ສູນກາງແນວລາວສ້າງຊາດ

Lao Front For National Development

ແນວລາວສ້າງຊາດແຂວງ ບໍ່ແກ້ວ ລົງທາບທາມເນື້ອໃນເອກະສານຕໍ່ກອງປະຊຸມໃຫຍ່ຜູ້ແທນແນວລາວສ້າງຊາດແຂວງ ຄັ້ງທີ VIII

ແນວລາວສ້າງຊາດ ແຂວງບໍ່ແກ້ວ ໄດ້ຈັດກອງປະຊຸມທາບທາມເນື້ອໃນເອກະສານຕໍ່ກອງປະຊຸມໃຫຍ່ຜູ້ແທນແນວລາວສ້າງຊາດແຂວງ ຄັ້ງທີ VIII ໂດຍການເປັນປະທານຂອງ ທ່ານ ດາລີວັນ ພູສະຫວັນ ຄະນະປະຈໍາພັກແຂວງ, ກຳມະການສູນກາງແນວລາວສ້າງຊາດ, ປະທານແນວລາວສ້າງຊາດເເຂວງບໍ່ເເກ້ວ, ມີກຳມະການພັກເມືອງ, ຄະນະກຳມະການແນວລາວສ້າງຊາດແຂວງ, ປະທານເເນວລາວສ້າງຊາດເມືອງ, ຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ ເຂົ້າຮ່ວມ ຢູ່ທີ່ສູນເຝິກອົບຮົມເມືອງຫ້ວຍຊາຍ ວັນທີ 25 ພະຈິກ ຜ່ານມານີ້.

ກອງປະຊຸມ ທ່ານ ດາລີວັນ ພູສະຫວັນ ໄດ້ຜ່ານຮ່າງລາຍງານການເມືອງທັງ 2 ພາກ, ການຕີລາຄາຜົນສໍາເລັດການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນເເນວລາວສ້າງຊາດເເຂວງບໍ່ເເກ້ວ ແຕ່ປີ 2016-2020 ເຊິ່ງຕະຫຼອດໄລຍະ 5 ປີຜ່ານມາ ຄະນະກຳມະການເເນວລາວສ້າງຊາດ ແຕ່ລະຂັ້ນສາມາດຍາດໄດ້ຜົນສຳເລັດຫຼາຍດ້ານ ເດັ່ນກວ່າໝູ່ແມ່ນ ຂະບວນການສ້າງຄອບຄົວ ແລະ ບ້ານສາມັກຄີປອງດອງ, ໄດ້ເຕົ້າໂຮມກ້ອນກຳລັງຂອງປະຊາຊົນບັນດາເຜົ່າ, ຊັ້ນຄົນຕ່າງໆ ເຂົ້າຮ່ວມການຈັດຕັ້ງປະຕິບັດຂະບວນການຮັກຊາດ-ພັດທະນາ ແລະ ຊຸກຍູ້ວຽກງານ 3 ສ້າງ, ເປັນການຕໍ່ຍອດ ແລະ ເສີມຂະຫຍາຍຜົນສຳເລັດຂອງຂະບວນການກໍ່ສ້າງບ້ານນາມມະຍົດຢູ່ຮາກຖານຂັ້ນບ້ານໄດ້ດີພໍ ສົມຄວນ, ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ແກ່ປະຊາຊົນບັນດາເຜົ່າ, ປຸກລະດົມຂົນຂວາຍມະຫາຊົນ ທຸກຊົນເຜົ່າ, ສາສະໜາ, ເພດ, ໄວ ເຂົ້າຮ່ວມວຽກງານປ້ອງກັນຊາດ-ປ້ອງກັນຄວາມສະຫງົບ, ຕ້ານການໂຄສະນາບິດເບືອນເເບ່ງເເຍກຄວາມສາມັກຄີ ທີ່ຂັດກັບແນວທາງປ່ຽນແປງໃໝ່ຮອບດ້ານຂອງພັກ, ເສີມຂະຫຍາຍສິດ, ພາລະບົດບາດຂອງ ສູນກາງເເນວລາວສ້າງຊາດ ລົງສູ່ຮາກຖານ. ພ້ອມດຽວກັນນີ້ໄດ້ຜ່ານຮ່າງບົດສຳຫຼວດການນຳພາລວມຂອງຄະນະກຳມະການແນວລາວສ້າງຊາດແຂວງ ຊຸດທີ VII ກ່າວຕໍ່ກອງປະຊຸມໃຫຍ່ຜູ້ແທນແນວລາວສ້າງຊາດແຂວງ ສະໄໝທີ VIII, ກອງປະຊຸມໄດ້ຜ່ານລາຍຊື່ບຸກຄະລາກອນຂອບເຂດເມືອງ ຫ້ວຍຊາຍ ທີ່ຈະເຂົ້າສະໝັກເປັນຄະນະກຳມະການເເນວລາວສ້າງຊາດເເຂວງ ຊຸດທີ VIII ເຊິ່ງລວມມີ 12 ທ່ານ. ກອງປະຊຸມໄດ້ປະກອບຄຳຄິດຄຳເຫັນໃສ່ຮ່າງບົດລາຍງານການເມືອງ ຢ່າງກົງໄປກົງມາເພື່ອເຮັດໃຫ້ວຽກງານໃນຕໍ່ໜ້າມີຜົນສຳເລັດ ເເລະ ດີຂື້ນກວ່າເກົ່າ.

ຫຼັງຈາກນັ້ນ ໃນຕອນບ່າຍ ຢູ່ທີ່ຫ້ອງປະຊຸມແນວລາວສ້າງຊາດແຂວງບໍ່ແກ້ວ ໄດ້ເປີດການນຳພາດຳເນີນຊີວິດການເມືອງທ້າຍສະໄໝຂອງກຳມະການແນວລາວສ້າງຊາດ ແຂວງປະຈຳຢູ່ເມືອງ ຕື່ມອີກ.

info@lfnd.org.la | 021 213754 | (856-21) 453191