ນຄົນ, ສາສະໜາ ແລະ ເພດ-ໄວ; ວຽກງານກອງທຶນຂອງແນວລາວສ້າງຊາດ ແລະ ບັນດາຄາດໝາຍສູ້ຊົນໃນການສ້າງຄອບຄົວ ແລະ ບ້ານສາມັກຄີປອງດອງ. ທັງໝົດນັ້ນເພື່ອແນໃສ່ເຮັດໃຫ້ການເຄື່ອນໄຫວວຽກງານຂອງແນວລາວສ້າງຊາດຢູ່ແຂວງອຸດົມໄຊ ໄດຮັບໝາກຜົນ ແລະ ມີການເຄື່ອນໄຫວຢ່າງຖືກຕ້ອງຕາມພາລະບົດບາດ, ສິດ ແລະ ໜ້າທີ່ ເຕົ້າໂຮມຄວາມສາມັກຄີທົ່ວປວງຊົນ ໃຫ້ເປັນເຈົ້າການເຂົ້າໃນການພັດທະນາ, ແກ້ໄຂຄວາມທຸກຍາກ ແລະ ຕ້ານບັນດາປະກົດການຫຍໍ້ທໍ້ຕ່າງໆ ທີ່ຈະເກີດຂຶ້ນຢູ່ໃນສັງຄົມ.

info@lfnd.org.la | 021 213754 | (856-21) 453191